ಮಣಿಪಾಲ ಆ್ಯಡ್‌ ಸಿಂಡಿಕೇಟ್‌ ಕಾರ್ಪೊರೇಟ್‌ ಕಚೇರಿ ಸ್ಥಳಾಂತರ

Team Udayavani, Jul 15, 2017, 10:54 AM IST

ಉಡುಪಿ: ಮಣಿಪಾಲದ ಜಾಹೀರಾತು ಸಂಸ್ಥೆ ಆ್ಯಡ್‌ಸಿಂಡಿಕೇಟ್‌ ಸರ್ವಿಸಸ್‌ ಪ್ರೈ.ಲಿ.ನ ಕಾರ್ಪೊರೇಟ್‌ ಕಚೇರಿ ಶುಕ್ರವಾರ ಮಣಿಪಾಲ ಸಿಂಡಿಕೇಟ್‌ ಸರ್ಕಲ್‌ನ ಸಾಯಿರಾಂ ಸೆಂಟ್ರಲ್‌ ಮಾಲ್‌ ಕಟ್ಟಡಕ್ಕೆ ಸ್ಥಳಾಂತರಗೊಂಡಿತು. ನೂತನ ಕಚೇರಿಯನ್ನು ಮಣಿಪಾಲ್‌ ಮೀಡಿಯ ನೆಟ್‌ವರ್ಕ್‌ ಲಿ. ಆಡಳಿತ ನಿರ್ದೇಶಕ ಟಿ.ಸತೀಶ್‌ ಯು. ಪೈ ಅವರು ಉದ್ಘಾಟಿಸಿದರು.

“ತರಂಗ’ ವ್ಯವಸ್ಥಾಪಕ ಸಂಪಾದಕಿ ಡಾ| ಸಂಧ್ಯಾ ಎಸ್‌. ಪೈ, ಮಣಿಪಾಲ್‌ ಟೆಕ್ನಾಲಜೀಸ್‌ ಲಿ. ಆಡಳಿತ ನಿರ್ದೇಶಕ ಟಿ.ಗೌತಮ್‌ ಪೈ, ವನಿತಾ ಪೈ, ಎಂಐಟಿ ನಿರ್ದೇಶಕ ಡಾ|ಜಿ.ಕೆ. ಪ್ರಭು, ಸಂಸ್ಥೆಯ ಸಿಇಒ ದ್ವಿಜೇಂದ್ರ ಆಚಾರ್ಯ ಮೊದಲಾದವರು ಉಪಸ್ಥಿತರಿದ್ದರು. 
ಇಚ್ಛಾಶಕ್ತಿ, ಜ್ಞಾನಶಕ್ತಿ, ಕ್ರಿಯಾ ಶಕ್ತಿ ಇದ್ದಾಗ ಯೋಜನೆಗಳು ಯಶಸ್ಸು ಕಾಣುತ್ತವೆ. ಸಣ್ಣ ಪ್ರಮಾಣದಲ್ಲಿ ಆರಂಭಗೊಂಡ ಸಂಸ್ಥೆ ಈಗ ಹೆಮ್ಮರವಾಗಿ ಬೆಳೆದಿದೆ. ಸಕಾರಾತ್ಮಕ ಇಚ್ಛೆ ಇದ್ದಲ್ಲಿ ಸಕಾರಾತ್ಮಕ ಶಕ್ತಿಗಳು ಪೂರಕವಾಗಿರುತ್ತವೆ ಎನ್ನುವುದು ವಿಶ್ವ ಶಕ್ತಿಯ ಸೂತ್ರ. ಪರಿಪೂರ್ಣ ನಾಯಕತ್ವ ಯಾವಾಗಲೂ ಕೇವಲ ಬೆಂಬಲ ಕೊಡುವುದಲ್ಲ, ಒಂದು ನಾಯಕತ್ವ ಇನ್ನೊಂದು ನಾಯಕತ್ವ
ವನ್ನು ಸೃಷ್ಟಿಸುತ್ತದೆ. ಇದು ವೈಯಕ್ತಿಕವಾಗಿಯೂ ಸಂಸ್ಥೆಗಳಿಗೂ ಅನ್ವಯ ಎಂದು ಡಾ| ಸಂಧ್ಯಾ ಪೈ ಹೇಳಿದರು. 

ಮೌಲ್ಯ, ನೈತಿಕತೆಯೊಂದಿಗೆ ಸಂಸ್ಥೆ ಸಮಗ್ರ ವಿಕಾಸವನ್ನು ಕಂಡಿದೆ. ಇದು ಪ್ರಗತಿಯಲ್ಲದೆ ಬದಲಾವಣೆಯ ಹಿಂದಿರುವ ಚಾಲನಶಕ್ತಿಯಾಗಿದೆ. ಹಿಂದೆ ನಮ್ಮದೇ ಸಮೂಹದಿಂದ ಜಾಹೀರಾತನ್ನು ಪಡೆಯುತ್ತಿದ್ದ ಸಂಸ್ಥೆ ಅನಂತರ ಮಾರುಕಟ್ಟೆಗೆ ಮುನ್ನುಗ್ಗಿ ಸೇವೆ ಸಲ್ಲಿಸಿದ್ದರಿಂದ ಬೆಳವಣಿಗೆ ಕಂಡಿದೆ. ಇದು ವಿಶೇಷ ದಿನ ಎಂದು ಟಿ. ಗೌತಮ್‌ ಪೈ ಹರ್ಷ ವ್ಯಕ್ತಪಡಿಸಿದರು. ಚೀಫ್ ಕ್ರಿಯೇಟಿವ್‌ ಆಫೀಸರ್‌ ಗಣೇಶ ಸುಬ್ರಹ್ಮಣ್ಯಮ್‌ ಪ್ರಸ್ತಾವನೆಗೈದರು. ಕ್ರಿಯೇಟಿವ್‌ ಡೈರೆಕ್ಟರ್‌ ಪ್ರೀತಿ ನಿರ್ವಹಿಸಿದರು.