ಸೂರಂಬೈಲು ಕನ್ನಡ ಮಾಧ್ಯಮ ಶಾಲೆಗೆ ಭವಿಷ್ಯದ ಚಿಂತೆ…!

Team Udayavani, Jun 8, 2017, 4:11 PM IST

ಪುತ್ತೂರು : “ಒಂದನೇ ತರಗತಿಗೆ ಸೇರ್ಪಡೆ ಗೊಳ್ಳಲು 5 ವರ್ಷ 10 ತಿಂಗಳು ತುಂಬಬೇಕು’ ಈ ಕಡ್ಡಾಯ ನಿಯಮದಿಂದ ಕರ್ನಾಟಕ-ಕೇರಳ ಗಡಿಭಾಗದ ಶಾಲೆಯೊಂದು ಭವಿಷ್ಯದಲ್ಲಿ  ಮುಚ್ಚುವ ಶಾಲೆಗಳ ಪಟ್ಟಿಗೆ ಸೇರುವ ಭೀತಿಯಲ್ಲಿದೆ!

ಇಂತಹ ಆತಂಕ ಎದುರಿಸುತ್ತಿರುವುದು ಗಡಿ ಪ್ರದೇಶದ ಪಾಣಾಜೆ ಗ್ರಾಮದ ಸೂರಂಬೈಲು ಸರಕಾರಿ ಕನ್ನಡ ಮಾಧ್ಯಮ ಶಾಲೆ. ಹೊಸ ನಿಯಮ ಪರಿಣಾಮ 1ನೇ ತರಗತಿಗೆ ಏಕ ವಿದ್ಯಾರ್ಥಿ ಮಾತ್ರ ದಾಖಲಾತಿಗೆ ಅರ್ಹತೆ ಹೊಂದಿದ್ದಾನೆ. ಗ್ರಾಮದಲ್ಲಿ 5 ವರ್ಷದಾಟಿದ 6ಕ್ಕೂ ಅಧಿಕ ಮಕ್ಕಳಿದ್ದರೂ ಸೇರ್ಪಡೆಗೆ ನಿಯಮ ಅಡ್ಡಿಯೆನಿಸಿದೆ.

ಗಡಿನಾಡ ಶಾಲೆ
ಪಾಣಾಜೆ ಗ್ರಾಮದ ಆರ್ಲಪದವಿನಿಂದ 3 ಕಿ.ಮೀ. ದೂರದಲ್ಲಿ, ಏರು ಪ್ರದೇಶದಲ್ಲಿರುವ ಸೂರಂಬೈಲು ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆ ಕೇರಳ- ಕರ್ನಾಟಕದ ಗಡಿ ಭಾಗದಲ್ಲಿದೆ. ಶಾಲೆಯಿಂದ ತುಸು ದೂರದಲ್ಲಿ ಕೇರಳ ರಾಜ್ಯಕ್ಕೆ ಸೇರಿದ ಸ್ವರ್ಗ ಪ್ರದೇಶವಿದೆ. ಗಡಿ ಗ್ರಾಮದ ವಿದ್ಯಾರ್ಥಿಗಳಿಗೆ ಈ ಶಾಲೆ ಉಪಯುಕ್ತವೂ ಹೌದು. 1959ರಲ್ಲಿ ಸ್ಥಾಪನೆಗೊಂಡ ಈ ಸರಕಾರಿ ಶಾಲೆಗೆ 58 ವರ್ಷ ಸಂದಿದೆ.

ಈ ಬಾರಿ ದಾಖಲಾತಿಗೆ ಹೊಸ ನಿಯಮ ಅಡ್ಡಿ ಉಂಟು ಮಾಡಿದೆ. ಬಹುತೇಕ ಶಾಲೆಗಳ ವ್ಯಾಪ್ತಿಯಲ್ಲಿ ಮಕ್ಕಳು ಇಲ್ಲ ಎಂಬ ಸಮಸ್ಯೆಯಿದ್ದರೆ, ಈ ಊರಲ್ಲಿ ಮಕ್ಕಳು ಇದ್ದರೂ, ಶಾಲೆಗೆ ಸೇರಿಸುವಂತಿಲ್ಲ. ಹಾಗಾಗಿ ಮಕ್ಕಳ ಹೆತ್ತವರು ಈ ನಿಯಮದಿಂದ ಮಕ್ಕಳನ್ನು ಸೇರಿಸಲಾಗದ ಸಮಸ್ಯೆಗೆ ಸಿಲುಕಿದ್ದಾರೆ. ಜತೆಗೆ ಭವಿಷ್ಯದಲ್ಲಿ ಮಕ್ಕಳು ಬಾರದೆ ಗಡಿನಾಡ ಶಾಲೆ ಮುಚ್ಚುವ ಆತಂಕವೂ ವ್ಯಕ್ತವಾಗಿದೆ.

ಮಕ್ಕಳ ಸಂಖ್ಯೆ ಕುಸಿತ
ಇಲ್ಲಿ 1ರಿಂದ 7ನೇ ತರಗತಿ ತನಕ ಒಟ್ಟು ಇರುವ ಮಕ್ಕಳ ಸಂಖ್ಯೆ-34. ಈ ಬಾರಿ ಒಂದನೇ ತರಗತಿ ಯಲ್ಲಿ ಓರ್ವ ವಿದ್ಯಾರ್ಥಿ ಮಾತ್ರ ಇದ್ದಾನೆ. 2ನೇ ತರಗತಿಯಲ್ಲಿ – 7, 3ನೇ ತರಗತಿಯಲ್ಲಿ-8, 4ನೇ ತರಗತಿಯಲ್ಲಿ -5, 5ನೇ ತರಗತಿಯಲ್ಲಿ- 3, 6ನೇ ತರಗತಿಯಲ್ಲಿ-4, 7ನೇ ತರಗತಿಯಲ್ಲಿ – 6 ವಿದ್ಯಾರ್ಥಿಗಳಿದ್ದಾರೆ. ಪರಿಶಿಷ್ಟ ವರ್ಗಕ್ಕೆ ಸೇರಿದ ಕುಟುಂಬಗಳ ಮಕ್ಕಳು ಇಲ್ಲಿ ಅಧಿಕ ಸಂಖ್ಯೆಯಲ್ಲಿ ದ್ದಾರೆ. 

ನಿಯಮ ಬದಲಾಯಿಸಿ 
ಹೊಸ ನಿಯಮದಿಂದ ಮಕ್ಕಳು ಶಾಲೆಗೆ ಸೇರುವ ಪರಿಸ್ಥಿತಿಯಿಲ್ಲ. ಮೊದಲೆ ಸರಕಾರಿ ಶಾಲೆಗಳಲ್ಲಿ ಮಕ್ಕಳ ಕೊರತೆ ಇದೆ. ವಯಸ್ಸಿನ ಮಿತಿ ಕಡ್ಡಾಯ ಜಾರಿಯಿಂದ ಈ ಸಮಸ್ಯೆ ಇನ್ನಷ್ಟು ಉದ್ಭವಿಸಿದೆ. ಈ ಹಿಂದೆ ಇದ್ದಂತೆ 5 ವರ್ಷಕ್ಕಿಂತ ಮೇಲ್ಪಟ್ಟವರಿಗೆ ದಾಖಲಾತಿಗೆ ಅವಕಾಶ ನೀಡಬೇಕು. ಇಲ್ಲದಿದ್ದರೆ ಸೂರಂಬೈಲು ಮೊದಲಾದ ಗಡಿನಾಡಿನ ಶಾಲೆಗಳು ಮುಚ್ಚುವ ಪಟ್ಟಿಗೆ ಸೇರಬಹುದು.
– ನಾರಾಯಣ ಪೂಜಾರಿ,
ಅಧ್ಯಕ್ಷರು, ಪಾಣಾಜೆ, ಗ್ರಾ.ಪಂ.

– ಕಿರಣ್‌ ಪ್ರಸಾದ್‌ ಕುಂಡಡ್ಕ