ಪ್ರಮಾಣಕ್ಕೆ ಹೆದರಿದ ರೈ: ಹರಿಕೃಷ್ಣ

Team Udayavani, Jul 13, 2017, 3:45 AM IST

ಪೂಜಾರಿಗೆ ಕರೆ ಮಾಡಿ ಕ್ಷಮೆ ಯಾಚನೆ
ಮಂಗಳೂರು: ಕೇಂದ್ರದ ಮಾಜಿ ಸಚಿವ ಬಿ. ಜನಾರ್ದನ ಪೂಜಾರಿ ಅವರನ್ನು ಅವಾಚ್ಯ ಶಬ್ದಗಳಿಂದ ನಿಂದಿಸಿರುವ ಸಚಿವ ಬಿ. ರಮಾನಾಥ ರೈ ಅವರು ಇದೀಗ ಪೂಜಾರಿ ಅವರಿಗೆ ದೂರವಾಣಿ ಕರೆ ಮಾಡಿ ಕ್ಷಮೆ ಯಾಚಿಸಿದ್ದಾರೆ. ಅಲ್ಲದೆ ಹರಿಕೃಷ್ಣ ಬಂಟ್ವಾಳ ಪತ್ರಿಕಾಗೋಷ್ಠಿ ನಡೆಸದಂತೆ ಸೂಚಿಸಿ ಎಂದು ಪೂಜಾರಿಯವರಲ್ಲಿ ಹೇಳುತ್ತಿದ್ದಾರೆ. ಕ್ಷಮೆ ಕೇಳುವುದಾದರೆ ಬಹಿರಂಗವಾಗಿ ಕೇಳಲಿ ಎಂದು ಸಾಮಾಜಿಕ ಕಾರ್ಯಕರ್ತ ಹರಿಕೃಷ್ಣ ಬಂಟ್ವಾಳ ತಿಳಿಸಿದ್ದಾರೆ.

ನಗರದಲ್ಲಿ ಬುಧವಾರ ಪತ್ರಿಕಾ ಗೋಷ್ಠಿಯಲ್ಲಿ ಮಾತನಾಡಿದ ಅವರು, ಪೂಜಾರಿ ಅವರನ್ನು ಅವಾಚ್ಯ ಶಬ್ದ ಗಳಿಂದ ನಿಂದಿಸಿಲ್ಲ ಎಂದಾದರೆ ಧರ್ಮಸ್ಥಳಕ್ಕೆ ಬಂದು ಪ್ರಮಾಣ ಮಾಡಲಿ ಎಂದು ನಾನು ವಾರದ ಹಿಂದೆ ಸವಾಲು ಹಾಕಿದ್ದೆ. ಆದರೆ ಅವರು ಬಾರದೇ ಇರುವುದರಿಂದ ಪೂಜಾರಿ ಅವರನ್ನು ತೆಗಳಿರುವುದು ಸಾಬೀತಾಗಿದೆ. ರೈ ಅವರಿಗೆ ನೈತಿಕತೆ ಮತ್ತು ಪ್ರಾಮಾಣಿಕತೆ ಇರುತ್ತಿದ್ದರೆ ನನ್ನ ಸವಾಲನ್ನು ಸ್ವೀಕರಿಸಿ ಅವರು ಧರ್ಮಸ್ಥಳಕ್ಕೆ ಬರುತ್ತಿದ್ದರು ಎಂದರು.

ಪೂಜಾರಿ ಹೇಳಿ ಬಂದಿಲ್ಲ
ಲೋಕಸಭಾ ಚುನಾವಣೆಯ ಬಳಿಕ ಪೂಜಾರಿ ಅವರಿಗೆ ಕರೆ ಮಾಡದ ರಮಾನಾಥ ರೈ ಅವರು ಈಗ ಕರೆ ಮಾಡಿರುವುದು ಯಾಕೆ ಎಂದು ಪ್ರಶ್ನಿಸಿದ ಅವರು, ನೈಜ ವಿಷಯವನ್ನು ಸಮಾಜಕ್ಕೆ ತಿಳಿಸಬೇಕೆಂಬ ಉದ್ದೇಶ ದಿಂದ ನಾನು ಮಾಧ್ಯಮಗಳ ಮುಂದೆ ಬಂದಿದ್ದೇನೆಯೇ ಹೊರತು, ನನ್ನನ್ನು ಪೂಜಾರಿ ಅವರು ಪತ್ರಿಕಾಗೋಷ್ಠಿ ನಡೆಸಲು ಕಳುಹಿಸಿದ್ದಲ್ಲ ಎಂದರು.

ರಮಾನಾಥ ರೈ ಅವರಿಗೆ ಅಧಿಕಾರದ ಆಸೆ ಇರಬಹುದು. ಆದರೆ ತಾನು ಯಾವುದೇ ಅಧಿಕಾರ ಲಾಲಸೆ ಹೊಂದಿಲ್ಲ ಎಂದವರು ವಿವರಿಸಿದರು.

ಶರತ್‌ ಮಡಿವಾಳ ಅವರ ಅಂಗಡಿ ಯಲ್ಲಿ ಕಳೆದ 20 ವರ್ಷಗಳಿಂದ ರಮಾನಾಥ ರೈ ಬಟ್ಟೆ ಒಗೆಸಿ ಕೊಂಡಿ ದ್ದಾರೆ. ಆದರೂ ಕೊಲೆ ಯಾದಾಗ ಕೂಡಲೇ ಅವರ ಮನೆಗೆ ಹೋಗುವ ಕನಿಷ್ಠ ಸೌಜನ್ಯವನ್ನೂ ತೋರಿಸಿಲ್ಲ ಎಂದು ಹರಿಕೃಷ್ಣ ಆಪಾದಿಸಿದರು.ಸುರೇಶ್ಚಂದ್ರ ಕೋಟ್ಯಾನ್‌, ರಂಜಿತ್‌ ಪೂಜಾರಿ ಉಪಸ್ಥಿತರಿದ್ದರು.