ಟಿಪ್ಪರ್‌ ಢಿಕ್ಕಿ: ಬೈಕ್‌ ಸವಾರ ಸಾವು, ಸಹ ಸವಾರ ಗಂಭೀರ

Team Udayavani, Jul 8, 2017, 3:05 AM IST

ಕುಂದಾಪುರ: ಅಂಪಾರು ಬಳಿಯ ಮೂಡುಬಗೆ ಶಾಲೆಯ ಬಳಿ ಶುಕ್ರವಾರ ಸಂಜೆ ಟಿಪ್ಪರ್‌ ಹಾಗೂ ಬೈಕ್‌ ನಡುವೆ ಸಂಭವಿಸಿದ ಅಪಘಾತದಲ್ಲಿ ಬೈಕ್‌ ಸವಾರ ಹಳ್ಳಿಹೊಳೆ ಶಾಡಬೇರು ಸಾರದ ಪಾಲು ನಿವಾಸಿ ಶಿವಕುಮಾರ್‌ ರಾವ್‌ (28) ದಾರುಣವಾಗಿ ಸಾವನ್ನಪ್ಪಿದರೆ, ಸಹ ಸವಾರ ರವಿ (35) ಗಂಭೀರವಾಗಿ ಗಾಯಗೊಂಡು ಆಸ್ಪತ್ರೆಗೆ ದಾಖಲಾಗಿದ್ದಾರೆ. ಶಿವಕುಮಾರ್‌ ಹಾಗೂ ರವಿ ಬೈಕ್‌ನಲ್ಲಿ ಕುಂದಾಪುರದಿಂದ ಹಳ್ಳಿಹೊಳೆಯತ್ತ ಹೋಗುತ್ತಿರುವಾಗ ಬೈಲೂರು ಕಡೆಯಿಂದ ಬಂದ ಟಿಪ್ಪರ್‌ ಢಿಕ್ಕಿ ಹೊಡೆದಿತ್ತು ಎನ್ನಲಾಗಿದೆ. ಢಿಕ್ಕಿಯ ರಭಸಕ್ಕೆ ರಸ್ತೆಗೆ ಬಿದ್ದ  ಶಿವಕುಮಾರ್‌ ಗಂಭೀರವಾಗಿ ಗಾಯಗೊಂಡು ಸ್ಥಳದಲ್ಲೇ ಮೃತಪಟ್ಟರೆ, ರವಿ ಗಂಭೀರವಾಗಿ ಗಾಯಗೊಂಡು ಆಸ್ಪತ್ರೆಗೆ ದಾಖಲಾಗಿದ್ದಾರೆ.

ಅವಿವಾಹಿತ ಶಿವಕುಮಾರ್‌ ರಾವ್‌ ಕೃಷಿಕರಾಗಿದ್ದಾರೆ. ತೀರ್ಥಹಳ್ಳಿ ತಾಲೂಕಿನ ಹಲ್‌ಕೂಡಿಗೆ ಕೊಕ್ಕಡದ ರವಿ ಅವರು  ಶಿವಕುಮಾರ್‌ ಅವರ ತಾಯಿಯ ಸಂಬಂಧಿಯಾಗಿದ್ದಾರೆ. ಅವರು ಪತ್ನಿ, ಪುತ್ರ ಹಾಗೂ ಪುತ್ರಿಯನ್ನು ಹೊಂದಿದ್ದಾರೆ. ಇಬ್ಬರೂ ಕುಂದಾಪುರಕ್ಕೆ ಕೃಷಿ ಸಂಬಂಧಿ ಸಾಮಗ್ರಿಗಳನ್ನು ತರಲು ಕುಂದಾಪುರಕ್ಕೆ ಬಂದು ವಾಪಸಾಗುತ್ತಿದ್ದರು.

ಕುಟುಂಬಕ್ಕೆ ಇನ್ನೊಂದು ಹೊಡೆತ
ಶಾಡಬೇರು ಸಾರದ ಪಾಲು ಮಂಜುನಾಥ ರಾವ್‌ ಅವರಿಗೆ ಇಬ್ಬರು ಮಕ್ಕಳು. ಎಂಟು ವರ್ಷದ ಹಿಂದೆ ಜಾಂಡೀಸ್‌ ಕಾಯಿಗೆ ತುತ್ತಾಗಿ ಮಗಳನ್ನು ಕಳೆದುಕೊಂಡ ಇವರ ಕುಟುಂಬಕ್ಕೆ ಈಗ ಮಗನನ್ನು ಕಳೆದುಕೊಂಡು ದುಃಖ ಮಡುಗಟ್ಟುವಂತೆ ಮಾಡಿದೆ. ಅಪಘಾತಕ್ಕೆ ಕಾರಣವಾದ ಟಿಪ್ಪರ್‌ನ್ನು ವಶಪಡಿಸಿಕೊಳ್ಳಲಾಗಿದೆ. ಶಂಕರನಾರಾಯಣ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.