ಮಹಿಳೆಯರ ನಗ್ನ ದೃಶ್ಯಗಳನ್ನು ಸೆರೆ ಹಿಡಿಯುತ್ತಿದ್ದವನ ಬಂಧನ

Team Udayavani, Jun 6, 2017, 12:41 PM IST

ಬೆಂಗಳೂರು: ಮಹಿಳಾ ಶೌಚಾಲಯದೊಳಗೆ ಅಡಗಿ ಕುಳಿತು ಹೆಣ್ಣುಮಕ್ಕಳ ಖಾಸಗಿ ಕ್ಷಣಗಳನ್ನು ವೀಡಿಯೋ ಮಾಡುತ್ತಿದ್ದ ಮಂಗಳೂರು ಮೂಲದ ವ್ಯಕ್ತಿಯೊಬ್ಬನನ್ನು ಎಚ್‌ಎಎಲ್‌ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

ಪರಮೇಶ್‌ (22) ಬಂಧಿತ ಆರೋಪಿ. ಕುದ್ದಲಹಳ್ಳಿ ಬಳಿಯ ಕನ್ಸೆಟ್ರಿಕ್ಸ್‌ ಸಾಫ್ಟ್ವೇರ್‌ ಕಂಪೆನಿಯ ರೆಸ್ಟೋರೆಂಟ್‌ನಲ್ಲಿ ಕಳೆದ ನಾಲ್ಕೈದು ವರ್ಷಗಳಿಂದ ಪರಮೇಶ್‌ ಕೆಲಸ ಮಾಡುತ್ತಿದ್ದಾನೆ. ರೆಸ್ಟೋರೆಂಟ್‌ ಪಕ್ಕದಲ್ಲೇ ಇರುವ ಮಹಿಳಾ ಶೌಚಾಲಯಕ್ಕೆ ನುಗ್ಗುತ್ತಿದ್ದ ಪರಮೇಶ್‌, ಅಲ್ಲಿ ಯಾವುದಾದರೂ ಒಂದು ಶೌಚಗೃಹಕ್ಕೆ ಸೇರಿ ಬಾಗಿಲು ಹಾಕಿಕೊಳ್ಳುತ್ತಿದ್ದ.

ನಂತರ ಪಕ್ಕದ ಶೌಚಗೃಹಕ್ಕೆ ಮಹಿಳೆಯರ ಬರುವಿಕೆಯನ್ನೇ ಕಾಯುತ್ತಿರುತ್ತಿದ್ದ ಪರಮೇಶ್‌, ಯಾರಾದರೂ ಬಂದೊಡನೆ ಮೊಬೈಲ್‌ ಮೂಲಕ ಅವರ ಖಾಸಗಿ ಕ್ಷಣಗಳನ್ನು ಸೆರೆ ಹಿಡಿಯುತ್ತಿದ್ದ. ಒಂದು ಶೌಚಗೃಹದಿಂದ ಮತ್ತೂಂದು ಶೌಚಗೃಹದ ಮಧ್ಯೆ ಇರುವ ಖಾಲಿ ಜಾಗದಲ್ಲಿ ಮೊಬೈಲ್‌ ಇಟ್ಟು ಅಶ್ಲೀಲ ದೃಶ್ಯಗಳನ್ನು ಪರಮೇಶ್‌ ಚಿತ್ರೀಕರಿಸುತ್ತಿದ್ದ ಎಂದು ಪೊಲೀಸರು ಹೇಳಿದ್ದಾರೆ.

ಜೂ.3ರಂದು ಮಹಿಳಾ ಟಿಕ್ಕಿಯೊಬ್ಬರಿಗೆ ಪಕ್ಕದ ಶೌಚಗೃಹದಿಂದ ಮೊಬೈಲ್‌ ಕಾಣಿಸುತ್ತಿತ್ತು. ಇದರಿಂದ ಅನುಮಾನಗೊಂಡ ಅವರು, ಮಹಿಳಾ ಭದ್ರತಾ ಸಿಬ್ಬಂದಿಗೆ ಮಾಹಿತಿ ನೀಡಿದ್ದರು. ಸ್ಥಳಕ್ಕೆ ಬಂದ ಭದ್ರತಾ ಸಿಬ್ಬಂದಿ ಆರೋಪಿ ಅವಿತು ಕುಳಿತಿದ್ದ ಶೌಚಗೃಹದ ಬಾಗಿಲು ತೆಗೆಯುವಂತೆ ಸೂಚಿಸಿದ್ದಾರೆ.

ಆದರೆ, ಆತ ಬಾಗಿಲು ತೆಗೆದಿಲ್ಲ. ಕೊನೆಗೆ ಬಾಗಿಲು ಒಡೆದು ಆರೋಪಿಯನ್ನು ಹಿಡಿದ ಭದ್ರತಾ ಸಿಬ್ಬಂದಿ ಮತ್ತು ಇತರೆ ಮಹಿಳೆಯರು ಆತನನ್ನು ಥಳಿಸಿದ್ದಾರೆ. ಈ ವೇಳೆ ಮಹಿಳೆಯರ ಮೇಲೆಯೇ ಹಲ್ಲೆ ನಡೆಸಿದ್ದ ಪರಮೇಶ್‌ ಅವರಿಂದ ತಪ್ಪಿಸಿಕೊಂಡು ಪರಾರಿಯಾಗಿದ್ದ. ಈ ಸಂಬಂಧ ಮಹಿಳಾ ಟಿಕ್ಕಿ ಎಚ್‌ಎಎಲ್‌ ಠಾಣೆಗೆ ದೂರು ನೀಡಿದ್ದರು. 

ಕೂಡಲೇ ಕಾರ್ಯಪ್ರವೃತ್ತರಾದ ಎಚ್‌ಎಎಲ್‌ ಠಾಣಾಧಿಕಾರಿ ಸಾದಿಕ್‌ ಪಾಷಾ ನೇತೃತ್ವದ ತಂಡ ಪರಮೇಶ್‌ ವಾಸವಿದ್ದ ಮನೆಗೆ ತೆರಳಿದಾಗ ಆತ ಊರು ಬಿಟ್ಟುಹೋಗಲು ಸಿದ್ಧತೆ ನಡೆಸುತ್ತಿದ್ದ. ಕೂಡಲೇ ಆತನನ್ನು ಬಂಧಿಸಲಾಯಿತು ಎಂದು ಅಧಿಕಾರಿಗಳು ಹೇಳಿದ್ದಾರೆ.

ಆರೋಪಿಯ ಬಳಿಯಿದ್ದ ಮೊಬೈಲ್‌ಗ‌ಳನ್ನು ವಶಕ್ಕೆ ಪಡೆಯಲಾಗಿದೆ. ಆತನ ಮೊಬೈಲ್‌ನಲ್ಲಿ ಹಲವು ಮಹಿಳೆಯರ ನಗ್ನ ವಿಡಿಯೋಗಳು ಪತ್ತೆಯಾಗಿವೆ. ಅಲ್ಲದೆ, ಇತ್ತೀಚೆಗೆ ಈತನನ್ನು ರೆಸ್ಟೋರೆಂಟ್‌ನಿಂದ ಬೇರೆ ವಿಭಾಗಕ್ಕೆ ವರ್ಗಾವಣೆ ಮಾಡಲಾಗಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ.