ಅಜ್ಜನಾದ ದತ್ತಣ್ಣ!

Team Udayavani, Aug 9, 2017, 10:50 AM IST

ಹಿರಿಯ ಕಲಾವಿದ ದತ್ತಣ್ಣ ಈಗ “ಅಜ್ಜ’ ಆಗಿದ್ದಾರೆ. ಅರೇ, ಅದರಲ್ಲೇನು ವಿಶೇಷ ಎಂಬ ಪ್ರಶ್ನೆ ಎದುರಾಗಬಹುದು. ಅವರಿಗೆ ಅಜ್ಜನ ವಯಸ್ಸಾಗಿದೆ ನಿಜ. ಇದು ರೀಲ್‌ ಸುದ್ದಿ. ಅಂದರೆ, “ಅಜ್ಜ’ ಎಂಬ ಚಿತ್ರದಲ್ಲಿ ಅವರು ಅಜ್ಜನಾಗಿ ನಟಿಸುತ್ತಿದ್ದಾರೆ. ಕೆ.ಪಿ. ಚಿದಾನಂದ್‌ ನಿರ್ಮಾಣದ ಈ ಚಿತ್ರವನ್ನು ವೇಮಗಲ್‌ ಜಗನ್ನಾಥರಾವ್‌ ನಿರ್ದೇಶಿಸಿದ್ದಾರೆ. ಈಗಾಗಲೇ ಚಿತ್ರದ ಮೊದಲ ಹಂತದ ಚಿತ್ರೀಕರಣ ಮಡಿಕೇರಿ ಸುತ್ತ ಮುತ್ತ ಸುಮಾರು ಹದಿನೆಂಟು ದಿನಗಳ ಕಾಲ ನಡೆದಿದೆ.

ಇದೀಗ ಕುಮಟಾ, ಬಸರೂರು ಹಾಗೂ ಇತರ ಸ್ಥಳಗಳಲ್ಲಿ ಎರಡನೇ ಹಂತದ ಚಿತ್ರೀಕರಣಕ್ಕೆ ಸಜ್ಜಾಗಿದೆ ತಂಡ. “ಅಜ್ಜ’ ಎಂಬ ಶೀರ್ಷಿಕೆಗೆ “ಆನ್‌ ಟೋಲ್ಡ್‌ ರಿಯಲ್‌ ಮಿಸ್ಟರಿ’ ಎಂಬ ಅಡಿಬರಹವಿದೆ. ಇದೊಂದು ಕುತೂಹಲದ ಕಥಾವಸ್ತು. ಇಲ್ಲಿ ಅಜ್ಜ, ಮಹಾನ್‌ ಬುದ್ದಿಜೀವಿ, ಟೆಲಿಪತಿ ಕೂಡಾ ಗೊತ್ತು, ಚಿತ್ರ ಬಿಡುಸುವುದರಲ್ಲಿಯೂ ನಿಸ್ಸೀಮ. ಅಜ್ಜನಿರುವ ಮನೆಗೆ ನಾಲ್ವರು ವೈದ್ಯಕೀಯ ವಿಧ್ಯಾರ್ಥಿಗಳು ಬರುತ್ತಾರೆ.

ಹಳ್ಳಿಯ ಗುಡ್ಡಗಾಡು ಪ್ರದೇಶದಲ್ಲಿ ಉಚಿತ ವೈದ್ಯಕೀಯ ಸೌಲಭ್ಯ ನೀಡುವ ಈ ವೈದ್ಯರ ತಂಡ ಒಂದು ಹಂತದಲ್ಲಿ ಹೇಗೆ ಸಿಕ್ಕಿ ಹಾಕಿಕೊಂಡು ಹೋರಾಟ ನಡೆಸುವ ಸಂದರ್ಭ ಎದುರಾಗುತ್ತೆ ಎಂಬುದು ಚಿತ್ರದ ಕಥಾ ಹಂದರವಂತೆ. ಚಿತ್ರದಲ್ಲಿ ಬೇಬಿ ಕೃತಿಶ್ರೀ, ದೀಪಕ್‌ ರಾಜ್‌, ರಾಜ್‌ ನವೀನ್‌, ಮಾಧುರಿ, ಆಶಿನಿ, ಲತೀಶ್‌ ಕೂರ್ಗ್‌ ಇತರರು ನಟಿಸಿದ್ದಾರೆ. ಸಾಯಿ ಕಿರಣ್‌ ಎರಡು ಹಾಡುಗಳಿಗೆ ಸಂಗೀತ ನೀಡಿದ್ದಾರೆ. ರಾಜು ಶಿರಾಳಕೊಪ್ಪಕ್ಯಾಮೆರಾ ಹಿಡಿದರೆ, ಶಿವಯಾದವ್‌ ಸಂಕಲನವಿದೆ.