ಅಮ್ಮನಿಗೆ ಸರ್ಕಾರಿ ಗೌರವ ಕೊಟ್ಟಿದ್ದು ಸರಿ

Team Udayavani, Jun 10, 2017, 11:26 AM IST

ಇತ್ತೀಚೆಗಷ್ಟೇ ನಿಧನರಾದ ಹಿರಿಯ ನಿರ್ಮಾಪಕಿ ಪಾರ್ವತಮ್ಮ ರಾಜಕುಮಾರ್‌ ಅವರಿಗೆ ಸರ್ಕಾರಿ ಗೌರವ ಕೊಟ್ಟಿದ್ದು, ಅವರ ಅಂತ್ಯಕ್ರಿಯೆಗೆ ಕಂಠೀರವ ಸ್ಟುಡಿಯೋದಲ್ಲಿ ಸರ್ಕಾರ ಜಾಗ ಕೊಟ್ಟಿದ್ದರ ಕುರಿತು ಸೋಷಿಯಲ್‌ ಮೀಡಿಯಾದಲ್ಲಿ ಸಾಕಷ್ಟು ಚರ್ಚೆಯಾಗಿದೆ. ಅದೆಷ್ಟು ಸರಿ, ತಪ್ಪು ಎಂದು ಟೀಕೆ ಮಾಡಲಾಗಿದೆ.

ಈ ಕುರಿತು ಶಿವರಾಜಕುಮಾರ್‌ ಅವರನ್ನು ಕೇಳಿದರೆ, ತಮ್ಮ ಪ್ರಕಾರ ಅದು ಸರಿ ಎನ್ನುತ್ತಾರೆ. ಶುಕ್ರವಾರ ನಡೆದ ಪಾರ್ವತಮ್ಮ ಶ್ರದ್ಧಾಂಜಲಿ ಸಭೆಯ ನಂತರ ಮಾತನಾಡಿದ ಅವರು, “ಒಬ್ಬೊಬ್ಬರದ್ದು ಒಂದೊಂದು ಅಭಿಪ್ರಾಯವಿರುತ್ತದೆ. ಹಾಗಾಗಿ ಈ ತರಹದ ಚರ್ಚೆಗಳೆಲ್ಲಾ ಸಹಜ. ನನ್ನನ್ನು ಈ ಕುರಿತು ಕೇಳಿದರೆ, ಸರಿ ಎನ್ನುತ್ತೇನೆ.

ಏಕೆಂದರೆ, ಕನ್ನಡ ಚಿತ್ರರಂಗಕ್ಕೆ ಅವರು ಅಪಾರ ಕೊಡುಗೆ ನೀಡಿದವರು. ಚಿತ್ರರಂಗಕ್ಕೆ ಸಂಬಂಧಿಸಿದ ಹೋರಾಟಗಳಲ್ಲದೆ, ಗೋಕಾಕ್‌ ಚಳವಳಿಯಲ್ಲಿ ಭಾಗವಹಿಸಿದವರು. ಒಬ್ಬ ಮಹಿಳೆಯಾಗಿ ಸಾಕಷ್ಟು ಸಾಧನೆ ಮಾಡಿದ್ದಾರೆ. ಅವರ ಕೊಡುಗೆಯನ್ನು ನೋಡಿ ಸರ್ಕಾರ ಈ ನಿರ್ಧಾರ ಕೈಗೊಂಡಿದೆ. ನನ್ನ ಪ್ರಕಾರ ಇದು ಸರಿ’ ಎಂದರು ಶಿವರಾಜಕುಮಾರ್‌.