ಉತ್ತರ ಪ್ರದೇಶದಲ್ಲಿ ತ್ರಿವಳಿ ಕೊಲೆ,ವ್ಯಾಪಾರಿ ಕುಟುಂಬ ಹಂತಕರಿಗೆ ಬಲಿ

Team Udayavani, Jun 7, 2017, 10:17 AM IST

ಸೀತಾಪುರ, ಉತ್ತರ ಪ್ರದೇಶ : ದರೋಡೆ ಯತ್ನವೆಂಬಂತೆ ಕಂಡು ಬಂದಿರುವ ಭೀಕರ ಪಾತಕ ಕೃತ್ಯವೊಂದರಲ್ಲಿ ಓರ್ವ ವ್ಯಾಪಾರಿ, ಆತನ ಪತ್ನಿ ಹಾಗೂ ಪುತ್ರನನ್ನು ಅಪರಿಚಿತ ಹಂತಕರು ಗುಂಡಿಕ್ಕಿ ಕೊಂದಿದ್ದಾರೆ.

ನಗರದ ಸಿವಿಲ್‌ ಲೈನ್ಸ್‌  ಪ್ರದೇಶದಲ್ಲಿ ನಿನ್ನೆ ಮಂಗಳವಾರ ತಡ ರಾತ್ರಿ ನಡೆದಿರುವ ಈ ಕೊಲೆ ಕೃತ್ಯದಲ್ಲಿ ಹತರಾದವರನ್ನು ದವಸ-ಧಾನ್ಯಗಳ ವ್ಯಾಪಾರಿ ಸುನೀಲ್‌ ಜೈಸ್ವಾಲ್‌ 45, ಆತನ ಪತ್ನಿ ಕಾಮಿನಿ ಜೈಸ್ವಾಲ್‌ 42, ಮತ್ತು ಪುತ್ರ ರಿತಿಕ್‌ 14 ಎಂದು ಗುರುತಿಸಲಾಗಿದೆ. 

ಈ ಪಾತಕ ಕೃತ್ಯವು ದರೋಡೆ ಯತ್ನವೆಂಬಂತೆ ಕಂಡು ಬರುತ್ತದೆ ಎಂದಿರುವ ಪೊಲೀಸ್‌ ಸುಪರಿಂಟೆಂಡೆಂಟ್‌ ಮೃಗೇಂದ್ರ ಸಿಂಗ್‌ ಅವರು, “ಹಂತಕರು ಸುನೀಲ್‌ ಅವರ ಮನೆಯನ್ನು ಪ್ರವೇಶಿಸಿ ಆತನನ್ನು  ಗುಂಡಿಕ್ಕಿ ಸಾಯಿಸಿದಾಗ ಮಧ್ಯ ಪ್ರವೇಶಿಸಿದ ಆತನ ಪತ್ನಿ ಮತ್ತು ಮಗನನ್ನು ಕೂಡ ಹಂತಕರು ಗುಂಡಿಕ್ಕಿ ಕೊಂದಿದ್ದಾರೆ’ ಎಂದು ತಿಳಿಸಿದರು.

ಹಂತಕರ ಗುಂಡೇಟಿಗೆ ನೆಲಕ್ಕುರುಳಿದ ಎಲ್ಲ ಮೂವರು ಒಡನೆಯೇ ಸ್ಥಳದಲ್ಲಿ ಮೃತಪಟ್ಟಿದ್ದಾರೆ. ಮನೆಯಲ್ಲಿನ ಸಿಸಿಟಿವಿ ಯಲ್ಲಿ ದಾಖಲಾದ ಚಿತ್ರಿಕೆಗಳನ್ನು ಇದೀಗ ಕ್ರೈಮ್‌ ಬ್ರಾಂಚ್‌ ಪೊಲೀಸರು ಪರಿಶೀಲಿಸುತ್ತಿದ್ದಾರೆ. ಇದರಿಂದ ಹಂತಕರ ತ್ವರಿತ ಪತ್ತೆ ಸಾಧ್ಯವಾಗಬಹುದು ಎಂದು ಎಸ್‌ಪಿ ಮೃಗೇಂದ್ರ ಸಿಂಗ್‌ ಹೇಳಿದ್ದಾರೆ.  

ತ್ರಿವಳಿ ಕೊಲೆಯ ಈ ಘಟನೆಯನ್ನು ಅನುಸರಿಸಿ ಜಿಲ್ಲಾ  ವ್ಯಾಪಾರಿಗಳ ಸಂಘಟನೆಯು ತೀವ್ರ ಪ್ರತಿಭಟನೆ ವ್ಯಕ್ತಪಡಿಸಿ ಬಂದ್‌ಗೆ ಕರೆ ನೀಡಿದೆಯಲ್ಲದೆ ಹಂತಕರನ್ನು ಬೇಗನೆ ಪತ್ತೆ ಹಚ್ಚಿ ಬಂಧಿಸುವಂತೆ ಆಗ್ರಹಿಸಿದೆ.