ಗಾಂಜಾ ಎಣ್ಣೆ ಮಾರುತ್ತಿದ್ದ ಕೇರಳಿಗರ ಬಂಧನ

Team Udayavani, Jul 31, 2017, 11:53 AM IST

ಬೆಂಗಳೂರು: ನಿಷೇಧಿತ ಮಾದಕ ದ್ರವ್ಯ ಗಾಂಜಾ ಎಣ್ಣೆ (ಹಾಶೀಶ್‌ ಆಯಿಲ್‌) ಮಾರಾಟ ಮಾಡುತ್ತಿದ್ದ ಕೇರಳ ಮೂಲದ ಇಬ್ಬರು ಆರೋಪಿಗಳನ್ನು ಆಗ್ನೇಯ ವಿಭಾಗದ ಪೊಲೀಸರು ಬಂಧಿಸಿದ್ದಾರೆ. ಕೇರಳದ ಕಣ್ಣೂರಿನ ಅಲಕೋಡಿಯ ನಿವಾಸಿ ಜಾನ್ಸನ್‌(31), ಇಡುಕ್ಕಿ ಜಿಲ್ಲೆಯ ಪೊನ್ನಾತ್ತಾಡಿಯ ಬಿಜು ಅಬ್ರಹಾಂ ಬಂಧಿತರು.

ಇವರಿಂದ 6.ಕೆ.ಜಿಯ 561 ಗ್ರಾಂ ತೂಕದ ಗಾಂಜಾ ಎಣ್ಣೆ ವಶಕ್ಕೆ ಪಡೆಯಲಾಗಿದೆ. ಕೇರಳದ ಮಲೆನಾಡು ಪ್ರದೇಶಗಳಲ್ಲಿ ರಬ್ಬರ್‌ ಫಾರಂಗಳಲ್ಲಿ ರಬ್ಬರ್‌ ಮರಗಳಿಂದ ಹಾಲನ್ನು ಟ್ಯಾಪಿಂಗ್‌ ಮಾಡಿ ರಬ್ಬರ್‌ ಉತ್ಪತ್ತಿ ಮಾಡುವ ಕೆಲಸ ಮಾಡುತ್ತಿದ್ದ ಆರೋಪಿಗಳು, ಆಗಾಗ್ಗೆ ನಗರಕ್ಕೆ ಬಂದು ಮಾದಕ ವಸ್ತುಗಳನ್ನು ಮಾರಾಟ ಮಾಡುತ್ತಿದ್ದರು.

ಕೆಲ ದಿನಗಳ ಹಿಂದೆ ತಾವರೆಕೆರೆ ಬಸ್‌ ನಿಲ್ದಾಣದ ಆಲದ ಮರದ ಕಟ್ಟೆಯ ಬಳಿ ಗಾಂಜಾ ಎಣ್ಣೆ ಮಾರಾಟ ಮಾಡಲು ಹೊಂಚು ಹಾಕಿ ಕುಳಿತಿದ್ದರು. ಈ ಬಗ್ಗೆ ಖಚಿತ ಮಾಹಿತಿ ಪಡೆದ ಸುದ್ದಗುಂಟೆ ಪಾಳ್ಯ ಠಾಣೆ ಇನ್‌ಸ್ಪೆಕ್ಟರ್‌ ಗಿರೀಶ್‌ ಮತ್ತು ತಂಡ ಆರೋಪಿಯನ್ನು ಬಂಧಿಸಿದೆ ಎಂದು ಆಗ್ನೇಯ ವಿಭಾಗ ಡಿಸಿಪಿ ಬೋರಲಿಂಗಯ್ಯ ತಿಳಿಸಿದ್ದಾರೆ.

ಏನಿದು ಆಶಿಷ್‌ ಆಯಿಲ್‌?
ಹಸಿ ಗಾಂಜಾ ಸೊಪ್ಪನ್ನು ಆಲ್ಕೋಹಾಲ್‌ನೊಂದಿಗೆ ಬೆರೆಸಿ ಅರೆದು ದ್ರವರೂಪಕ್ಕೆ ಪರಿವರ್ತಿಸಲಾಗುತ್ತದೆ. ಆಲ್ಕೋಹಾಲ್‌ ಅಂಶವು ಗಾಂಜಾ ದ್ರವದೊಂದಿಗೆ ಕರಗಿದ ನಂತರ ದ್ರವವನ್ನು ಕಾಯಿಸಿ ಕುದಿಸಿ ನೀರಿನ ಅಂಶ ಆವಿಯಾದ ನಂತರ ಎಣ್ಣೆ ರೂಪದ ಅಂಟು ದ್ರವ ಉತ್ಪತ್ತಿಯಾಗುತ್ತದೆ. ಇದನ್ನು ಫಿಲ್ಟರ್‌ ಮಾಡಿ ದ್ರವ ರೂಪದ ಶುದ್ಧ ಹಶೀಶ್‌ ಆಯಿಲ್‌ ತಯಾರಿಸಲಾಗುತ್ತಿದೆ. ಇದನ್ನು ಗಾಂಜಾ ಸೊಪ್ಪಿನಿಂದ ಬೇರ್ಪಡಿಸಿ ಎಣ್ಣೆ ಉತ್ಪತ್ತಿ ಮಾಡಲಾಗುತ್ತದೆ.

ಕೇರಳದ ಗುಡ್ಡಗಾಡು ಪ್ರದೇಶಗಳಲ್ಲಿ ಇದನ್ನು ಉತ್ಪತ್ತಿ ಮಾಡಲಾಗುತ್ತದೆ.1 ಕೆ.ಜಿ. ಎಣ್ಣೆ ಉತ್ಪತ್ತಿ ಮಾಡಲು ಸುಮಾರು 6 ಕೆ.ಜಿ.ಗಾಂಜಾ ಸೊಪ್ಪಿನ ಅಗತ್ಯವಿರುತ್ತದೆ. ಇದನ್ನು ಸಿಗರೇಟ್‌ಗೆ ಹಚ್ಚಿಕೊಂಡು ಸೇದುವುದರಿಂದ ಹೆಚ್ಚಿನ ಮತ್ತು ಬರುತ್ತದೆ. ಕಾಲೇಜು ವಿದ್ಯಾರ್ಥಿಗಳು-ಯುವ ಸಮುದಾಯದಿಂದ ಈ ಎಣ್ಣೆಗೆ ಬಾರಿ ಬೇಡಿಕೆ ಇದೆ.

ಕೇರಳದಲ್ಲಿ ಅಕ್ರಮವಾಗಿ ಅತಿ ಹೆಚ್ಚಾಗಿ ಮಾರಾಟ ಮಾಡಲಾಗುತ್ತದೆ. ಇದನ್ನೇ ಲಾಭವಾಗಿ ಮಾಡಿಕೊಂಡ ಆರೋಪಿಗಳು ಈ ದಂಧೆಯಲ್ಲಿ ತೊಡಗಿಸಿಕೊಂಡಿರುವ ವಿಚಾರಣೆಯಲ್ಲಿ ಕಂಡು ಬಂದಿದೆ. ನಗರದ ವಿವಿಧೆಡೆ ಆರೋಪಿಗಳು ಗಾಂಜಾ ಎಣ್ಣೆ ಮಾರಾಟ ಮಾಡಿರುವುದು ವಿಚಾರಣೆಯಿಂದ ತಿಳಿದು ಬಂದಿದೆ ಎಂದು ಅವರು ತಿಳಿಸಿದ್ದಾರೆ.