ವಿ.ಪಿ.ಸಿಂಗ್‌ ಸರಕಾರವಿದ್ದಾಗ ರಾಮಮಂದಿರ ನಿರ್ಣಯ ಏನಾಗಿತ್ತು? 

Team Udayavani, Jun 30, 2017, 3:45 AM IST

ಉಡುಪಿ:  ವಿ.ಪಿ.ಸಿಂಗ್‌ ಪ್ರಧಾನಿ ಯಾಗಿದ್ದಾಗ ಅಯೋಧ್ಯೆಯಲ್ಲಿ ರಾಮಮಂದಿರ ನಿರ್ಮಾಣ ಮಾಡುವ ಕುರಿತು ಸಭೆ ಜರಗಿತ್ತು. ಆಗ ನಾನೂ ಭಾಗವಹಿಸಿದ್ದೆ. ಆಗ ಹಿಂದೂಗಳು ಮತ್ತು ಮುಸ್ಲಿಮ್‌ ಪ್ರಮುಖರು ಸಭೆ ಸೇರಿ ವಾರದಲ್ಲಿ ಒಂದು ದಿನ ನಮಾಜು ಮಾಡಲು ಹಿಂದು ಪ್ರಮುಖರು ಒಪ್ಪಿಗೆ ನೀಡಿದ್ದರು. ಕೊನೆಗೆ ಸರಕಾರ ಬಿದ್ದು ಹೋಗಿ ಪ್ರಸ್ತಾವವೂ ಬಿದ್ದು ಹೋಯಿತು. ಆಗ ದೇವಸ್ಥಾನದೊಳಗೇ ನಮಾಜು ಮಾಡಲು ಒಪ್ಪಿಗೆ ನೀಡಲಾಗಿತ್ತು. ಈಗ ನಾನು ಅವಕಾಶ ಮಾಡಿಕೊಟ್ಟದ್ದು ಕೃಷ್ಣಮಠದ ಹೊರ ಆವರಣದಲ್ಲಿ ಎಂದು ಪರ್ಯಾಯ ಶ್ರೀ ಪೇಜಾವರ ಮಠದ ಶ್ರೀ ವಿಶ್ವೇಶತೀರ್ಥ ಶ್ರೀಪಾದರು ಹೇಳಿದ್ದಾರೆ. 

ಗುರುವಾರ ಸುದ್ದಿಗಾರರು ಶ್ರೀರಾಮಸೇನೆಯ ನಾಯಕರ ಪ್ರಶ್ನೆಯನ್ನು ಮುಂದಿಟ್ಟಾಗ ಶ್ರೀಪಾದರು ಮೇಲಿನಂತೆ ಉತ್ತರಿಸಿದರು. ಇದಕ್ಕಿಂತ ಹೆಚ್ಚು ಎಲ್ಲರ ಪ್ರಶ್ನೆಗಳಿಗೆ ಉತ್ತರಿಸುವುದಿಲ್ಲ ಎಂದರು. 

ಪ್ರಮೋದ್‌ ಮುತಾಲಿಕ್‌ ಅವರು ಹಿಂದೂಗಳೂ ಗೋಮಾಂಸ ಭಕ್ಷಣೆ ಮಾಡುತ್ತೀರೆಂಬ ಬಗೆಗೆ ಆಕ್ಷೇಪ ಮಾಡಿದ್ದಾರಲ್ಲ ಎಂದು ಪ್ರಶ್ನಿಸಿದಾಗ ಇದನ್ನು ಅರಿವಿದ್ದೇ ಹೇಳಿದ್ದೇನೆ ಎಂದರು. ಗುರುವಾರ ಬಿಜೆಪಿ ರಾಷ್ಟ್ರೀಯ ಸಹಸಂಘಟನಾ ಕಾರ್ಯದರ್ಶಿ ಸಂತೋಷ್‌ ಅವರು ಭೇಟಿ ಮಾಡಿ ಶ್ರೀಪಾದರ ಜೊತೆ ಚರ್ಚೆ ನಡೆಸಿದರು. 

ಎಂದಿನಂತೆ ಚಟುವಟಿಕೆ: ಬುಧವಾರ ಬಿದ್ದು ಭುಜ ಸ್ವಲ್ಪ ಗಾಯಗೊಂಡಿದ್ದ ಶ್ರೀಪಾದರು ಬುಧ ವಾರದಂತೆ ಗುರುವಾರವೂ ಪೂಜೆ, ಪ್ರಸಾದ ವಿತರಣೆ, ವಿದ್ಯಾರ್ಥಿಗಳಿಗೆ ಶಾಸ್ತ್ರ ಪಾಠಗಳನ್ನು ನಡೆಸಿದರು.