ಪಿಂಚಣಿ ಹಣ ತಂದ್ರೆ “ಕೈ’ಗೆ ಸನ್ಮಾನ

Team Udayavani, Jun 26, 2017, 3:50 PM IST

ಹುಬ್ಬಳ್ಳಿ: ಅವಳಿನಗರದ ಅಭಿವೃದ್ಧಿ ಕಾಮಗಾರಿಗಳಿಗೆ ಬಿಜೆಪಿ ಸಾವಿರಾರು ಕೋಟಿ ರೂ. ಅನುದಾನ ತಂದಿದ್ದು, ಜಿಲ್ಲಾ ಉಸ್ತುವಾರಿ ಸಚಿವ ಸೇರಿದಂತೆ ಕಾಂಗ್ರೆಸ್‌ ನವರು ಪಾಲಿಕೆಯ ನಿವೃತ್ತ ನೌಕರರ 105 ಕೋಟಿ ರೂ. ಪಿಂಚಣಿ ಬಾಕಿ ಹಣವನ್ನು ಎರಡು ತಿಂಗಳೊಳಗೆ ತೆಗೆದುಕೊಂಡು ಬರಲಿ ಸಾಕು. ಅವರನ್ನು ಬಿಜೆಪಿಯಿಂದ ಸನ್ಮಾನಿಸಲಾಗುವುದು ಎಂದು ವಿಧಾನಸಭೆ ವಿಪಕ್ಷ ನಾಯಕ ಜಗದೀಶ ಶೆಟ್ಟರ ಸವಾಲು ಹಾಕಿದರು. 

ಇಲ್ಲಿನ ದೇಶಪಾಂಡೆ ನಗರದ ಶ್ರೀಕೃಷ್ಣ ಕಲ್ಯಾಣ ಮಂಟಪದಲ್ಲಿ ರವಿವಾರ ಹಮ್ಮಿಕೊಂಡಿದ್ದ ಹು-ಧಾ ಬಿಜೆಪಿ ಕೇಂದ್ರವಿಧಾನಸಭಾ ಕ್ಷೇತ್ರದ ವಾರ್ಡ್‌ ನಂ.  46ರ ಸಮಾವೇಶ ಉದ್ಘಾಟಿಸಿ ಅವರು ಮಾತನಾಡಿದರು.  ಪಾಲಿಕೆಯ ನಿವೃತ್ತ ನೌಕರರಿಗೆ ರಾಜ್ಯ ಸರಕಾರ ಪಿಂಚಣಿ ಹಣ ನೀಡಬೇಕು. ಆದರೆ, ಕಳೆದ 3 ವರ್ಷಗಳಿಂದ ಕೊಡುತ್ತಿಲ್ಲ. ಪಾಲಿಕೆಯು ಎಸ್‌ಎಫ್‌ಸಿ ಅನುದಾನದಲ್ಲಿಯೇ ಹಣ ನೀಡುತ್ತಿದೆ.

ಇದರಿಂದ ನಿರ್ವಹಣೆಗೆ ತುಂಬಾ ಸಮಸ್ಯೆ ಆಗುತ್ತಿದೆ. ಅವಳಿ ನಗರದ ಅಭಿವೃದ್ಧಿ ಕಾಮಗಾರಿಗೆ ಕಾಂಗ್ರೆಸ್‌ನವರು ಸಾವಿರಾರು ಕೋಟಿ ರೂ. ತರುವುದರ ಬಗ್ಗೆ ಚಿಂತಿಸುವುದು ಬಿಡಲಿ. ಅದನ್ನು ನಾವು ಮಾಡುತ್ತೇವೆ. ಅವರು ಪಾಲಿಕೆಯ ನಿವೃತ್ತ ನೌಕರರ ಪಿಂಚಣಿ ಹಣ ತರುವುದನ್ನಷ್ಟೆ ಮಾಡಲಿ ಎಂದು ಕುಟುಕಿದರು. ಗದಗನಲ್ಲಿ 45 ದಿನಕ್ಕೊಮ್ಮೆ ಹಾಗೂ ವಿಜಯಪುರದಲ್ಲಿ 30 ದಿನಕ್ಕೊಮ್ಮೆ ನೀರು ಪೂರೈಕೆಯಾಗುತ್ತಿದೆ.

ನೀರು ಇಲ್ಲವೆಂಬ ಕಾರಣಕ್ಕೆ ಮಹಿಳಾ ವಿವಿಗೆ 3 ದಿನ ರಜೆ ನೀಡಲಾಯಿತು. ರಾಜ್ಯದಲ್ಲಿ ಭೀಕರ ಬರಗಾಲವಿದ್ದರೂ, ದುಮ್ಮವಾಡ ಕೆರೆ ಬತ್ತಿದ್ದರೂ ಅವಳಿ ನಗರದ ಜನತೆಗೆ 4-5 ದಿನಕ್ಕೊಮ್ಮೆ ನೀರು ಒದಗಿಸಲಾಗುತ್ತಿದೆ. ಇಂದಿನಿಂದ 46ನೇ ವಾರ್ಡ್‌ನಲ್ಲಿ ಪ್ರಾಯೋಗಿಕವಾಗಿ ಪ್ರತಿದಿನ 3-4 ತಾಸು ನೀರು ಸರಬರಾಜು ಮಾಡಲಾಗುತ್ತದೆ. ಒಂದು ತಿಂಗಳ ನಂತರ ನಿರಂತರ ನೀರು ಪೂರೈಕೆಯಾಗಲಿದೆ ಎಂದರು.

ಅವಳಿ ನಗರದ ರಸ್ತೆಗಳ ಸುಧಾರಣೆಗಾಗಿ ಕೇಂದ್ರ ಸರಕಾರದಿಂದ 368 ಕೋಟಿ ರೂ. ವಿಶೇಷ ಅನುದಾನ ತರಲಾಗಿದೆ. ರಾಜ್ಯದಲ್ಲೆ ಮಹಾನಗರ ಪಾಲಿಕೆಗೆ ಇಷ್ಟೊಂದು ಪ್ರಮಾಣದಲ್ಲಿ ಸಿಆರ್‌ಎಫ್‌ ಸಿಕ್ಕಿದ್ದು ಹು-ಧಾ ಪಾಲಿಕೆಗೆ ಮಾತ್ರ. 220 ಕೋಟಿ ರೂ. ವೆಚ್ಚದಲ್ಲಿ ಸಿಸಿ ರಸ್ತೆಗಳನ್ನು ನಿರ್ಮಿಸಲಾಗುತ್ತಿದೆ.

ಇನ್ನು 15 ದಿನದಲ್ಲಿ ದೇಸಾಯಿ ಕ್ರಾಸ್‌ನಿಂದ ಬೈಲಪ್ಪನವರ ನಗರ, ಕಿಮ್ಸ್‌ ಹಿಂಭಾಗ, ಲೋಕಪ್ಪನ ಹಕ್ಕಲ ಮಾರ್ಗವಾಗಿ ವಿದ್ಯಾನಗರ ವರೆಗೆ 50 ಕೋಟಿ ರೂ. ವೆಚ್ಚದಲ್ಲಿ ಸಿಸಿ ರಸ್ತೆಗೆ ಚಾಲನೆ ನೀಡಲಾಗುವುದು. ನಿಲಿಜಿನ್‌ ರಸ್ತೆ ಸೇರಿದಂತೆ ಕಾಟನ್‌ ಮಾರ್ಕೆಟ್‌ನ ಎಲ್ಲ ರಸ್ತೆಗಳು ಸಿಸಿ ರಸ್ತೆಗಳಾಗಲಿವೆ. 

ವಿದ್ಯಾನಗರದ ಕಾಡಸಿದ್ದೇಶ್ವರ ಕಾಲೇಜು ಎದುರಿನ ರಸ್ತೆಯಿಂದ ತೋಳನಕೆರೆ ವರೆಗಿನ 2 ಕಿಮೀ ರಸ್ತೆಯನ್ನು ಟೆಂಡರ್‌ ಸುರ್‌ ಮಾದರಿ ರಸ್ತೆ ಮಾಡಲಾಗುವುದು. ಇವಕ್ಕೆ ಒಂದು ತಿಂಗಳೊಳಗೆ ಚಾಲನೆ ನೀಡಲಾಗುವುದು. ಮುಂದಿನ ಹಂತದಲ್ಲಿ ತೋಳನಕೆರೆಯಿಂದ ಗೋಕುಲ ರಸ್ತೆಯ ರಾಧಾಕೃಷ್ಣ ನಗರ ವರೆಗೆ ಮಾದರಿ ರಸ್ತೆ ಮಾಡಲಾಗುವುದು.

ಬಿಜೆಪಿಯವರ ಪ್ರಯತ್ನದಿಂದಲೇ ಹು-ಧಾಗೆ ಸ್ಮಾರ್ಟ್‌ ಸಿಟಿ ಭಾಗ್ಯ ಲಭಿಸಿದೆ. ನಗರದಲ್ಲಿ ನಿರ್ಮಾಣವಾದ ಅಂತಾರಾಷ್ಟ್ರೀಯ ಮಟ್ಟದ ವಿಮಾನ ನಿಲ್ದಾಣವನ್ನು ಪ್ರಧಾನಿ ಮೋದಿ ಅವರಿಂದ ಚಾಲನೆ ನೀಡಲು ಯೋಚಿಸಲಾಗಿದೆ. ವಾರ್ಡ್‌ ನಂ. 46 ಬಿಜೆಪಿಯ ಶಕ್ತಿ ಕೇಂದ್ರವಾಗಿದೆ ಎಂದರು. 

ವಿಧಾನ ಪರಿಷತ್‌ ಸದಸ್ಯ ಪ್ರದೀಪ ಶೆಟ್ಟರ ಮಾತನಾಡಿ, ವಿಧಾನಸಭೆ ವಿಪಕ್ಷ ನಾಯಕ ಜಗದೀಶ ಶೆಟ್ಟರ ಅವರು ಅಭಿವೃದ್ಧಿಯ ಹರಿಕಾರ ಆಗಿದ್ದಾರೆ  ಎಂದರು. ಮಹಾಪೌರ ಡಿ.ಕೆ. ಚಹಾಣ, ಶಂಕರಣ್ಣ ಮುನವಳ್ಳಿ, ಲಿಂಗರಾಜ ಪಾಟೀಲ, ವೀರಭದ್ರಪ್ಪ ಹಾಲಹರವಿ, ನಾಗೇಶ ಕಲಬುರ್ಗಿ, ಮಲ್ಲಿಕಾರ್ಜುನ ಸಾವಕಾರ, ಮೀನಾಕ್ಷಿ ಒಂಟಮೂರಿ, ವಿಜಯಾನಂದ ಹೊಸಕೋಟಿ, ಲಕ್ಷ್ಮೀ ಉಪ್ಪಾರ, ವಸಂತ ನಾಡಜೋಶಿ, ರಾಜು ಕಾಳೆ, ಶಿಲ್ಪಾ ಶೆಟ್ಟರ ಇತರರಿದ್ದರು.

ಪಾಲಿಕೆ ಸದಸ್ಯೆ ಲೀನಾ ಮಿಸ್ಕಿನ ಅಧ್ಯಕ್ಷತೆ ವಹಿಸಿದ್ದರು. ತಿಪ್ಪಣ್ಣ ಮಜ್ಜಗಿ ಪ್ರಾಸ್ತಾವಿಕ ಮಾತನಾಡಿದರು. ಕೃಷ್ಣಾ ಗಂಡಗಾಳೇಕರ ನಿರೂಪಿಸಿದರು. ಸಮಾವೇಶಕ್ಕೂ ಮೊದಲು ಜಗದೀಶ ಶೆಟ್ಟರ ಅವರು ದೇಶಪಾಂಡೆ ನಗರದ ಬಾಳಿಗಾ ವೃತ್ತದಲ್ಲಿ ವಾರ್ಡ್‌ ನಂ. 46ರ 24/7 ನೀರು ಸರಬರಾಜು ಯೋಜನೆ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದರು.