ಮೂರು ದಶಕದ ಚಿತ್ರಮಂದಿರ ಸುತ್ತ ಚರಂಡಿ ಹೂಳಿನ ಹುತ್ತ

Team Udayavani, Jun 19, 2017, 3:54 PM IST

ವಾಡಿ: ಹೊಸ ಹೊಸ ಚಲನಚಿತ್ರ ಪ್ರದರ್ಶಿಸುವ ಮೂಲಕ ಜನರಿಗೆ ಮನರಂಜನೆ ನೀಡುತ್ತಿದ್ದ ಸ್ಥಳೀಯ ಕಿಸ್ಮತ್‌ ಚಲನಚಿತ್ರ ಮಂದಿರದ ಸುತ್ತ ಭಾರಿ ಪ್ರಮಾಣದ ಚರಂಡಿ ಹೂಳು ಸುತ್ತುವರಿದಿದ್ದು, ಕಳೆದ ಒಂದು ವಾರದಿಂದ ಚಿತ್ರ ಪ್ರದರ್ಶನ ಸ್ಥಗಿತಗೊಂಡಿದೆ. 

ಗುರುವಾರ ಸುರಿದ ಭಾರಿ ಮಳೆಯಿಂದ ನಗರದ ವಿವಿಧ ಬಡಾವಣೆ ಘನತ್ಯಾಜ್ಯ ಚರಂಡಿ ಮೂಲಕ ಹರಿದು ಚಲನಚಿತ್ರ ಮಂದಿರ ಆವರಣಕ್ಕೆ ನುಗ್ಗಿದ್ದು, ಇಡೀ ಚಿತ್ರಮಂದಿರ ಚರಂಡಿ ಹೂಳಿನಲ್ಲಿ ಮುಳುಗಿ ಹೋಗಿದೆ. ಕಳೆದ ಒಂದು ವಾರದಿಂದ ಮಡುಗಟ್ಟಿ ನಿಂತಿರುವ ಕೊಳೆ  ನೀರು ಹಸಿರು ಪಾಚಿಗೆ ತಿರುಗಿದ್ದು, ರೋಗಾಣುಗಳ ತಾಣವಾಗಿ ಬದಲಾಗಿದೆ.

ಸಿನಿಮಾ ನೋಡಲು ಬರುತ್ತಿದ್ದ ಪಟ್ಟಣ ಸೇರಿದಂತೆ ಸುತ್ತಲ ಗ್ರಾಮಗಳ ಚಿತ್ರಪ್ರೇಮಿಗಳು, ಮನರಂಜನಾ ಕೇಂದ್ರದ ಸುತ್ತ ನೆಲೆನಿಂತ ಚರಂಡಿಯ ಗಬ್ಬು ನೀರಿನ ವಾಸನೆಯಿಂದ ದೂರವೇ ಉಳಿಯುತ್ತಿದ್ದಾರೆ. ಚಿತ್ರಮಂದಿರದತ್ತ ಇಷ್ಟೊಂದು ದೊಡ್ಡ  ಪ್ರಮಾಣದಲ್ಲಿ ಕೊಳೆ ಹರಿದು ಬರಲು ಪುರಸಭೆ ಅಧಿಕಾರಿಗಳು ನಿರ್ಮಿಸಿದ ಅವೈಜ್ಞಾನಿಕ ಚರಂಡಿಗಳೇ ಕಾರಣ ಎಂದು ಚಿತ್ರಮಂದಿರದ ವಾರಸುದಾರ ಸುಭಾಷ ವರ್ಮಾ ಆರೋಪಿಸುತ್ತಾರೆ. 

ಕಿಸ್ಮತ್‌ ಚಿತ್ರಮಂದಿರ ಮೂರು ದಶಕದಷ್ಟು ಹಳೆಯದಾಗಿದೆ. ಇದರ ದುಸ್ಥಿತಿಗೆ ಕಟ್ಟಡದ ಮಾಲಿಕರೇ ಕಾರಣ ಎನ್ನುವುದು ಪುರಸಭೆ ಅಧಿ ಕಾರಿಗಳ  ವಾದವಾಗಿದೆ. ಇಬ್ಬರ ವಾದ ವಿವಾದಗಳ ಮಧ್ಯೆ ಸಮಸ್ಯೆ ಕಳೆದ ಐದಾರು ವರ್ಷಗಳಿಂದ ಜೀವಂತವಾಗಿದೆ. ಆಸುಪಾಸಿನಲ್ಲಿ ವಾಸಿಸುವ ಸಾರ್ವಜನಿಕರು ಅನಾರೋಗ್ಯ ವಾತಾವರಣದಲ್ಲಿ ಬದುಕುವಂತಾಗಿದೆ.

ಚಲನಚಿತ್ರ ಮಂದಿರದ ಸುತ್ತ ನೈರ್ಮಲ್ಯ ವ್ಯವಸ್ಥೆ ಹದಗೆಟ್ಟಿದ್ದು, ಹಲವು ಕುಟುಂಬಗಳಿಗೆ ರೋಗದ ಭೀತಿ ಎದುರಾಗಿದೆ. ಆರೋಗ್ಯ  ಇಲಾಖೆ ಅಧಿ ಕಾರಿಗಳು ಮಧ್ಯ ಪ್ರವೇಶಿಸುವ ಮೂಲಕ ಆರೋಗ್ಯಪೂರಿತ ವಾತಾವರಣ ಮರುಸ್ಥಾಪಿಸಲು ಮುಂದಾಗಬೇಕು ಎಂದು ಸ್ಥಳೀಯರು ಆಗ್ರಹಿಸಿದ್ದಾರೆ.

* ಮಡಿವಾಳಪ್ಪ ಹೇರೂರ