ಜಿಲ್ಲೆಯಲ್ಲಿ ಕಾಂಗ್ರೆಸ್‌ಗೆ 8 ಸ್ಥಾನ: ಹರೀಶ್‌ ಕುಮಾರ್‌

Team Udayavani, Jul 27, 2017, 8:50 AM IST

ವಿಟ್ಲ: ಕಾಂಗ್ರೆಸ್‌ ಪಕ್ಷ ಅಶಾಂತಿ ಬಯಸುವುದಿಲ್ಲ. ಅಹಿಂಸೆ ಮತ್ತು ಜಾತ್ಯತೀತ ವಾದವನ್ನು ಬೆಂಬಲಿಸುತ್ತದೆ. ರಾಜಕೀಯ ಕುತಂತ್ರದಿಂದ ಸಚಿವ ರಮಾನಾಥ ರೈ ಅವರನ್ನು ಗುರಿಯಾಗಿಸಿ, ಬಂಟ್ವಾಳವನ್ನೇ ಕೇಂದ್ರವಾಗಿರಿಸಿ, ಕೋಮುಗಲಭೆಯನ್ನು ಸೃಷ್ಟಿಸಲಾಯಿತು. ಇದನ್ನೆಲ್ಲ ಜನರು ಒಪ್ಪಿಕೊಳ್ಳುವುದಿಲ್ಲ. ಜಿಲ್ಲೆಯಲ್ಲಿ ಕಳೆದ ಬಾರಿ ಕಾಂಗ್ರೆಸ್‌ಗೆ 7 ಸ್ಥಾನ ಬಂದಿತ್ತು. ಈ ಬಾರಿ 8 ಸ್ಥಾನಗಳನ್ನು ಗಳಿಸಲಿದೆ ಎಂದು ದ.ಕ.ಜಿಲ್ಲಾ ಕಾಂಗ್ರೆಸ್‌ ಸಮಿತಿ ಅಧ್ಯಕ್ಷ ಹರೀಶ್‌ ಕುಮಾರ್‌ ವಿಶ್ವಾಸ ವ್ಯಕ್ತಪಡಿಸಿದರು. ಅವರು ಬುಧವಾರ ವಿಟ್ಲ-ಉಪ್ಪಿನಂಗಡಿ ಬ್ಲಾಕ್‌ ಕಾಂಗ್ರೆಸ್‌ ಸಮಿತಿಯ ವಿಟ್ಲ ಕಚೇರಿಗೆ ಪ್ರಥಮ ಬಾರಿ ಭೇಟಿ ನೀಡಿದ ಬಳಿಕ ಅವರಿಗೆ ನಡೆದ ಅಭಿನಂದನೆ, ಸಮ್ಮಾನ ಸಮಾರಂಭದಲ್ಲಿ ಮಾತನಾಡಿದರು.

ಸಚಿವ ಬಿ.ರಮಾನಾಥ ರೈ ಅವರ ವ್ಯಕ್ತಿತ್ವವನ್ನು ದುರ್ಬಲಗೊಳಿಸುವುದಕ್ಕಾಗಿ ಷಡ್ಯಂತ್ರ ರಚಿಸಲಾಯಿತು. 50-60 ದಿನಗಳ ಕಾಲ 144 ಸೆಕ್ಷನ್‌ ಹೇರುವ ಹಾಗೆ ಮಾಡಲಾಯಿತು. ಪರಿಣಾಮವಾಗಿ ಬಲಿಷ್ಠ ನಾಯಕರಾಗಿರುವ ಉಸ್ತುವಾರಿ ಸಚಿವರನ್ನು ಸಂಪುಟದಿಂದ ಕೊಕ್‌ ಮಾಡಬೇಕೆಂಬ ಹುನ್ನಾರವನ್ನು ವಿಪಕ್ಷದವರು ಆಯ್ಕೆ ಮಾಡಿಕೊಂಡರು. ಜನಪ್ರತಿನಿಧಿಗಳೇ ಕಾನೂನು ಉಲ್ಲಂಘಿಸಿ, ಪ್ರತಿಭಟನೆ ನಡೆಸಿ, ಕೋಮು ಸಂಘರ್ಷವನ್ನು ಕೆರಳಿಸುವಂತೆ ಮಾಡಿದರು. ಆದರೆ ರೈ ಅವರು ಮತ್ತಷ್ಟು ಬಲಿಷ್ಠರಾದರು ಎಂದು ಹೇಳಿದರು.

ಚುನಾವಣೆ ಸಿದ್ಧತೆ
ಪದವೀಧರ ಕ್ಷೇತ್ರ ಮತ್ತು ಇತರ ಚುನಾವಣೆಗಳಿಗೆ ಸಿದ್ಧತೆ ನಡೆಯಬೇಕಾಗಿದೆ. ಇನ್ನು 1 ವರ್ಷ ಚುನಾವಣೆಯ ಪರೀಕ್ಷೆಯ ಕಾಲ. ಅದಕ್ಕಾಗಿ ಅನೇಕ ಸಿದ್ಧತೆಗಳಾಗಬೇಕಿವೆೆ. ರಾಜ್ಯ ನಾಯಕರ ಮಾರ್ಗದರ್ಶನದಂತೆ ಕಾರ್ಯಕರ್ತರನ್ನು ಭೇಟಿ ಮಾಡಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರ ನೇತೃತ್ವದ ಸರಕಾರ ಮಾಡಿದ ಅಭಿವೃದ್ಧಿ ಕಾರ್ಯಗಳನ್ನು ನಾಗರಿಕರಿಗೆ ತಿಳಿಸಬೇಕಾಗಿದೆ. ಕಾಂಗ್ರೆಸ್‌ ಪಕ್ಷದ ಆಡಳಿತ ಭ್ರಷ್ಟಾಚಾರ ರಹಿತ, ಸ್ವಜನಪಕ್ಷಪಾತದಿಂದ ದೂರ, ಗುಂಪುಗಾರಿಕೆಯಿಲ್ಲದ ಆಡಳಿತ ನೀಡಿ, ರಾಜ್ಯದ ಶೇ.95 ಜನರನ್ನು ತಲುಪಿದೆ. ಕೃಷಿಕರ ಸಾಲ ಮನ್ನಾ ಮಾಡಿದೆ. ಹಿಂದುಳಿದ, ಅಲ್ಪಸಂಖ್ಯಾಕ ನಿಗಮಗಳ ಸಾಲ ಮನ್ನಾ ಮಾಡಿದೆ. ಜನಮೆಚ್ಚುವ ಸರಕಾರವಾಗಿದೆ ಎಂದು ಹೇಳಿದರು.

ವಿಟ್ಲ – ಉಪ್ಪಿನಂಗಡಿ ಬ್ಲಾಕ್‌ ಕಾಂಗ್ರೆಸ್‌ ಸಮಿತಿ ಅಧ್ಯಕ್ಷ ಪ್ರವೀಣಚಂದ್ರ ಆಳ್ವ ಅಧ್ಯಕ್ಷತೆ ವಹಿಸಿದ್ದರು. ಇದೇ ಸಂದರ್ಭ ಕೆಪಿಸಿಸಿ ಕಾರ್ಯದರ್ಶಿಯಾಗಿ ಆಯ್ಕೆಯಾದ ಎಂ.ಎಸ್‌.ಮಹಮ್ಮದ್‌ ಅವರನ್ನೂ ಅಭಿನಂದಿಸಲಾಯಿತು. ಜಿ.ಪಂ.ಸದಸ್ಯೆ ಮಂಜುಳಾ ಮಾವೆ, ಕಿಸಾನ್‌ ಘಟಕ ಜಿಲ್ಲಾಧ್ಯಕ್ಷ ಉಮಾನಾಥ ಶೆಟ್ಟಿ, ಬ್ಲಾಕ್‌ ಕಾಂಗ್ರೆಸ್‌ ಸಮಿತಿ ಉಪಾಧ್ಯಕ್ಷ ರಾಜೇಶ್‌ ಕುಮಾರ್‌ ಬಾಳೆಕಲ್ಲು, ಬಂಟ್ವಾಳ ತಾ| ಇಂಟಕ್‌ ಅಧ್ಯಕ್ಷ ರಮಾನಾಥ ವಿಟ್ಲ, ಕಾರ್ಮಿಕ ವಿಭಾಗದ ಅಧ್ಯಕ್ಷ ಮುರಳೀಧರ ಶೆಟ್ಟಿ, ವಿಟ್ಲ ವಲಯ ಕಾಂಗ್ರೆಸ್‌ ಅಧ್ಯಕ್ಷ ಪ್ರಭಾಕರ ಭಟ್‌ ಮಾವೆ, ಪ.ಪಂ.ವಿಪಕ್ಷ ನಾಯಕ ಅಶೋಕ್‌ ಕುಮಾರ್‌ ಶೆಟ್ಟಿ, ಅಲ್ಪಸಂಖ್ಯಾಕ ವಿಭಾಗದ ಅಧ್ಯಕ್ಷ ವಿ.ಎ.ರಶೀದ್‌, ವಿಟ್ಲ ಗ್ರಾ.ಪಂ.ಮಾಜಿ ಅಧ್ಯಕ್ಷೆ ಭವಾನಿ ರೈ ಕೊಲ್ಯ, ಮಾಜಿ ಅಧ್ಯಕ್ಷ ಎಂ.ಕೆ.ಮೂಸಾ, ಮಾಜಿ ಉಪಾಧ್ಯಕ್ಷ ಅಬ್ದುಲ್‌ಖಾದ್ರಿ, ಪುಷ್ಪಲತಾ ಎಂ. ಶೆಟ್ಟಿ, ಪ.ಪಂ.ಸದಸ್ಯರಾದ ಅಬ್ದುಲ್‌ ರಹಿಮಾನ್‌ ನೆಲ್ಲಿಗುಡ್ಡೆ, ದಮಯಂತಿ, ಸುನೀತಾ ಕೋಟ್ಯಾನ್‌, ಲತಾವೇಣಿ, ನಾಮನಿರ್ದೇಶಿತ ಸದಸ್ಯ ವಿ.ಎಚ್‌.ಸಮೀರ್‌ ಪಳಿಕೆ, ಕೇಪು ವಲಯ ಕಾಂಗ್ರೆಸ್‌ ಅಬ್ದುಲ್‌ಕರೀಂ ಕುದ್ದುಪದವು ಮೊದಲಾದವರು ಉಪಸ್ಥಿತರಿದ್ದರು.