ಫುಟ್ಬಾಲ್‌ :ಮಹಾರಾಷ್ಟ್ರ ವುಮೆನ್ಸ್‌ ತಂಡದ ವಿಶೇಷ ಸಾಧನೆ

Team Udayavani, Jun 7, 2017, 4:12 PM IST

ಮುಂಬಯಿ: ಆಲ್‌ ಇಂಡಿಯಾ ಫುಟ್ಬಾಲ್‌ ಫೆಡರೇಶನ್‌ ವತಿಯಿಂದ  ಪಂಜಾಬ್‌ನ ಜಾಲಂಧರ್‌ನಲ್ಲಿ ನಡೆದ 22 ನೇ ಸೀನಿಯರ್‌ ವುಮೆನ್ಸ್‌ ನ್ಯಾಶನಲ್‌ ಫುಟ್ಬಾಲ್‌ ಚಾಂಪಿಯನ್‌ಶಿಪ್‌ -2017 ರಲ್ಲಿ   ತುಳು-ಕನ್ನಡಿಗ ಸುಮನ್‌ ಸಾಲ್ಯಾನ್‌ ಅವರ ಸಾರಥ್ಯದ ಮಹಾರಾಷ್ಟ್ರ ವುಮೆನ್ಸ್‌ ಫುಟ್ಬಾಲ್‌ ತಂಡವು 6 ಅಂಕಗಳೊಂದಿಗೆ ವಿಶೇಷ ಸಾಧನೆಗೈದಿದೆ.

ದೇಶದ ವಿವಿಧ ರಾಜ್ಯಗಳ ಸುಮಾರು 27 ವುಮೆನ್ಸ್‌ ಫುಟ್ಬಾಲ್‌ ತಂಡಗಳು ಈ ಪಂದ್ಯಾವಳಿಯಲ್ಲಿ ಪಾಲ್ಗೊಂಡಿದ್ದವು. ಒಟ್ಟು ಎಂಟು ವಿಭಾಗಗಳಲ್ಲಿ ನಡೆದ ಪಂದ್ಯಾಟದಲ್ಲಿ ಕ್ವಾರ್ಟರ್‌ ಫೈನಲ್‌ಗೆ ತೇರ್ಗಡೆಯಾಗಬೇಕಾದರೆ ಎಲ್ಲ ಪಂದ್ಯಗಳನ್ನು ಗೆಲ್ಲಬೇಕಾಗಿತ್ತು. ಸುಮನ್‌ ಸಾಲ್ಯಾನ್‌  ನಾಯಕತ್ವದ ಮಹಾರಾಷ್ಟ್ರ ತಂಡವು ಅಸ್ಸಾಂ ವಿರುದ್ಧ 3-1 ಹಾಗೂ ರಾಜಸ್ಥಾನ ವಿರುದ್ಧ 12-0 ಅಂತರದಲ್ಲಿ ಜಯಗಳಿಸಿ 6 ಅಂಕ ಪಡೆದಿದೆ.

ಈ ವಿಭಾಗದಲ್ಲಿ ಜಾರ್ಖಂಡ್‌ ತಂಡವು 9 ಅಂಕಗಳೊಂದಿಗೆ ಕ್ವಾರ್ಟರ್‌ ಫೈನಲ್‌ ಹಂತಕ್ಕೆ ತೇರ್ಗಡೆಹೊಂದಿತು. ಮಹಾರಾಷ್ಟ್ರ ತಂಡವು ಅಸ್ಸಾಂ ಮತ್ತು ರಾಜಸ್ತಾನ ವಿರುದ್ಧ ಗೆದ್ದರೆ ಜಾರ್ಖಂಡ್‌ ವಿರುದ್ಧ 2-3 ರ ಅಂತರಲ್ಲಿ ಸೋತು ಟೂರ್ನಿಯಿಂದ ಹೊರಗುಳಿಯಬೇಕಾಯಿತು. 

ಮಹಾರಾಷ್ಟ್ರ ತಂಡದಲ್ಲಿ ಕನ್ನಡಿಗ ಮಹಿಳೆಯರಾದ ಸುಮನ್‌ ಸಾಲ್ಯಾನ್‌ ಮತ್ತು ಅದಿತಿ ಶೆಟ್ಟಿ ಅವರು ಉತ್ತಮ ಪ್ರದರ್ಶನ ನೀಡಿದ್ದಾರೆ. ತಂಡವನ್ನು ಹಾಗೂ ಆಟಗಾರರ ಸಾಧನೆಯನ್ನು ಗಣ್ಯರು ಪ್ರಶಂಸಿಸಿದರು.