ತಡವಾಗಿ ಬಂದ ರೈಲುಗಳ ತಡೆದು ಪ್ರತಿಭಟನೆ

Team Udayavani, Jul 14, 2017, 11:21 AM IST

ಮಹದೇವಪುರ: ನಿಲ್ದಾಣಕ್ಕೆ ರೈಲುಗಳು ವಿಳಂಬವಾಗಿ ಬರುತ್ತಿರುವುದಕ್ಕೆ ಆಕ್ರೋಶಗೊಂಡ ನೂರಾರು ಪ್ರಯಾಣಿಕರು ರೈಲುಗಳನ್ನು ತಡೆದು ಪ್ರತಿಭಟನೆ ನಡೆಸಿರುವ ಘಟನೆ ಸಜಾಪುರ ಮುಖ್ಯರಸ್ತೆ ಬಳಿ ಇರುವ ಕಾರ್ಮೆಲ ರಾಮ್‌ ರೈಲ್ವೇ ನಿಲ್ದಾಣದಲ್ಲಿ ಗುರುವಾರ ಬೆಳಗ್ಗೆ ನಡೆದಿದೆ.

ಕಾರ್ಮೆಲ ರಾಮ್‌ ನಿಲ್ದಾಣದ ಮೂಲಕ ತಮಿಳುನಾಡಿಗೆ ಮತ್ತು ತಮಿಳುನಾಡಿನಿಂದ ನಗರದೆಡೆಗೆ ನಿತ್ಯ ಹಲವು ರೈಲುಗಳು ಸಂಚರಿಸುತ್ತಾವೆ. ತಮಿಳುನಾಡಿನಿಂದ ಕಾರ್ಮೆಲ್‌ ರಾಮ್‌ ನಿಲ್ದಾಣಕ್ಕೆ 7.30ಕ್ಕೆ ಬರಬೇಕಿದ್ದ ಧರ್ಮಪುರಿ ಪ್ಯಾಸೆಂಜರ್‌ ರೈಲು ಇತ್ತೀಚೆಗೆ 1 ಗಂಟೆ ತಡವಾಗಿ ಬರುತ್ತಿತ್ತು. ಇದರಿಂದ ಆಕ್ರೋಶಗೊಂಡಿದ್ದ ಪ್ರಯಾಣಿಕರು ಗುರುವಾರ ತಡವಾಗಿ ಬಂದ ಆ ರೈಲನ್ನು ತಡೆದು ಪ್ರತಿಭಟಿಸಿದರು. 

ನಂತರ ನಿಲ್ದಾಣಕ್ಕೆ ಬಂದ ನಾಗರಕೊಯಿಲ್‌, ಪುದುಚೇರಿ, ಹೊಸೂರು ಪ್ಯಾಸೆಂಜರ್‌, ಸೇಲಂ ರೈಲುಗಳನ್ನೂ ಪ್ರಯಾಣಿಕರು ತಡೆದರು. ಸುಮಾರು 2ಗಂಟೆಗಳ ಪ್ರತಿಭಟನೆ ನಡೆಸಿದರು. ಇದರಿಂದ ರೈಲುಗಳ ಸಮಯ ವ್ಯತ್ಯಯವಾಗಿ ರೈಲಿನ ನಿತ್ಯದ ವೇಳಾಪಟ್ಟಿಯಲ್ಲಿಯೂ ವ್ಯತ್ಯಾಸ ಉಂಟಾಯಿತು. ಹಲವಾರು ರೈಲುಗಳ ಸಂಚಾರ ಸಮಯ ಬದಲಾಗಿದೆ ಎಂದು ರೈಲ್ವೆ ಅಧಿಕಾರಿ ಘೋಷಿಸಿದರು. 

ಕಾರ್ಮೆಲ್‌ ರಾಮ್‌ ನಿಲ್ದಾಣದಲ್ಲಿ ವಾಹನಗಳು ಸಂಚರಿಸದಂತೆ ರೈಲ್ವೆ ಗೇಟ್‌ ಹಾಕಿದ್ದರಿಂದ ಸಜಾìಪುರ ಮುಖ್ಯರಸ್ತೆಯಿಂದ ವರ್ತೂರು ಮುಖ್ಯರಸ್ತೆಗೆ ಸಂಚರಿಸುವ ವಾಹನ ಸವಾರರು 2ಗಂಟೆಗಳ ಕಾಲ ಕಾಯುವಂತಾಯಿತು. ಕೆಲಸಗಳಿಗೆ ತೆರಳಲು ತಡವಾದ್ದರಿಂದ ವಾಹನ ಸವಾರರು ರೈಲ್ವೆ ಇಲಾಖೆಯ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದರು.

ಸ್ಥಳದಲ್ಲಿ ಬಿಗುವಿನ ವಾತಾವರಣ ನಿರ್ಮಾಣಗೊಂಡಿತ್ತು. ಸುದ್ದಿ ತಿಳಿದು ಸ್ಥಳಕ್ಕೆ ಬಂದ ವೈಟ್‌ಫೀಲ್ಡ್‌ ವಿಭಾಗದ ಡಿಸಿಪಿ ನಾರಾಯಣ್‌ ಪ್ರಯಾಣಿಕರ ಅಹವಾಲು ಸ್ವೀಕರಿಸಿ ರೈಲ್ವೆ ಇಲಾಖಾಧಿಕಾರಿಗಳಿಗೆ ವಿಷಯ ತಿಳಿಸುವುದಾಗಿ ಭರವಸೆ ನೀಡಿದರು. ನಂತರ ಪ್ರಯಾಣಿಕರು ಪ್ರತಿಭಟನೆ ಹಿಂಪಡೆದರು.