ಸೀತಾರಾಮ ಕೆದಿಲಾಯ ನಾಳೆ ಹುಟ್ಟೂರಿಗೆ

Team Udayavani, Jul 11, 2017, 3:45 AM IST

ಉಡುಪಿ/ಮಂಗಳೂರು: ಭಾರತಕ್ಕೆ ಪ್ರದಕ್ಷಿಣೆ ಬಂದ ಆರೆಸ್ಸೆಸ್‌ ಮಾಜಿ ಹಿರಿಯ ಪ್ರಚಾರಕ್‌ ಸೀತಾರಾಮ ಕೆದಿಲಾಯ ಅವರು ಜು. 12ರಂದು ಹುಟ್ಟೂರು ಪುತ್ತೂರು, ವಿಟ್ಲದ ಮೈತ್ರೇಯಿ ಗುರುಕುಲ, ಜು. 13ರಂದು ಪಕ್ಷಿಕೆರೆ, ಪಾವಂಜೆ, ಉಡುಪಿ, ಜು. 14ರಂದು ಶೃಂಗೇರಿಗೆ ಭೇಟಿ ನೀಡಿ ಕೇರಳದ ಕೊಲ್ಲಂಗೆ ತೆರಳುವರು.

ಕೆದಿಲಾಯ ಅವರು 2012ರಲ್ಲಿ ಕನ್ಯಾಕುಮಾರಿಯಿಂದ ಉತ್ತರಕ್ಕೆ ಸಂಚರಿಸುವಾಗ ಕಾಸರಗೋಡಿನಲ್ಲಿ ಜತೆಯಾಗಿ ಕೊನೆಯವರೆಗೂ ಜತೆಗಿದ್ದ ಪಕ್ಷಿಕೆರೆಯ ರವೀಂದ್ರನಾಥ ರೈ ಅವರ ಮನೆಗೆ ಜು. 13ರಂದು ಭೇಟಿ ನೀಡುವರು. ರೈಯವರು ಮೂಲತಃ ಕೃಷಿಕರಾಗಿದ್ದು ವೃತ್ತಿಯಲ್ಲಿ ಗುತ್ತಿಗೆದಾರರು. ಉತ್ತರ ಪ್ರದೇಶದ ಗೋರಖಪುರದಲ್ಲಿ ಜತೆಗೂಡಿದ ಬರೇಲಿ ಮೂಲದ ರಾಜೀವ ಮಿಶ್ರಾ ಅವರುತಿರುವನಂತಪುರ ದೇವಸ್ಥಾನಕ್ಕೆ ಜು. 10ರಂದು ಭೇಟಿ ನೀಡಿದ್ದು, ಜು. 11ರಂದು ಗೋರಖಪುರ, ಬರೇಲಿಗೆ ಹಿಂದಿರುಗುವರು. ಮಿಶ್ರಾ ವೃತ್ತಿಯಲ್ಲಿ ಕಂಪೆನಿ ಉದ್ಯೋಗಿ.ಸನ್ಯಾಸವನ್ನು ತೆಗೆದುಕೊಳ್ಳುವ ಯೋಚನೆ ಇದೆಯೇ ಎಂದು ಕೆದಿಲಾಯ ಅವರನ್ನು ಪ್ರಶ್ನಿಸಿದಾಗ “ಸನ್ಯಾಸವನ್ನು ತೆಗೆದುಕೊಳ್ಳಲು ಅದೇನೂ ತೆಗೆದುಕೊಳ್ಳುವ ವಸ್ತುವೆ? ಅದೊಂದು ಮನೋಧರ್ಮ. ಹಾಗಿದ್ದರೆ ಸಾಕು’ ಎಂದು ಮಾರ್ಮಿಕವಾಗಿ ಉತ್ತರಿಸಿದರು. ತಮ್ಮ ಮುಂದಿನ ಕಾರ್ಯಕ್ರಮವೇನು ಎಂದು ಕೇಳಿದಾಗ ಜು. 23ರಂದು ಆರೆಸ್ಸೆಸ್‌ ಕೇಂದ್ರ ಸ್ಥಾನವಾದ ನಾಗ್ಪುರಕ್ಕೆ ಹೋದ ಬಳಿಕ ನಿಶ್ಚಿಯವಾಗಲಿದೆ ಎಂದು ತಿಳಿಸಿದರು.