ವಿಡಿಯೋ ಇಟ್ಟುಕೊಂಡು ಬೆದರಿಸುತ್ತಿದ್ದವನ ಬಂಧನ

Team Udayavani, Aug 11, 2017, 11:47 AM IST

ಬೆಂಗಳೂರು: ಮದುವೆಯಾಗುವುದಾಗಿ ನಂಬಿಸಿ ಮಾಡಿದ್ದ ವ್ಯಕ್ತಿಯೊಬ್ಬ ಈ ಹಿಂದೆ ತನ್ನೊಂದಿಗೆ ನಡೆಸಿದ್ದ ಲೈಂಗಿಕ ಕ್ರಿಯೆಯ ವಿಡಿಯೋವನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಾಕುವುದಾಗಿ ನನ್ನ ಪತಿ ಹಾಗೂ ನನಗೆ ಬೆದರಿಕೆ ಹಾಕುತ್ತಿದ್ದಾನೆ ಎಂದು ಆರೋಪಿಸಿ ಸಾಫ್ಟ್ವೇರ್‌ ಕಂಪೆನಿಯೊಂದರ ಉದ್ಯೋಗಿ ಪೊಲೀಸ್‌ ಠಾಣೆಯ ಮೆಟ್ಟಿಲೇರಿದ್ದಾರೆ. 

ಮಹಿಳೆ ನೀಡಿದ ದೂರಿನ ಅನ್ವಯ ಪ್ರಕರಣ ದಾಖಲಿಸಿಕೊಂಡು ಪೊಲೀಸರು ಪಣ್ಣಣಗೆರೆ ನಿವಾಸಿ ಗೌತಮ್‌ ಶ್ರೀವಾಸ್ತವ್‌ ಎಂಬಾತನನ್ನು ಬಂಧಿಸಿ ತನಿಖೆ ನಡೆಸುತ್ತಿದ್ದಾರೆ.ಆರೋಪಿ ಗೌತಮ್‌, ಹಾಗೂ ದೂರುದಾರ ಮಹಿಳೆ ರಶ್ಮಿ( ಹೆಸರು ಬದಲಿಸಲಾಗಿದೆ) 2006ರಿಂದ 2010ರ  ಅವಧಿಯಲ್ಲಿ ಪರಸ್ಪರ ಪ್ರೀತಿಸಿದ್ದಾರೆ.

ಈ ವೇಳೆ ಮಹಿಳೆಯ ಪ್ರೀತಿ ದುರುಪಯೋಗ ಪಡಿಸಿಕೊಂಡಿರುವ ಆರೋಪಿ ಆಕೆಯ ಜೊತೆ  ದೈಹಿಕ ಸಂಪರ್ಕ ಬೆಳೆಸಿದ್ದಾನೆ. ಈ ದೃಶ್ಯಗಳನ್ನು ಆಕೆಗೆ ಗೊತ್ತಾಗದಂತೆ ಮೊಬೈಲ್‌ನಲ್ಲಿ ಸೆರೆಹಿಡಿದುಕೊಂಡಿದ್ದಾನೆ. 2011ರಲ್ಲಿ ದೂರವಾದ ಇಬ್ಬರೂ, ಬೇರೆ ಬೇರೆ ವಿವಾಹವಾಗಿದ್ದಾರೆ.

ಆದರೆ ಇತ್ತೀಚೆಗೆ  ಮಹಿಳೆಯ ಗಂಡನನ್ನು ಪರಿಚಯ ಮಾಡಿಕೊಂಡ ಆರೋಪಿ ಗೌತಮ್‌, ಕ್ರಮೇಣ ಮಹಿಳೆಯ ಜೊತೆ ಪುನ: ದೈಹಿಕ ಸಂಪರ್ಕ ಮುಂದುವರಿಸಲು ದುಂಬಾಲು ಬಿದ್ದಿದ್ದಾನೆ. ಇದಕ್ಕೆ ಮಹಿಳೆ ನಿರಾಕರಿಸಿದ್ದಾಳೆ. ಇದರಿಂದ ಆಕ್ರೋಶಗೊಂಡ ಆರೋಪಿ ಗೌತಮ್‌, ತನ್ನ ಬಳಿಯಿದ್ದ ದೈಹಿಕ ಸಂಪರ್ಕದ  ವಿಡಿಯೋವನ್ನು ಮುಂದಿಟ್ಟುಕೊಂಡು, ತನ್ನ ಜೊತೆ ದೈಹಿಕ ಸಂಪರ್ಕ ಮುಂದುವರೆಸು ಇಲ್ಲದಿದ್ದರೆ ಕೇಳಿದಷ್ಟು ಹಣ ನೀಡಬೇಕು.

ಇಲ್ಲದಿದ್ದರೆ ದೈಹಿಕ ಸಂಪರ್ಕ ಹಾಗೂ ನಗ್ನ ಫೋಟೋಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಾಕುತ್ತೇನೆ ಎಂದು ಮಹಿಳೆ ಹಾಗೂ ಆಕೆಯ ಗಂಡನಿಗೆ ಕಿರುಕುಳ ನೀಡಿದ್ದಾನೆ ಎಂದು ದೂರುದಾರರು ಆರೋಪಿಸಿದ್ದಾರೆ ಎಂದು ಪೊಲೀಸರು ತಿಳಿಸಿದರು.