ಹೊಟ್ಟೆಯ ಮೇಲೆ ಪುಟ್ಟ ಕಂದಮ್ಮ!

Team Udayavani, Jul 4, 2017, 10:40 AM IST

ತುಂಬು ಗರ್ಭಿಣಿ ಶ್ವೇತಾ ಶ್ರೀವಾತ್ಸವ್‌ ಇತ್ತೀಚೆಗಷ್ಟೇ ಫೋಟೋ ಶೂಟ್‌ ಮಾಡಿಸಿಕೊಂಡು, ಸುದ್ದಿಯಲ್ಲಿದ್ದರು. ಈಗ ಒಂಬತ್ತನೇ ತಿಂಗಳಿಗೆ ಕಾಲಿಟ್ಟು, ಕಂದಮ್ಮನ ಬರುವಿಕೆ ಕಾಯುತ್ತಿರುವ ಅವರು, ತಮ್ಮ ಹೊಟೆಯ ಮೇಲೆ ಪುಟ್ಟ ಮಗುವಿನ ಚಿತ್ರವನ್ನು ಬರೆಸಿಕೊಂಡಿದ್ದಾರೆ.

ಬೆಲ್ಲಿ ಪೇಂಟಿಂಗ್‌ ಎನ್ನುವುದು ಇತ್ತೀಚೆಗೆ ಸಾಕಷ್ಟು ಸುದ್ದಿ ಮಾಡುತ್ತಿದೆ. ಈಗ ಶ್ವೇತಾ ಸಹ ಅದಕ್ಕೆ ಮಾರುಹೋಗಿದ್ದು, ಖ್ಯಾತ ಕಲಾವಿದ ಬಾದಲ್‌ ನಂಜುಂಡಸ್ವಾಮಿ ಅವರಿಂದ ಬೆಲ್ಲಿ ಪೇಂಟಿಂಗ್‌ ಮಾಡಿಸಿಕೊಂಡಿದ್ದಾರೆ. ಇಂಥದ್ದೊಂದು ಐಡಿಯಾ ಅವರಿಗೆ ಹೇಗೆ ಬಂತು ಎಂದರೆ ಅದಕ್ಕೆ ಕಾರಣ ಅವರ ಪತಿ.

ಶ್ವೇತಾ ಪತಿ ಅಮಿತ್‌ ಶ್ರೀವಾತ್ಸವ್‌ ಅವರು, ತಮ್ಮ ಹೆಂಡತಿಗೆ ಇಂಥದ್ದೊಂದು ಐಡಿಯಾ ಕೊಟ್ಟಿದ್ದಾರೆ. ಅದಕ್ಕೆ ಸರಿಯಾಗಿ ಭಾನುವಾರ, ಶ್ವೇತಾ ಮನೆಗೆ ಆಗಮಿಸಿದ ಬಾದಲ್‌, ಸತತ ಆರು ಗಂಟೆಗಳ ಕಾಲ ಶ್ವೇತಾ ಅವರ ತುಂಬು ಹೊಟ್ಟೆಯ ಮೇಲೆ ಪೇಂಟಿಂಗ್‌ ಮಾಡಿದ್ದಾರೆ. ಬಹುಶಃ ಬೆಲ್ಲಿ ಪೇಂಟಿಂಗ್‌ ಮಾಡುವುದು ಬಾದಲ್‌ಗ‌ೂ ಹೊಸ ಅನುಭವವಿರಬೇಕು.

ಇದಕ್ಕೂ ಮುನ್ನ ಕಬ್ಬನ್‌ ಪಾರ್ಕ್‌ನಲ್ಲಿ ಹಲವಾರು ಕಲಾಕೃತಿಗಳನ್ನು ಅವರು ರಚಿಸಿದ್ದರು. ರಸ್ತೆಯಲ್ಲಿ ಹೊಂಡಗಳಾದಾಗ, ಅಲ್ಲಿ ಕೃತಕ ಮೊಸಳೆಗಳನ್ನು ಸೃಷ್ಟಿಸಿ, ಸಂಬಂಧಪಟ್ಟವರ ಗಮನವನ್ನು ಸೆಳೆದಿದ್ದರು. ಈಗ ಶ್ವೇತಾಗೆ ಬೆಲ್ಲಿ ಪೇಂಟಿಂಗ್‌ ಮಾಡುವ ಮೂಲಕ ಮತ್ತೆ ಸುದ್ದಿಯಲ್ಲಿದ್ದಾರೆ.