ಮೊದಲ ಸಿನಿಮಾದ ನಿರ್ಮಾಪಕರಿಗೆ ದರ್ಶನ್‌ ಸನ್ಮಾನ

Team Udayavani, Aug 8, 2017, 10:45 AM IST

ದರ್ಶನ್‌ 50ನೇ ಚಿತ್ರ “ಕುರುಕ್ಷೇತ್ರ’ ಭಾನುವಾರವಷ್ಟೇ ಸೆಟ್ಟೇರಿದೆ. ಸಹಜವಾಗಿಯೇ 50 ಸಿನಿಮಾಗಳನ್ನು ಪೂರೈಸಿದ ಖುಷಿ ದರ್ಶನ್‌ ಅವರಿಗಿದೆ. ದರ್ಶನ್‌ ಈಗ 50 ಸಿನಿಮಾದ ಚಿತ್ರೀಕರಣಕ್ಕೆ ಅಣಿಯಾಗುತ್ತಿದ್ದಾರೆ. ಹಾಗಂತ ತಮಗೆ ಮೊದಲು ಅವಕಾಶ ಕೊಟ್ಟ ನಿರ್ಮಾಪಕರನ್ನು ದರ್ಶನ್‌ ಮರೆತಿಲ್ಲ.

ಅದೇ ಕಾರಣಕ್ಕೆ ತಮಗೆ ಮೊದಲು ಅವಕಾಶ ಕೊಟ್ಟ ನಿರ್ಮಾಪಕರನ್ನು ತಮ್ಮ 50ನೇ ಸಿನಿಮಾದ ಮುಹೂರ್ತ ದಿನ ದರ್ಶನ್‌ ಸನ್ಮಾನಿಸಿದ್ದಾರೆ. ಹೌದು, ದರ್ಶನ್‌ ಅವರ ಮೊದಲ ಚಿತ್ರ “ಮೆಜೆಸ್ಟಿಕ್‌’ ನಿರ್ಮಿಸಿದ ನಿರ್ಮಾಪಕ ಎಂ.ಜಿ. ರಾಮಮೂರ್ತಿಯವರನ್ನು ದರ್ಶನ್‌ ತಮ್ಮ ಮನೆಯಲ್ಲಿ ಮೈಸೂರು ಪೇಟಾ ತೊಡಿಸಿ, ಹಾರ ಹಾಕಿ ಸನ್ಮಾನಿಸಿದ್ದಾರೆ.

“ಕುರುಕ್ಷೇತ್ರ’ ಚಿತ್ರದ ಮುಹೂರ್ತ ಮುಗಿಸಿಕೊಂಡು ಎಂ.ಜಿ.ರಾಮಮೂರ್ತಿಯವರನ್ನು ತಮ್ಮ ಜೊತೆಗೆ ಮನೆಗೆ ಕರೆದುಕೊಂಡು ಹೋದ ದರ್ಶನ್‌ ಅವರನ್ನು ಸನ್ಮಾನಿಸುವ ಮೂಲಕ ಮೊದಲ ಅವಕಾಶ ಕೊಟ್ಟಿದ್ದನ್ನು ನೆನಪಿಸಿಕೊಂಡಿದ್ದಾರೆ. ಈ ಕುರಿತು ಮಾತನಾಡುವ ದರ್ಶನ್‌, “ಇವತ್ತು 50ನೇ ಸಿನಿಮಾ ಆಗಿರಬಹುದು. ಆದರೆ, ಮೊದಲು ವೇದಿಕೆ ಹಾಕಿ ಕೊಟ್ಟವರು ರಾಮಮೂರ್ತಿಯವರು.

ಮೊದಲು ಅವಕಾಶ ಕೊಡೋದು ತುಂಬಾ ಮುಖ್ಯ. ಮೊದಲು ವೇದಿಕೆ ಹಾಕಿಕೊಟ್ಟವರನ್ನು, ಅವಕಾಶ ನೀಡಿದವರನ್ನು ನೆನಪಿಸಿಕೊಳ್ಳೋದು ನಮ್ಮ ಕರ್ತವ್ಯ. ಹಾಗಾಗಿ, 50ನೇ ಸಿನಿಮಾದ ಮುಹೂರ್ತ ದಿನ ಅವರಿಗೆ ಚಿಕ್ಕದಾಗಿ ಒಂದು ಸನ್ಮಾನ ಮಾಡಿದ್ದೇವೆ ಅಷ್ಟೇ’ ಎನ್ನುತ್ತಾರೆ. ಸದ್ಯ ದರ್ಶನ್‌ ಅವರ “ತಾರಕ್‌’ ಚಿತ್ರ ಬಿಡುಗಡೆಗೆ ರೆಡಿಯಾಗಿದ್ದು, ಸೆಪ್ಟೆಂಬರ್‌ನಲ್ಲಿ ತೆರೆಕಾಣಲಿದೆ.