ಕೆಲವೆಡೆ ಮಳೆ, ಉಳಿದೆಡೆ ಮೋಡ ಕವಿದ ವಾತಾವರಣ 

Team Udayavani, Jul 28, 2017, 8:15 AM IST

ಬೆಂಗಳೂರು: ರಾಜ್ಯದ ಬೆರಳೆಣಿಕೆಯಷ್ಟು ಪ್ರದೇಶಗಳಲ್ಲಿ ಮಾತ್ರ ಗುರುವಾರ ಮಳೆಯಾಗಿದ್ದು, ಉಳಿದ ಕಡೆ ಮೋಡ
ಕವಿದ ವಾತಾವರಣ ಇದೆ. ಇನ್ನೂ ಮೂರ್‍ನಾಲ್ಕು ದಿನ ಇದೇ ವಾತಾವರಣ ಮುಂದುವರಿಯಲಿದೆ.

ಶಿವಮೊಗ್ಗದ ಆಗುಂಬೆ, ದಕ್ಷಿಣ ಕನ್ನಡದ ಧರ್ಮಸ್ಥಳ, ಕೊಡಗಿನ ಮಡಿಕೇರಿ, ಭಾಗಮಂಡಲ, ಮಾದಾಪುರ,
ಸೋಮವಾರಪೇಟೆ, ಚಿಕ್ಕಮಗಳೂರಿನ ಎನ್‌.ಆರ್‌.ಪುರ, ಉತ್ತರ ಕನ್ನಡದ ಗೇರುಸೊಪ್ಪ, ಮಂಕಿ ಮತ್ತು ಜಗಲ್‌ಪೇಟೆ, ಶೃಂಗೇರಿ, ಕಮ್ಮರಡಿ,ಚಿಂತಾಮಣಿ, ಶಿಡ್ಲಘಟ್ಟದಲ್ಲಿ ಗರಿಷ್ಠ 3ರಿಂದ ಕನಿಷ್ಠ 1 ಸೆಂ.ಮೀ. ಮಳೆ ಗುರುವಾರ ಬೆಳಗ್ಗೆ ದಾಖಲಾಗಿದೆ ಎಂದು ಹವಾಮಾನ ಇಲಾಖೆ ಬೆಂಗಳೂರು ಪ್ರಾದೇಶಿಕ ಕಚೇರಿ ಪ್ರಕಟಣೆಯಲ್ಲಿ ತಿಳಿಸಿದೆ.

ಉತ್ತರ ಮತ್ತು ದಕ್ಷಿಣ ಒಳನಾಡಿನ ಬಹುತೇಕ ಪ್ರದೇಶಗಳಲ್ಲಿ ಒಣಹವೆ ಮುಂದುವರಿದಿದೆ. ಅಲ್ಲಲ್ಲಿ ತುಂತುರು ಮಳೆಯಾಗಿದ್ದು, ಮೂರ್‍ನಾಲ್ಕು ದಿನಗಳ ಹಿಂದೆ ಸುರಿದಿದ್ದ ಮಳೆಯಿಂದ ಜಲಾಶಯಗಳಿಗೆ ಒಳಹರಿವು ಬರುತ್ತಿದೆ.
ಆದರೆ, ಒಳಹರಿವು ಪ್ರಮಾಣ ಗುರುವಾರ ಕಡಿಮೆಯಾಗಿದೆ.