ಮುಳಿಗದ್ದೆ-ಚಕ್ಕರಗುಳಿ ರಸ್ತೆ  ಸ್ಥಿತಿ ಶೋಚನೀಯ

Team Udayavani, Aug 2, 2017, 8:20 AM IST

ಪೈವಳಿಕೆ: ಪೈವಳಿಕೆ ಗ್ರಾ.ಪಂ.ವ್ಯಾಪ್ತಿಯ ಮುಳಿಗದ್ದೆಯಿಂದ ಚಕ್ಕರ ಗುಳಿಗೆ ಹೋಗುವ ರಸ್ತೆಯು ಕಳೆದ 5-6 ವರ್ಷಗಳಿಂದ ಹೊಂಡ ಗುಂಡಿಗಳಿಂದ ಕೂಡಿದ್ದು, ಸಂಚಾರಕ್ಕೆ ಅಯೋಗ್ಯವಾಗಿದೆ. ಸಮರ್ಪಕ ಚರಂಡಿಯ ವ್ಯವಸ್ಥೆಯೂ ಇಲ್ಲದೆ ಮಳೆನೀರು ಸಂಪೂರ್ಣ ರಸ್ತೆಯಲ್ಲೇ ಹರಿಯುತ್ತಿದೆ.

ಪೈವಳಿಕೆ ಗ್ರಾ.ಪಂ.ನ ಸಂಬಂಧಪಟ್ಟವರಲ್ಲಿ ಈ ರಸ್ತೆಯ ದುಃಸ್ಥಿತಿ ಬಗ್ಗೆ ಸಾರ್ವಜನಿಕರು ಹಲವು ಬಾರಿ ಹೇಳಿದರೂ, ಅವರು ಇತ್ತ ಗಮನಹರಿಸುವುದೇ ಇಲ್ಲ ಎಂಬ ಆರೋಪ ಕೇಳಿಬಂದಿದೆ. ಆದ್ದರಿಂದ ಪಂಚಾಯತ್‌ ಅಧ್ಯಕ್ಷೆಯ ಗಮನಕ್ಕೆ ತರಲು ಸಿದ್ಧತೆ ನಡೆಯುತ್ತಿದೆ. ಈ ರಸ್ತೆಯ ಆಸುಪಾಸುಗಳಲ್ಲಿ  ಹೆಚ್ಚು  ಕಡಿಮೆ 30 ರಿಂದ 40ರಷ್ಟು ಮನೆಗಳಿದ್ದು, ಶೋಚನೀಯ ರಸ್ತೆಯಿಂದಾಗಿ ಇಲ್ಲಿನ ನಿವಾಸಿಗಳು ಭಾರೀ ಸಂಕಷ್ಟಪಡುತ್ತಿದ್ದಾರೆ. ಪ್ರಸ್ತುತ ರಸ್ತೆಯಲ್ಲಿ ಶಾಲಾ ವಾಹನಗಳು ಕೂಡ ಸಂಚರಿಸಲು ಒಪ್ಪುತ್ತಿಲ್ಲ  ಎಂಬಂತಾಗಿದೆ ಪರಿಸ್ಥಿತಿ. ಆದ್ದರಿಂದ ಮುಳಿಗದ್ದೆ – ಚಕ್ಕರಗುಳಿ ರಸ್ತೆಯನ್ನು ಕೂಡಲೇ ದುರಸ್ತಿಗೊಳಿಸಬೇಕು. ಸಂಬಂಧಪಟ್ಟ  ಅಧಿಕಾರಿಗಳು ಹಾಗೂ ಪಂಚಾಯತ್‌ನ ಜನಪ್ರತಿನಿಧಿಗಳು ಇನ್ನಾದರೂ ಈ ನಿಟ್ಟಿನಲ್ಲಿ  ಸ್ಪಂದಿಸದಿದ್ದಲ್ಲಿ  ಮುಂದಿನ ದಿನ ಗಳಲ್ಲಿ  ಭಾರತೀಯ ಜನತಾ ಯುವಮೋರ್ಚಾದ ಚಿಪ್ಪಾರುಪದವು ಸಮಿತಿ ನೇತೃತ್ವದಲ್ಲಿ  ಹೋರಾಟಕ್ಕೆ ತಯಾರು ನಡೆಸಬೇಕಾದೀತು ಎಂದು ಪ್ರಕಟನೆಯಲ್ಲಿ ಎಚ್ಚರಿಸಲಾಗಿದೆ.