ಆಧಾರ್‌ ನೋಂದಣಿ ಕೇಂದ್ರಗಳು ಇನ್ನು ಸರ್ಕಾರಿ ಕಟ್ಟಡಗಳಿಗೆ ಶಿಫ್ಟ್

Team Udayavani, Jul 3, 2017, 3:45 AM IST

ನವದೆಹಲಿ: ಸೆಪ್ಟೆಂಬರ್‌ ವೇಳೆಗೆ ಎಲ್ಲ ಆಧಾರ್‌ ನೋಂದಣಿ ಕೇಂದ್ರಗಳೂ ಸರ್ಕಾರಿ ಕಟ್ಟಡಗಳ ಮುಂದೆ ಶಿಫ್ಟ್ ಆಗಲಿವೆ.
ಭಾರತೀಯ ವಿಶಿಷ್ಟ ಗುರುತಿನ ಚೀಟಿ ಪ್ರಾಧಿಕಾರವೇ ಇಂತಹುದೊಂದು ಆದೇಶ ಹೊರಡಿಸಿದೆ. ಖಾಸಗಿ ಏಜೆನ್ಸಿಗಳು ಸೇರಿದಂತೆ ಆಧಾರ್‌ ನೋಂದಣಿ ಮಾಡುವಂಥ ಎಲ್ಲ ಕೇಂದ್ರಗಳನ್ನೂ ಸರ್ಕಾರಿ ಕಟ್ಟಡಗಳು, ಪಾಲಿಕೆ ಕಟ್ಟಡಗಳು, ಜಿಲ್ಲಾ ಪರಿಷತ್‌ ಅಥವಾ ಜಿಲ್ಲಾಧಿಕಾರಿ ಕಚೇರಿಯ ಆವರಣಕ್ಕೆ ವರ್ಗಾಯಿಸಬೇಕು. ಸೆಪ್ಟೆಂಬರ್‌ವೊಳಗೆ ಈ ಕಾರ್ಯ ಪೂರ್ಣಗೊಳ್ಳಬೇಕು ಎಂದು ಆದೇಶದಲ್ಲಿ ತಿಳಿಸಲಾಗಿದೆ.

ದೇಶದಲ್ಲಿರುವ 25 ಸಾವಿರ ಆಧಾರ್‌ ನೋಂದಣಿ ಕೇಂದ್ರಗಳ ಮೇಲೆ ಈ ಸೂಚನೆಯು ಪರಿಣಾಮ ಬೀರಲಿದೆ ಎಂದು ಹೇಳಲಾಗಿದೆ. ಖಾಸಗಿ ಏಜೆನ್ಸಿಗಳು ಆಧಾರ್‌ ಮಾಡಿಕೊಡಲು ಮತ್ತು ತಿದ್ದುಪಡಿಗೆ ಜನರಿಂದ ಹೆಚ್ಚುವರಿ ಶುಲ್ಕ ಪಡೆಯುತ್ತಿದೆ ಎಂಬ ಆರೋಪದ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ. ನೋಂದಣಿ ಕೇಂದ್ರಗಳು ಸರ್ಕಾರಿ ಕಟ್ಟಡಗಳ ಆವರಣದಲ್ಲೇ ಇದ್ದರೆ, ಅಲ್ಲಿನ ಕೆಲಸ ಕಾರ್ಯಗಳು ಸರ್ಕಾರದ ಮೇಲ್ವಿಚಾರಣೆಯಲ್ಲಿ ನಡೆಯುತ್ತವೆ. ಆಗ, ಈ ಎಲ್ಲ ಸಮಸ್ಯೆಗಳಿಗೂ ಪರಿಹಾರ ದೊರೆಯಲಿದೆ ಎಂದು ಪ್ರಾಧಿಕಾರದ ಸಿಇಒ ಅಜಯ್‌ ಭೂಷಣ್‌ ಪಾಂಡೆ ತಿಳಿಸಿದ್ದಾರೆ.