ಬ್ಯಾಟಿಂಗ್‌ ವೇಳೆ ಚಾಂಪಿಯನ್ಸ್‌ ಟ್ರೋಫಿ ಜರ್ಸಿ ಧರಿಸಿದ್ದ ಯುವರಾಜ್‌

Team Udayavani, Jun 27, 2017, 3:45 AM IST

ಪೋರ್ಟ್‌ ಆಫ್ ಸ್ಪೇನ್‌: ವೆಸ್ಟ್‌ಇಂಡೀಸ್‌ ವಿರುದ್ಧದ ದ್ವಿತೀಯ ಏಕದಿನ ಪಂದ್ಯದಲ್ಲಿ ಯುವರಾಜ್‌ ಸಿಂಗ್‌ ಅವರು ಚಾಂಪಿಯನ್ಸ್‌ ಟ್ರೋಫಿಯ ಜರ್ಸಿ ಧರಿಸಿ ಬ್ಯಾಟಿಂಗ್‌ ಮಾಡಿರುವುದು ನೆರೆದ ಪ್ರೇಕ್ಷಕರನ್ನು ಆಶ್ಚರ್ಯಗೊಳಿಸಿತು.

ಯುವರಾಜ್‌ ಕ್ರೀಸ್‌ಗೆ ಆಗಮಿಸಿದಾಗ ಎಲ್ಲರ ಗಮನ ಅವರ ಕಡೆ ತಿರುಗುತ್ತದೆ. ಹಾಗೆಯೇ ದ್ವಿತೀಯ ಏಕದಿನ ಪಂದ್ಯದ ವೇಳೆಯೂ ಅವರು ಬ್ಯಾಟಿಂಗ್‌ಗೆ ಬಂದಾಗ ಎಲ್ಲರೂ ಆಶ್ಚರ್ಯಪಡುವಂತಾಯಿತು. ಕಾರಣ ಅವರು ಚಾಂಪಿಯನ್ಸ್‌ ಟ್ರೋಫಿಯ ಜರ್ಸಿ ಧರಿಸಿದ್ದರು.

ಇಂಡಿಯನ್‌ ಮ್ಯಾನೇಜ್‌ಮೆಂಟ್‌ ಪ್ರತಿಯೊಂದು ಸರಣಿ ವೇಳೆ ಆಟಗಾರರಿಗೆ ಹೊಸ ಜರ್ಸಿ ನೀಡುತ್ತದೆ. ಹಿಂದಿನ ಸರಣಿಯಲ್ಲಿ ಉಪಯೋಗಿಸಿದ ಜರ್ಸಿಯನ್ನು ಆಟಗಾರರು ಧರಿಸುವುದು ಅಪರೂಪ. ಆದರೆ ಯುವರಾಜ್‌ ಹಾಗೇ ಮಾಡಿ ಗಮನ ಸೆಳೆಯುವಂತೆ ಮಾಡಿದರು. ಅವರು ಯಾಕೆ ಹಾಗೇ ಮಾಡಿದರೆಂದು ತಿಳಿದಿಲ್ಲ. ಪ್ರಮಾದವಶಾತ್‌ ಈ ರೀತಿ ಆಗಿರಬಹುದೆಂದು ಭಾವಿಸಲಾಗಿದೆ.

ಆದರೆ ಫೀಲ್ಡಿಂಗ್‌ ಮಾಡಲು ಅಂಗಣಕ್ಕೆ ಆಗಮಿಸಿದ ವೇಳೆ ಯುವರಾಜ್‌ ಸರಿಯಾದ ಜರ್ಸಿ ಧರಿಸಿದ್ದರು.