ಡೆಂಘೀ-ಚಿಕೂನ್‌ಗುನ್ಯಾ ಭೀತಿ!

Team Udayavani, Jul 7, 2017, 12:22 PM IST

ಹುಬ್ಬಳ್ಳಿ: ಮಹಾನಗರದಲ್ಲಿ ಡೆಂಘೀ ಹಾಗೂ ಚಿಕೂನ್‌ ಗುನ್ಯಾ ರೋಗ ಭೀತಿ ಹೆಚ್ಚತೊಡಗಿದೆ. ನಗರದ ವಿವಿಧ ಕಡೆಗಳಲ್ಲಿ ಡೆಂಘೀ ಪ್ರಕರಣಗಳು ಪತ್ತೆಯಾಗಿರುವ ಹಿನ್ನೆಲೆಯಲ್ಲಿ ಸುಮಾರು 1ಸಾವಿರ ಶುಶ್ರೂಷಕರು, ಆಶಾ ಕಾರ್ಯಕರ್ತೆಯರು ಹಾಗೂ ಪಾಲಿಕೆ ಆರೋಗ್ಯ ವಿಭಾಗ ಸಿಬ್ಬಂದಿಯಿಂದ ಮನೆ ಮನೆಗೆ ಜಾಗೃತಿ ಮೂಡಿಸಲು ಮಹಾನಗರ ಪಾಲಿಕೆ ಮುಂದಾಗಿದೆ. 

ಮಾರಕ ಸಾಂಕ್ರಾಮಿಕ ರೋಗಗಳು ಹರಡದಂತೆ ಅಗತ್ಯ ಮುಂಜಾಗ್ರತಾ ಕ್ರಮಕ್ಕೆ ಮುಂದಾಗಿರುವ ಪಾಲಿಕೆ, ಒಂದು ಕಡೆ ಸೊಳ್ಳೆಗಳ ನಿಯಂತ್ರಣಕ್ಕೆ ಕ್ರಿಮಿನಾಶಕ ಸಿಂಪರಣೆ ಇನ್ನಿತರ ಕ್ರಮ ಕೈಗೊಳ್ಳುತ್ತಿದ್ದು, ಮತ್ತೂಂದು ಕಡೆ ಸಾರ್ವಜನಿಕರು ತಮ್ಮ ಮನೆ ಸುತ್ತ ಮುತ್ತ ಸ್ವತ್ಛತೆ ಕಾಯ್ದುಕೊಳ್ಳುವುದರೊಂದಿಗೆ ರೋಗ ಬಾರದಂತೆ ನೋಡಿಕೊಳ್ಳುವ ನಿಟ್ಟಿನಲ್ಲಿ ಜಾಗೃತಿ ಮೂಡಿಸುವ ಕಾರ್ಯ ಕೈಗೊಂಡಿದೆ. 

ಜಾಗೃತಿ ಕಾರ್ಯಕ್ಕೆ ಮುಂದಾಗುವ ಕಾರ್ಯಕರ್ತೆಯರು ಹಾಗೂ ಸಿಬ್ಬಂದಿಗೆ ಜು.7ರಂದು ಕಾರ್ಯಾಗಾರ ಹಮ್ಮಿಕೊಳ್ಳಲಾಗಿದೆ. ಜು.10ರಿಂದ 20ರವರೆಗೆ 1ಸಾವಿರ ಕಾರ್ಯಕರ್ತೆಯರು ಹಾಗೂ ಸಿಬ್ಬಂದಿ ಹುಬ್ಬಳ್ಳಿ-ಧಾರವಾಡದಲ್ಲಿ ಮನೆ ಮನೆಗೆ ತೆರಳಿ ಮಾರಕ ರೋಗಗಳ ಬಗ್ಗೆ ಹಾಗೂ ಸೊಳ್ಳೆಗಳ ನಿಯಂತ್ರಣ ಬಗ್ಗೆ ಜಾಗೃತಿ ಮೂಡಿಸಲಿದ್ದಾರೆ. 

ಈ ವರ್ಷ 14 ಡೆಂಘೀ ಪ್ರಕರಣ ಪತ್ತೆ: ಮಹಾನಗರ ಪಾಲಿಕೆ ವ್ಯಾಪ್ತಿಯಲ್ಲಿ ಈ ವರ್ಷದ ಜುಲೈ ಮೊದಲ ವಾರದವರೆಗೆ 14 ಡೆಂಘೀ, 1 ಚಿಕೂನ್‌ ಗುನ್ಯಾ ಪ್ರಕರಣ ವರದಿಯಾಗಿವೆ ಎಂಬುದು ಪಾಲಿಕೆ ವೈದ್ಯಾಧಿಕಾರಿಯವರ ಅನಿಸಿಕೆ. 2012 -13ರಲ್ಲಿ ಮಲೇರಿಯಾ 11, ಕಾಲರಾ 07, ಡೆಂಘೀ 28 ಪ್ರಕರಣ ಪತ್ತೆಯಾಗಿದ್ದವು.

2013-14ರಲ್ಲಿ ಡೆಂಘೀ 7, ಕಾಲರಾ 7, ಮಲೇರಿಯಾ 4 ಪ್ರಕರಣ, 2014-15ರಲ್ಲಿ ಡೆಂಘೀ 14, ಕಾಲರಾ 1, ಲ್ಯಾಪೊಸ್ಪೈರಿಸಿಸ್‌ 04 ಪ್ರಕರಣ, 2015-16ನೇ ಸಾಲಿನಲ್ಲಿ ಮಲೇರಿಯಾ 14, ಡೆಂಘೀ 13, ಚಿಕೂನ್‌ಗುನ್ಯಾ 2 ಪ್ರಕರಣ, 2016-17ನೇ ಸಾಲಿನಲ್ಲಿ ಡೆಂಘೀ 63 ಪ್ರಕರಣಗಳು ಪತ್ತೆಯಾಗಿದ್ದವು. 

ರೋಗ ಕುರಿತು ಮಾಹಿತಿ ಬಂದ ಪ್ರದೇಶಗಳಲ್ಲಿ ನಿಗಾ ವಹಿಸಿ ಕ್ರಿಮಿನಾಶಕ ಸಿಂಪರಣೆ ಸೇರಿದಂತೆ ವಿವಿಧ ಕ್ರಮ ಕೈಗೊಳ್ಳಲಾಗುತ್ತಿದೆ. ಪ್ರಸ್ತುತ ಪಾಲಿಕೆಯಲ್ಲಿ 6 ಕ್ರಿಮಿನಾಶಕ ಸಿಂಪರಣೆ ಯಂತ್ರಗಳು ಬಳಕೆಯಾಗುತ್ತಿವೆ. ಈಗಾಗಲೇ ವಾರ್ಡ್‌ ಸಂಖ್ಯೆ 1, 2, 4, 6, 23, 28, 29, 39, 45, 52, 57, 59, 66 ಗಳಲ್ಲಿ ಫಾಗಿಂಗ್‌ ಯಂತ್ರಗಳ ಮೂಲಕ ಫಾಗಿಂಗ್‌ ಮಾಡಲಾಗಿದೆ.

ಕೊಳಗೇರಿ ಹಾಗೂ ತಗ್ಗು ಪ್ರದೇಶಗಳಿಗೆ ಹೆಚ್ಚು ನಿಗಾ ವಹಿಸಲಾಗಿದ್ದು, ಮಹಾನಗರದಲ್ಲಿ ಎಚ್‌1 ಎನ್‌1 ಪ್ರಕರಣ ವರದಿಯಾಗಿಲ್ಲ ಎಂಬುದು ಪಾಲಿಕೆ ಆಸ್ಪತ್ರೆ ಮೂಲಗಳ ಅನಿಸಿಕೆ. ಮಹಾನಗರದಲ್ಲಿ ಡೆಂಘೀ ಪ್ರಕರಣಗಳ ಪತ್ತೆ ಹಾಗೂ ಅನೇಕ ಕಡೆಗಳಲ್ಲಿ ಸೊಳ್ಳೆಯ ಕಾಟ ಹೆಚ್ಚುತ್ತಿರುವುದು ಸಹಜವಾಗಿಯೇ ಮಹಾನಗರ ಜನತೆಯನ್ನು ಆತಂಕಕ್ಕೀಡು ಮಾಡುವಂತೆ ಮಾಡಿದೆ. 

* ಬಸವರಾಜ ಹೂಗಾರ