ಕಿಮ್ಸ್‌ ವೈದ್ಯರಿಗೆ ಆರ್‌ಎಫ್ಐಡಿ ಹಾಜರಾತಿ ವ್ಯವಸ್ಥೆಗೆ ಸೂಚನೆ

Team Udayavani, Jul 22, 2017, 12:02 PM IST

ಹುಬ್ಬಳ್ಳಿ: ಕಿಮ್ಸ್‌ನಲ್ಲಿ ಬಯೋಮೆಟ್ರಿಕ್‌ ವ್ಯವಸ್ಥೆ ಮಾಡಿದ್ದರೂ ಕೆಲ ವೈದ್ಯರು ಸಮರ್ಪಕ ಸೇವೆ ನೀಡದಿರುವುದರಿಂದ ನೂತನ ರೇಡಿಯೋ ಫ್ರೀಕ್ವೆನ್ಸಿ ಐಡೆಂಟಿಫಿಕೇಶನ್‌ ಆರ್‌ಎಫ್ಐಡಿ) ಆಧಾರಿತ ಹಾಜರಿ ವ್ಯವಸ್ಥೆ ಕಲ್ಪಿಸಲು ಕ್ರಮ ಕೈಗೊಳ್ಳಬೇಕೆಂದು ಜಿಲ್ಲಾ ಉಸ್ತುವಾರಿ ಸಚಿವ ವಿನಯ ಕುಲಕರ್ಣಿ ಸೂಚಿಸಿದರು. 

ಕಿಮ್ಸ್‌ ನಿರ್ದೇಶಕರ ಕಚೇರಿಯಲ್ಲಿ ಶುಕ್ರವಾರ ನಡೆದ ಪ್ರಗತಿ ಪರಿಶೀಲನಾ ಸಭೆಯಲ್ಲಿ ಅವರು ಮಾತನಾಡಿದರು. ಉತ್ತರ ಕರ್ನಾಟಕದಲ್ಲಿ ಬಡ ಜನರಿಗೆ ವೈದ್ಯಕೀಯ ಸೇವೆ ನೀಡುವ ದೊಡ್ಡ ಸಂಸ್ಥೆಯೆಂದರೆ ಕಿಮ್ಸ್‌. ಪ್ರತಿದಿನ 1000ಕ್ಕೂ ಹೆಚ್ಚು ಜನರು ಇಲ್ಲಿ ಹೊರ ರೋಗಿಗಳಾಗಿ ಚಿಕಿತ್ಸೆ ಪಡೆದುಕೊಳ್ಳುತ್ತಿದ್ದಾರೆ.

ಇಂಥ ಪ್ರತಿಷ್ಠಿತ ಸಂಸ್ಥೆಯಲ್ಲಿ ತಿಂಗಳಿಗೆ 1 ರಿಂದ 1.5 ಲಕ್ಷ ರೂ. ಸಂಬಳ ನೀಡಿದರೂ ವೈದ್ಯರು ಸರಿಯಾದ ಸಮಯಕ್ಕೆ ಹಾಜರಾಗದಿರುವುದು ಬೇಸರದ ಸಂಗತಿ. ಬಯೋಮೆಟ್ರಿಕ್‌ ವ್ಯವಸ್ಥೆ ಮಾಡಿದರೂ ಕೆಲವರು ಮೋಸ ಮಾಡುತ್ತಿದ್ದಾರೆ. ಈಗ ನೂತನ ತಂತ್ರಜ್ಞಾನದ ಆರ್‌ಎಫ್ಡಿಐ ವ್ಯವಸ್ಥೆ ಕಲ್ಪಿಸುವ ಸ್ಥಿತಿ ಬಂದಿದೆ ಎಂದರು. 

ದೊಡ್ಡ ನಗರಗಳ ಹಲವಾರು ಆಸ್ಪತ್ರೆಗಳಲ್ಲಿ ಇಂಥ ವ್ಯವಸ್ಥೆ ಕಲ್ಪಿಸಲಾಗಿದೆ. ವೈದ್ಯರು ಸಮಯಕ್ಕೆ ಬಂದು ಸರಿಯಾಗಿ ಕೆಲಸ ಮಾಡದಿರುವುದನ್ನು ಸಹಿಸುವುದಿಲ್ಲ. ಖಾಸಗಿ ಆಸ್ಪತ್ರೆಗಳ ಶುಲ್ಕ ಭರಿಸಲಾಗದೆ ಕಿಮ್ಸ್‌ಗೆ ಬಡ ಜನರು ವೈದ್ಯಕೀಯ ಸೇವೆಗೆ ಬರುತ್ತಾರೆ. ಇಲ್ಲಿ ಉತ್ತಮ ಸೇವೆ ನೀಡುವ ನಿಟ್ಟಿನಲ್ಲಿ ಅಗತ್ಯ ಕ್ರಮ ಕೈಗೊಳ್ಳಬೇಕು ಎಂದು ಹೇಳಿದರು. 

ಸೇವಾ ವೈದ್ಯರ ಪಟ್ಟಿ ಹಾಕಿ: ಆಯಾ ವಿಭಾಗಗಳಲ್ಲಿ ಸೇವೆಯಲ್ಲಿರುವ ವೈದ್ಯರ ಪಟ್ಟಿಯನ್ನು ವಾರದಲ್ಲಿ ಹಾಕಬೇಕು. ಯಾವ ವೈದ್ಯರು ಯಾವ ಶಿಫ್ಟ್ನಲ್ಲಿ ಸೇವೆ ಸಲ್ಲಿಸುತ್ತಾರೆ ಎಂಬ ಮಾಹಿತಿಯನ್ನೂ ಫ‌ಲಕದಲ್ಲಿ ನಮೂದಿಸಬೇಕು ಎಂದರು. ಸಾಧ್ಯವಾದಷ್ಟು ಔಷಧಗಳು ಇಲ್ಲಿಯೇ ನೀಡುವ ವ್ಯವಸ್ಥೆಯಾಗಬೇಕು. 

ಈಗಾಗಲೇ ಜನೆರಿಕ್‌ ಔಷಧ ಅಂಗಡಿಯಿದ್ದು, ಕಿಮ್ಸ್‌ ಆವರಣದಲ್ಲಿ ಕನಿಷ್ಠ 3 ಜನೌಷಧಿ ಕೇಂದ್ರಗಳನ್ನು ಆರಂಭಿಸಬೇಕು. ಅವಶ್ಯಕ ಯಂತ್ರೋಪಕರಣಗಳನ್ನು ತರಿಸಿಕೊಳ್ಳಬೇಕು ಹಾಗೂ ಹಳೆಯ ಯಂತ್ರಗಳನ್ನು ಬದಲಿಸಲು ಕ್ರಮ ಕೈಗೊಳ್ಳಬೇಕು ಎಂದು ಸೂಚಿಸಿದರು. ಪ್ರಸ್ತಾವನೆ ಕಳಿಸುವುದಷ್ಟೇ ಅಲ್ಲ, ನನಗೆ ಜ್ಞಾಪಿಸುತ್ತ ಕೆಲಸ ಮಾಡಿಸಿಕೊಳ್ಳಬೇಕು.

ಕಿಮ್ಸ್‌ ಒಳಿತಿಗಾಗಿ ನಾನು ಆರೋಗ್ಯ ಸಚಿವರೊಂದಿಗೆ ಮಾತನಾಡಿ ಕೆಲಸ ಮಾಡಿಸುತ್ತೇನೆ. ಇಲ್ಲದಿದ್ದರೆ ಕಂಪನಿಗಳ ಸಿಎಸ್‌ಆರ್‌ ಅನುದಾನ ಕೊಡಿಸಲು ಯತ್ನಿಸುತ್ತೇನೆ. ನಿರ್ದೇಶಕರು ಎಲ್ಲರನ್ನೂ ವಿಶ್ವಾಸಕ್ಕೆ ತೆಗೆದುಕೊಂಡು ಕೆಲಸ ಮಾಡಬೇಕು. ನಿಯಮಿತವಾಗಿ ಎಲ್ಲ ವಿಭಾಗಗಳ ಮುಖ್ಯಸ್ಥರೊಂದಿಗೆ ಸಭೆ ನಡೆಸಿ. ಆಗ ಇಲ್ಲಿನ ಸ್ಥಿತಿ-ಗತಿ ಬಗ್ಗೆ ಸ್ಪಷ್ಟ ಮಾಹಿತಿ ತಿಳಿಯಲು ಸಾಧ್ಯವಾಗುತ್ತದೆ ಎಂದರು. 

ಜಿಲ್ಲಾಧಿಕಾರಿ ಎಸ್‌.ಬಿ. ಬೊಮ್ಮನಹಳ್ಳಿ ಮಾತನಾಡಿ, ನಿರ್ದೇಶಕರು ನಿಯಮಿತವಾಗಿ ಸಭೆಗಳನ್ನು ನಡೆಸಬೇಕು. ಅಧಿಕಾರ ವಿಕೇಂದ್ರೀಕರಣ ವ್ಯವಸ್ಥೆ ಮಾಡಿ. ಇದರಿಂದ ನಿರ್ದೇಶಕರ ತಲೆಭಾರ ಕಡಿಮೆಯಾಗುತ್ತದೆ. ಸಮರ್ಪಕವಾಗಿ ಸೇವೆ ಒದಗಿಸದ ಸಿಬ್ಬಂದಿ ಮೇಲೆ ನಿರ್ದಾಕ್ಷಿಣ್ಯವಾಗಿ ಕ್ರಮ ಕೈಗೊಳ್ಳಬೇಕು. ಆಸ್ಪತ್ರೆಗೆ ಹೆಚ್ಚಾಗಿ ಅನಕ್ಷರಸ್ಥ ಜನರು ಬರುತ್ತಾರೆ. ವೈದ್ಯರು ರೋಗಿಗಳೊಂದಿಗೆ ಸೌಜನ್ಯದಿಂದ ವರ್ತಿಸಬೇಕು ಎಂದು ಹೇಳಿದರು.  

ಸಂವಹನ ಕೊರತೆ: ಕಿಮ್ಸ್‌ ಆಡಳಿತ ಮಂಡಳಿ ಸದಸ್ಯ ಪರ್ವೇಜ್‌ ಕೊಣ್ಣೂರ ಮಾತನಾಡಿ, ಕಿಮ್ಸ್‌ ನಿರ್ದೇಶಕರು ಯಾರನ್ನೂ ವಿಶ್ವಾಸಕ್ಕೆ ತೆಗೆದುಕೊಳ್ಳುವುದಿಲ್ಲ. ಇದರಿಂದ ಅವರಿಗೆ ಇಲ್ಲಿನ ಸಮಸ್ಯೆಗಳು ಅರಿವಿಗೆ ಬರುವುದಿಲ್ಲ. ಇಲ್ಲಿ ಕ್ಯಾಲ್ಸಿಯಂ ಮಾತ್ರೆಗಳನ್ನು ಕೂಡ ಹೊರಗೆ ಖರೀದಿಸಲು ಸೂಚಿಸಲಾಗುತ್ತದೆ ಎಂದರು. 

ವೆಂಟಿಲೇಟರ್‌ ಟೆಂಡರ್‌ ನೀಡಿಕೆಯಲ್ಲಿ ವಿಳಂಬವಾಗುತ್ತಿದೆ. ಯಾಕೆ ವಿಳಂಬವಾಗಿದೆ ಎಂಬುದನ್ನು ನಿರ್ದೇಶಕರು ಸ್ಪಷ್ಟಪಡಿಸಬೇಕು ಎಂದು ಆಗ್ರಹಿಸಿದರು. ಕಿಮ್ಸ್‌ ಆಡಳಿತ ಮಂಡಳಿ ಸದಸ್ಯ ಡಾ| ಜಿ.ಬಿ. ಸತ್ತೂರ ಮಾತನಾಡಿ, ಕಳೆದ 60 ವರ್ಷಗಳಿಂದ ಆಪರೇಶನ್‌ ಥೇಟರಿನ ಲೈಟ್‌ಗಳನ್ನು ಬದಲಿಸಿಲ್ಲ. ಕೂಡಲೇ ಹೊಸ ದೀಪಗಳ ವ್ಯವಸ್ಥೆ ಮಾಡಬೇಕೆಂದರು. 

ಅನುದಾನ ಒದಗಿಸಿ: ಕಿಮ್ಸ್‌ ನಿರ್ದೇಶಕ ಡಾ| ದತ್ತಾತ್ರೇಯ ಬಂಟ್‌ ಮಾತನಾಡಿ, ನಮ್ಮ ಆಸ್ಪತ್ರೆಗೆ ಆಗಮಿಸುವ ರೋಗಿಗಳ ಸಂಖ್ಯೆ ಹೆಚ್ಚುತ್ತಿದೆ. ಪ್ರತಿದಿನ ಸರಾಸರಿ 1200 ಹೊರ ರೋಗಿಗಳು ಬರುತ್ತಿದ್ದು, ಸೋಮವಾರ ಹಾಗೂ ಗುರುವಾರ 3000 ರೋಗಿಗಳು ಬರುತ್ತಾರೆ.

ಕಳೆದ ವರ್ಷ ಸರ್ಕಾರ 101 ಕೋಟಿ ರೂ. ನೀಡಿತ್ತು. ಈ ವರ್ಷ 101 ಕೋಟಿ 16 ಲಕ್ಷ ರೂ. ನೀಡಿದೆ. 48 ಕೋಟಿ ಕೊರತೆಯಿದ್ದು, ಅದನ್ನು ಒದಗಿಸಬೇಕೆಂದು ಸಚಿವರಿಗೆ ಮನವಿ ಮಾಡಿದರು. ತಹಶೀಲ್ದಾರ ಶಶಿಧರ ಮಾಡ್ಯಾಳ, ಡಾ| ಮಹೇಶ ನಾಲವಾಡ, ಕಿಮ್ಸ್‌ ಕಾಲೇಜು ಪ್ರಾಚಾರ್ಯ ಡಾ| ಕಮ್ಮಾರ, ಡಾ| ಆನೂರಶೆಟ್ಟರ ಮೊದಲಾದವರಿದ್ದರು.