ಎದ್ದು ಕುಳಿತ ದಳಪತಿ

Team Udayavani, Aug 2, 2017, 10:36 AM IST

ಪ್ರೇಮ್‌ “ದಳಪತಿ’ ಎಂಬ ಸಿನಿಮಾ ಒಪ್ಪಿಕೊಂಡಿದ್ದು ನಿಮಗೆ ನೆನಪಿರಬಹುದು. ಪ್ರಶಾಂತ್‌ ರಾಜ್‌ ನಿರ್ದೇಶನದ ಸಿನಿಮಾವಿದು. ಸುಮಾರು ಮೂರು ವರ್ಷಗಳ ಹಿಂದೆ ಆರಂಭವಾದ ಸಿನಿಮಾ, ಕಾರಣಾಂತರಗಳಿಂದ ತಡವಾಗುತ್ತಲೇ ಬಂದಿತ್ತು. ಈಗ “ದಳಪತಿ’ ಮತ್ತೆ ಎದ್ದು ಕೂತಿದ್ದಾನೆ.

ಬಾಕಿ ಉಳಿದಿರುವ ದೃಶ್ಯಗಳ ಚಿತ್ರೀಕರಣ ಕೂಡಾ ಆರಂಭವಾಗಿದ್ದು, ಈಗ ಚಿತ್ರತಂಡ ಆಡಿಯೋ ರಿಲೀಸ್‌ ಮಾಡಲು ಮುಂದಾಗಿದೆ. ಹೌದು, “ದಳಪತಿ’ ಚಿತ್ರದ ಆಡಿಯೋ ರಿಲೀಸ್‌ ಮಾಡಲು ಪ್ರಶಾಂತ್‌ ರಾಜ್‌ ನಿರ್ಧರಿಸಿದ್ದು, ಸದ್ಯದಲ್ಲೇ ಆಗಲಿದೆ. ಈ ಮೂಲಕ ತುಂಬಾ ದಿನಗಳ ನಂತರ ಪ್ರೇಮ್‌ ಸಿನಿಮಾವೊಂದು ಸದ್ದು ಮಾಡಿದಂತಾಗುತ್ತದೆ. 

“ದಳಪತಿ’ ಚಿತ್ರ ಆ್ಯಕ್ಷನ್‌ ಹಿನ್ನೆಲೆಯಿಂದ ಕೂಡಿದ್ದು, ಚಿತ್ರದಲ್ಲಿ ಕೃತಿ ಕರಬಂದ ನಾಯಕಿಯಾಗಿ ನಟಿಸಿದ್ದಾರೆ. ಈ ಚಿತ್ರದಲ್ಲಿ ಪ್ರೇಮ್‌ ಅವರ ಗೆಟಪ್‌ ಕೂಡಾ ಹೊಸ ರೀತಿಯಿಂದ ಕೂಡಿದೆಯಂತೆ. ಪ್ರೇಮ್‌ ಕೂಡಾ ಚಿತ್ರದ ಮೇಲೆ ಸಾಕಷ್ಟು ನಿರೀಕ್ಷೆ ಇಟ್ಟಿದ್ದಾರೆ.

ಈ ಸಿನಿಮಾ ಮೂಲಕ ದೊಡ್ಡ ಬ್ರೇಕ್‌ ಸಿಗುತ್ತದೆಂಬ ನಿರೀಕ್ಷೆ ಕೂಡಾ ಪ್ರೇಮ್‌ಗಿದೆ ಎಂದರೆ ತಪ್ಪಲ್ಲ. ಸದ್ಯ ಪ್ರಶಾಂತ್‌ ರಾಜ್‌ “ದಳಪತಿ’ ಕೆಲಸದಲ್ಲಿ ಬಿಝಿಯಾಗಿದ್ದು, ಅದು ಮುಗಿಯುತ್ತಿದ್ದಂತೆ ಗಣೇಶ್‌ ಅವರ “ಆರೆಂಜ್‌’ ಚಿತ್ರ ಆರಂಭಿಸಲಿದ್ದಾರೆ ಪ್ರಶಾಂತ್‌ ರಾಜ್‌. ಈ ಚಿತ್ರಕ್ಕೆ ಇನ್ನೂ ನಾಯಕಿಯ ಆಯ್ಕೆ ನಡೆದಿಲ್ಲ.