ರೈತರ ಆತ್ಮಹತ್ಯೆ ರಾತ್ರಿ ಕಳೆಯುವುದರೊಳಗೆ ಪರಿಹರಿಸುವಂಥದ್ದಲ್ಲ

Team Udayavani, Jul 7, 2017, 3:45 AM IST

ಹೊಸದಿಲ್ಲಿ: “ರೈತರ ಆತ್ಮಹತ್ಯೆ ಸಮಸ್ಯೆಯನ್ನು ರಾತೋರಾತ್ರಿ ಬಗೆಹರಿಸಲು ಸಾಧ್ಯವಿಲ್ಲ. ಅದಕ್ಕೆ ಕೊಂಚ ಸಮಯ ಬೇಕಾಗುತ್ತದೆ’ ಎಂದು ಸುಪ್ರೀಂಕೋರ್ಟ್‌ ಗುರುವಾರ ಅಭಿಪ್ರಾಯಪಟ್ಟಿದೆ.

“ಫ‌ಸಲ್‌ ವಿಮಾ’ ರೀತಿಯ ರೈತ ಪರ ಯೋಜನೆಗಳು ಜಾರಿಯಾಗಿ ಪರಿಣಾಮಕಾರಿ ಫ‌ಲ ನೀಡಲು ಕನಿಷ್ಠ ಒಂದು ವರ್ಷ ಸಮಯವಾದರೂ ಬೇಕು ಎಂಬ ಕೇಂದ್ರ ಸರಕಾರದ ವಾದಕ್ಕೆ ಸಹಮತ ವ್ಯಕ್ತಪಡಿಸಿ ಸುಪ್ರೀಂ ಹೀಗೆ ಹೇಳಿದೆ. ರೈತರ ಆತ್ಮಹತ್ಯೆ ತಡೆಯುವಲ್ಲಿ ಕೇಂದ್ರ ವಿಫ‌ಲವಾಗಿರುವ ಕುರಿತು ಎನ್‌ಜಿಒವೊಂದು ಸಲ್ಲಿಸಿದ್ದ ಅರ್ಜಿ ವಿಚಾರಣೆ ನಡೆಸಿದ ಮುಖ್ಯ ನ್ಯಾಯಮೂರ್ತಿ ಜೆ.ಎಸ್‌. ಖೇಹರ್‌ ಮತ್ತು ನ್ಯಾ| ಡಿ.ವೈ.ಚಂದ್ರಚೂಡ್‌ ಅವರಿದ್ದ ನ್ಯಾಯಪೀಠ, ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳಲು ಕೇಂದ್ರ ಸರಕಾರಕ್ಕೆ ಗಡುವು ನೀಡಿ, ವಿಚಾರಣೆಯನ್ನು ಆರು ತಿಂಗಳ ಕಾಲ ಮುಂದೂಡಿದೆ.

“ಕೇಂದ್ರದ ಎನ್‌ಡಿಎ ಸರಕಾರ ಹಲವು ರೈತ ಪರ ಯೋಜನೆಗಳನ್ನು ಜಾರಿಗೊಳಿಸಿದೆ. ಅವುಗಳಿಂದ ಪರಿಣಾಮ ಕಾರಿ ಫ‌ಲಿತಾಂಶ ಬರಬೇಕೆಂದರೆ ಒಂದಷ್ಟು ಸಮಯ ಬೇಕಾಗುತ್ತದೆ. ದೇಶದ 12 ಕೋಟಿ ಕೃಷಿಕರ ಪೈಕಿ ಸುಮಾರು 5.34 ಕೋಟಿ ಕೃಷಿಕರು “ಫ‌ಸಲ್‌ ವಿಮಾ’ ಸೇರಿ ಸರಕಾರದ ವಿವಿಧ ಕಲ್ಯಾಣ ಯೋಜನೆಗಳ ಪ್ರಯೋಜನ ಪಡೆಯುತ್ತಿದ್ದಾರೆ’ ಎಂದು ಅಟಾರ್ನಿ ಜನರಲ್‌ ಕೆ.ಕೆ.ವೇಣುಗೋಪಾಲ್‌ ನ್ಯಾಯಾಲಯಕ್ಕೆ ತಿಳಿಸಿದ್ದಾರೆ.