ನಿಗದಿತ ಸಮಯಕ್ಕೆ ಬಾರದ ರೈಲು: ಪ್ರತಿಭಟನೆ

Team Udayavani, Jul 18, 2017, 11:54 AM IST

ಕೆ.ಆರ್‌.ಪುರ: ನಿಗದಿತ ಸಮಯಕ್ಕೆ ರೈಲು ಬಾರದ ಹಿನ್ನೆಲೆ ಅಕ್ರೋಶಗೊಂಡ ಪ್ರಯಾಣಿಕರು ಹೊಸೂರು – ಯಶವಂತಪುರ ರೈಲನ್ನು 2 ಗಂಟೆ ರಾಮಮೂರ್ತಿನಗರ ಸಮೀಪದ ಕಸ್ತೂರಿನಗರದಲ್ಲಿ ತಡೆದು ಪ್ರತಿಭಟನೆ ನಡೆಸಿದರು.

ಪ್ರತಿದಿನ ಹೊಸೂರು -ಯಶವಂತಪುರ ಮಾರ್ಗದಲ್ಲಿ ಸಂಚರಿಸುವ ರೈಲು ನಿಗದಿತ ಸಮಯಕ್ಕಿಂದ 1 ಗಂಟೆ ತಡವಾಗಿ ಆಗಮಿಸುತ್ತಿವೆ. ಇದರಿಂದ ಕೆಲಸಕ್ಕೆ ತೆರಳಲು ತೀವ್ರ ತೊಂದರೆ ಉಂಟಾಗುತ್ತಿದ್ದು ಆಕ್ರೋಶಗೊಂಡ ಪ್ರಯಾಣಿಕರು ರೈಲನ್ನು ತಡೆದು ರೈಲ್ವೆ ಇಲಾಖೆಯ ಅಧಿಕಾರಿಗಳ ನಿರ್ಲಕ್ಷ್ಯದ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದರು. 

ಪ್ರತಿಭಟನಾ ಸ್ಥಳಕ್ಕೆ ಹಿರಿಯ ರೈಲ್ವೆ ಅಧಿಕಾರಿ ರಾಮಕೃಷ್ಣ  ಭೇಟಿ ನೀಡಿ ಮಾತನಾಡಿ, ಹೊಸೂರು-ಯಶವಂತಪುರ ಮಾರ್ಗಕ್ಕೆ ಒಂದೇ ರೈಲು ಸಂಚರಿಸುವುದರಿಂದ ಸಮಯದಲ್ಲಿ ವ್ಯತ್ಯಯವಾಗುತ್ತಿದೆ. ಈ ಸಮಸ್ಯೆಗಳ ಬಗ್ಗೆ ಮೇಲಾಧಿಕಾರಿಗಳು ಮತ್ತು ಪ್ರಯಾಣಿಕರೊಂದಿಗೆ  ಚರ್ಚಿಸಿ ಪರಿಹರಿಸುವುದಾಗಿ ಭರವಸೆ ನೀಡಿದರು.

ನಂತರ ಪ್ರಯಾಣಿಕರು ಪ್ರತಿಭಟನೆಯನ್ನು ಹಿಂಪಡೆದರು. 2 ಗಂಟೆಗಳ ಕಾಲ ರೈಲನ್ನು ತಡೆದಿದ್ದರಿಂದ  ಕೆಲ ರೈಲುಗಳ ಸಮಯದಲ್ಲಿ ವ್ಯತ್ಯಯ ಉಂಟಾಗಿ ನೂರಾರು ಪ್ರಯಾಣಿಕರಿಗೆ ತೊಂದರೆ ಉಂಟಾಯಿತು.