ಗುಣರತ್ನೆ ಸರಣಿಯಿಂದಲೇ ಔಟ್‌

Team Udayavani, Jul 28, 2017, 7:05 AM IST

ಗಾಲೆ: ಗಾಲೆ ಟೆಸ್ಟ್‌ ಪಂದ್ಯದ ಮೊದಲ ದಿನ ಎಡಗೈ ಹೆಬ್ಬೆರಳಿನ ಮೂಳೆ ಮುರಿತಕ್ಕೊಳಗಾಗಿದ್ದ ಶ್ರೀಲಂಕಾದ ಬ್ಯಾಟ್ಸ್‌ಮನ್‌ ಅಸೇಲ ಗುಣರತ್ನೆ ಭಾರತದೆದುರಿನ ಸರಣಿಯಿಂದಲೇ ಹೊರಬಿದ್ದಿದ್ದಾರೆ. ಪೂರ್ತಿ ಚೇತರಿಸಿಕೊಳ್ಳಲು ಅವರಿಗೆ 6ರಿಂದ 8 ವಾರಗಳ ಅಗತ್ಯವಿದೆ ಎಂದು ವೈದ್ಯರು ತಿಳಿಸಿದ್ದರಿಂದ ಉಳಿದೆರಡು ಟೆಸ್ಟ್‌, ಏಕದಿನ ಹಾಗೂ ಟಿ-20 ಸರಣಿಗಳಲ್ಲೂ ಅವರ ಸೇವೆ ಲಭಿಸದು ಎಂಬುದಾಗಿ ಶ್ರೀಲಂಕಾ ಕ್ರಿಕೆಟ್‌ ಮಂಡಳಿ ತಿಳಿಸಿದೆ.

ಹೆಬ್ಬೆರಳಿನ ಮೂಳೆಯಲ್ಲಿ 3 ಬಿರುಕುಗಳು ಕಾಣಿಸಿಕೊಂಡಿದ್ದು, ಇದೊಂದು ಗಂಭೀರ ಆಘಾತ ಎಂಬುದಾಗಿ ಶ್ರೀಲಂಕಾ ಕ್ರಿಕೆಟ್‌ ಮ್ಯಾನೇಜರ್‌ ಅಸಂಕ ಗುರುಸಿನ್ಹ ಹೇಳಿದ್ದಾರೆ. ಗುಣರತ್ನೆ ಕೊಲಂಬೊ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.
ಮೊದಲ ದಿನದಾಟದ 14ನೇ ಓವರ್‌ ವೇಳೆ ಶಿಖರ್‌ ಧವನ್‌ ಕ್ಯಾಚ್‌ ಪಡೆಯುವ ಸಂದರ್ಭದಲ್ಲಿ ಗುಣರತ್ನೆ ಅವರಿಗೆ ಈ ಕಂಟಕ ಎದುರಾಗಿತ್ತು. ದ್ವಿತೀಯ ಸ್ಲಿಪ್‌ನಲ್ಲಿದ್ದ ಗುಣರತ್ನೆ ಈ ಆಘಾತದಿಂದ ಕ್ಯಾಚನ್ನೂ ನೆಲಕ್ಕೆ ಚೆಲ್ಲಿದ್ದರು. ಆಗ ಧವನ್‌ ಗಳಿಕೆ ಕೇವಲ 31 ರನ್‌. ಇದರ ಲಾಭವೆತ್ತಿದ ಅವರು 190ರ ತನಕ ಬೆಳೆದರು.

ಅಸೇಲ ಗುಣರತ್ನೆ ಉತ್ತಮ ಫಾರ್ಮ್ನಲ್ಲಿದ್ದು, ಜಿಂಬಾಬ್ವೆ ಎದುರಿನ ಟೆಸ್ಟ್‌ ಪಂದ್ಯದ ದ್ವಿತೀಯ ಇನ್ನಿಂಗ್ಸ್‌ನಲ್ಲಿ ಅಜೇಯ 80 ರನ್‌ ಹೊಡೆದಿದ್ದರು.