ನಿತೀಶ್‌ ಕಾರ್ಯಕ್ರಮ ತಪ್ಪಿಸಿಕೊಂಡ ತೇಜಸ್ವಿ: ಘಟಬಂಧನ ಬಿರುಕು ತೀವ್ರ

Team Udayavani, Jul 15, 2017, 4:19 PM IST

ಪಟ್ನಾ : ಬಿಹಾರದ ಮಹಾಘಟಬಂಧನದಲ್ಲಿನ ಬಿಕ್ಕಟ್ಟು ಶಮನವಾಗುವ ಲಕ್ಷಣವೇ ತೋರಿ ಬರುತ್ತಿಲ್ಲ. ಇದಕ್ಕೆ ಸಾಕ್ಷಿ ಎಂಬಂತೆ ಇಂದು ಮುಖ್ಯಮಂತ್ರಿ ನಿತೀಶ್‌ ಕುಮಾರ್‌ ಅವರು ಭಾಗವಹಿಸಿದ ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳಬೇಕಿದ್ದ  ಭ್ರಷ್ಟಾಚಾರ ಕಳಂಕಿತ ಲಾಲು ಪುತ್ರ, ಉಪ ಮುಖ್ಯಮಂತಿ ತೇಜಸ್ವಿ ಯಾದವ್‌ ಆ ಕಾರ್ಯಕ್ರಮವನ್ನು ತಪ್ಪಿಸಿಕೊಂಡಿದ್ದಾರೆ. 

ಮುಖ್ಯಮಂತ್ರಿ ನಿತೀಶ್‌ ಕುಮಾರ್‌ ಆಯೋಜಿಸಿದ್ದ  ವಿಶ್ವ ಯುವ ಕೌಶಲ ದಿವಸ ಸಮಾರಂಭದ ವೇದಿಕೆಯಲ್ಲಿ ತೇಜಸ್ವಿ ಯಾದವ್‌ ಅವರಿಗೆ ಆಸನವನ್ನು ಇಡಲಾಗಿತ್ತು; ಅದರ ಮುಂದೆ ಅವರ ನೇಮ್‌ ಪ್ಲೇಟ್‌ ಕೂಡ ಇಡಲಾಗಿತ್ತು. ಆದರೆ ತೇಜಸ್ವಿ ಕಾರ್ಯಕ್ರಮಕ್ಕೆ ಬಾರದಿದ್ದಾಗ ನೇಮ್‌ ಪ್ಲೇಟ್‌ ಮುಚ್ಚಲಾಯಿತು; ಬಳಿಕ ಆಸನ ಸಹಿತವಾಗಿ ಆ ನೇಮ್‌ ಪ್ಲೇಟನ್ನು ತೆಗೆಯಲಾಯಿತು. 

‘ಭ್ರಷ್ಟಾಚಾರ ಕಳಂಕಿತರಾಗಿರುವ ಲಾಲು ಪುತ್ರ, ಉಪಮುಖ್ಯಮಂತ್ರಿ ತೇಜಸ್ವಿ ಯಾದವ್‌ ಕಳಂಕದಿಂದ ಮುಕ್ತರಾಗಿ ಬರುವ ತನಕ ಅಧಿಕಾರ ಬಿಟ್ಟುಕೊಡುವುದೇ ಲೇಸು; ಹಿಂದೆ ನಿತೀಶ್‌ ಕುಮಾರ್‌ ಹಾಗೆಯೇ ಮಾಡಿದ್ದಾರೆ’ ಎಂದು ಜೆಡಿಯು ವಕ್ತಾರ ಕೆ ಸಿ ತ್ಯಾಗಿ ಹೇಳಿರುವುದು ಲಾಲು ಗೆ ಪಥ್ಯವಾಗಿಲ್ಲ. 

“ತೇಜಸ್ವಿ ರಾಜೀನಾಮೆ ಕೊಡುವುದಿಲ್ಲ; ಅಂತಹ ಪ್ರಶ್ನೆಯೇ ಉದ್ಭವಿಸುವುದಿಲ್ಲ’ ಎಂದು ಲಾಲು ಖಡಕ್‌ ಉತ್ತರ ನೀಡಿದ್ದಾರೆ. ಹಾಗಿದ್ದರೂ ಬಿಹಾರದ ಮಹಾ ಘಟಬಂಧನಕ್ಕೆ ಯಾವುದೇ ಧಕ್ಕೆ ಇಲ್ಲ ಎಂದೂ ಹೇಳಿದ್ದಾರೆ.