ರೈ ಧರ್ಮಸ್ಥಳದಲ್ಲಿ  ಪ್ರಮಾಣ ಮಾಡಲಿ: ಹರಿಕೃಷ್ಣ

Team Udayavani, Jul 5, 2017, 3:45 AM IST

ಮಂಗಳೂರು: ಕೇಂದ್ರದ ಮಾಜಿ ಸಚಿವ ಜನಾರ್ದನ ಪೂಜಾರಿ ಅವರ ವಿರುದ್ಧ ಸಚಿವ ರಮಾನಾಥ ರೈ ಅವರು ಅವ ಹೇಳನಕಾರಿಯಾಗಿ ಮಾತನಾಡಿಲ್ಲ ಎಂದಾದರೆ ವಾರದೊಳಗೆ ಧರ್ಮಸ್ಥಳಕ್ಕೆ ಬಂದು ಪ್ರಮಾಣ ಮಾಡಲಿ ಎಂದು ಹರಿಕೃಷ್ಣ ಬಂಟ್ವಾಳ ಸವಾಲು ಹಾಕಿದ್ದಾರೆ.

ಅವರು ನಗರದಲ್ಲಿ ಮಂಗಳವಾರ ಪತ್ರಿಕಾ ಗೋಷ್ಠಿಯಲ್ಲಿ ಮಾತನಾಡಿದರು.
ನಾನು ಮಾಡಿರುವ ಆರೋಪ ನಿರಾಧಾರ ಎಂದು ಸಚಿವ ರಮಾನಾಥ ರೈ ಹೇಳಿದ್ದಾರೆ. ನಾನು ಮಾಡಿರುವ ಆರೋಪಕ್ಕೆ ನನ್ನ ಬಳಿ ದಾಖಲೆ ಇದೆ. ಪೂಜಾರಿ ಅವರ ಬಗ್ಗೆ ಸಚಿವ ರೈ ಅವರು ಯಾರ ಬಳಿ ಅವಮಾನಕರವಾಗಿ ಮಾತ ನಾಡಿದ್ದಾರೆಯೋ ಅವರನ್ನೂ ಕರೆತರುತ್ತೇನೆ. ರೈ ಅವರಿಗೆ ನೈತಿಕತೆ, ಪ್ರಾಮಾಣಿಕತೆ ಮತ್ತು ಅವರೇ ಹೇಳಿದಂತೆ ಪೂಜಾರಿ ಅವರ ಮೇಲೆ ಗೌರವ ಇದ್ದಲ್ಲಿ ಧರ್ಮಸ್ಥಳಕ್ಕೆ ಬಂದು ಅಣ್ಣಪ್ಪ ಸ್ವಾಮಿ ಮತ್ತು ಮಂಜುನಾಥ ಸ್ವಾಮಿಯ ಎದುರು ಪ್ರಮಾಣ ಮಾಡಲಿ ಎಂದರು.

ರಮಾನಾಥ ರೈ ಅವರು ಪೂಜಾರಿ ಅವರ ಬಳಿ ಕ್ಷಮೆ ಕೇಳಿದ್ದರೆ ಸುಮ್ಮನಿರುತ್ತಿದ್ದೆ. ಆದರೆ ಅವರು ದಾಖಲೆ ಕೇಳುತ್ತಿದ್ದಾರೆ. ಪ್ರಮಾಣ ಮಾಡಿದರೆ ಯಾರದ್ದು ತಪ್ಪು, ಯಾರದ್ದು ಸರಿ ಎಂಬುದು ಜನರಿಗೆ ಗೊತ್ತಾಗುತ್ತದೆ ಎಂದು ಹರಿಕೃಷ್ಣ ಬಂಟ್ವಾಳ ತಿಳಿಸಿದರು.

ಸೋನಿಯಾ, ರಾಹುಲ್‌ಗೆ ರೈ ಯಾರೆಂದೇ ಗೊತ್ತಿಲ್ಲ !
ಜನಾರ್ದನ ಪೂಜಾರಿ ಅವರಿಗೆ ಎಂಪಿ ಟಿಕೇಟ್‌ ಕೊಡಿಸಲು ತಾನು ಶ್ರಮಿಸಿರುವುದಾಗಿ ರಮಾನಾಥ ರೈ ಹೇಳಿಕೆ ನೀಡಿದ್ದಾರೆ. ಆದರೆ ಸೋನಿಯಾ ಗಾಂಧಿ ಮತ್ತು ರಾಹುಲ್‌ ಗಾಂಧಿ ಅವರಿಗೆ ರಮಾನಾಥ ರೈ ಅವರ ಪರಿಚಯವೇ ಇಲ್ಲ ಎಂದ ಅವರು, ರಮಾನಾಥ ರೈ ಅವರಿಗೆ ಮೊದಲ ಬಾರಿಗೆ ಟಿಕೇಟ್‌ ದೊರಕಿಸಿಕೊಟ್ಟದ್ದು ಜನಾರ್ದನ ಪೂಜಾರಿ ಎಂದರು.

ಪೂಜಾರಿ ಅವರ ಬಗ್ಗೆ ಗೌರವ ಇದೆ ಎಂದು ಹೇಳುವ ಕಾಂಗ್ರೆಸ್‌ ಮುಖಂಡರು ಕಾಂಗ್ರೆಸ್‌ ಕಚೇರಿಯಲ್ಲಿ ಪತ್ರಿಕಾಗೋಷ್ಠಿ ನಡೆಸಲು ಪೂಜಾರಿಯವರಿಗೆ ಏಕೆ ಅವಕಾಶ ನೀಡು ತ್ತಿಲ್ಲ? ಕಾಂಗ್ರೆಸ್‌ ಕಚೇರಿ ಉದ್ಘಾಟನೆಗೆ ರಮಾ ನಾಥ ರೈ ಅವರು ಕನಿಷ್ಠ ಕರೆ ಮಾಡಿಯೂ ಆಹ್ವಾನಿಸದಿರುವುದು ಯಾಕೆ ಎಂದು ಪ್ರಶ್ನಿಸಿದರು. ಸಾಮಾಜಿಕ ಕಾರ್ಯಕರ್ತ ಸುರೇಶ್ಚಂದ್ರ ಉಪಸ್ಥಿತರಿದ್ದರು.