ಮುಂದಿನ ಎರಡು ದಿನ ರಾಜ್ಯದಲ್ಲಿ ತುಂತುರು ಮಳೆ 

Team Udayavani, Jul 8, 2017, 3:40 AM IST

ಬೆಂಗಳೂರು: ಕರಾವಳಿ ಸೇರಿ ರಾಜ್ಯದ ಒಳನಾಡು ಪ್ರದೇಶಗಳ ಆಯ್ದ ಭಾಗಗಳಲ್ಲಿ ಶುಕ್ರವಾರ ಸಾಧಾರಣ ಮಳೆಯಾಗಿದ್ದು, ಮುಂದಿನ ಎರಡು ದಿನಗಳು ಅಲ್ಲಲ್ಲಿ ತುಂತುರು ಮಳೆ ಹನಿಯಲಿದೆ.

ಕಳೆದ ವಾರ ಆರ್ಭಟಿಸಿದ್ದ ಮಳೆ, ಈ ವಾರ ಬಹುತೇಕ ವಿರಾಮ ನೀಡಿದೆ. ಬೆಂಗಳೂರು ಒಳ ಗೊಂಡಂತೆ ಕೆಲವು ಪ್ರದೇಶಗಳಲ್ಲಿ ಮಾತ್ರ ಸಾಧಾರಣ ಮಳೆಯಾದ ಬಗ್ಗೆ ವರದಿಯಾಗಿದೆ. ಮುಂದಿನ 48 ಗಂಟೆಗಳಲ್ಲಿ ಕರಾವಳಿ, ಒಳನಾಡಿನಲ್ಲಿ ಕೇವಲ ತುಂತುರು ಮಳೆಯ ನಿರೀಕ್ಷೆ ಇದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ.

ಈ ಮಧ್ಯೆ ಶುಕ್ರವಾರ ಬೆಳಗ್ಗೆ 8.30ಕ್ಕೆ ತೀರ್ಥಹಳ್ಳಿಯ ಆಗುಂಬೆ, ದಕ್ಷಿಣ ಕನ್ನಡದ ಸುಳ್ಯ, ಪುತ್ತೂರಿನಲ್ಲಿ 4 ಸೆಂ.ಮೀ., ಬೆಳ್ತಂಗಡಿ,ಕೊಲ್ಲೂರು, ಕದ್ರಾ, ಮಂಚಿಕೇರಿ,ಕಮ್ಮರಡಿ, ನಗರದ ಯಲಹಂಕದಲ್ಲಿ 3 ಸೆಂ.ಮೀ., ಭಾಗಮಂಡಲ,
ಮಾದಾಪುರ, ಸೋಮವಾರಪೇಟೆ, ಹೊನ್ನಾವರ, ಮಡಿಕೇರಿ, ರಾಮನಗರದಲ್ಲಿ 2 ಸೆಂ.ಮೀ. ಮಳೆ ದಾಖಲಾಗಿದೆ.

ಮುಂಡಗೋಡ, ಯಲ್ಲಾಪುರ, ಕುಮಟಾ, ಅಂಕೋಲಾ,ಯಲಬುರ್ಗ, ಮೂಡಿಗೆರೆ,ಜಯಪುರ, ಕೊಪ್ಪ, ಸಕಲೇಶಪುರ, ನಂಜನಗೂಡು, ಹೆಸರಘಟ್ಟ, ಆನೇಕಲ್‌ ಸುತ್ತಮುತ್ತ 1 ಸೆಂ.ಮೀ. ಮಳೆ ಯಾಗಿದೆ ಎಂದು ಇಲಾಖೆ ಪ್ರಕಟಣೆ ತಿಳಿಸಿದೆ.

ಕಾವೇರಿ ಕಣಿವೆಯಲ್ಲೂ ಮಳೆ: ಕಾವೇರಿ ಕಣಿವೆಯ ಮೈಸೂರು, ಚಾಮರಾಜನಗರ, ಮಂಡ್ಯ ಹಾಗೂ ಕೊಡಗು
ಜಿಲ್ಲೆಗಳಲ್ಲಿ ಮುಂದಿನ ಐದು ದಿನಗಳ ಕಾಲ ಮೋಡ ಕವಿದ ವಾತಾವರಣವಿದ್ದು, ತುಂತುರು ಮಳೆಯಾಗಲಿದೆ.