ಗೀತೋಪದೇಶ ಸಾರ್ವತ್ರಿಕ ಸತ್ಯ: ಮೈಗೂರ

Team Udayavani, Aug 15, 2017, 11:57 AM IST

ಧಾರವಾಡ: ಶ್ರೀಕೃಷ್ಣನ ಸಂದೇಶಗಳು ಜೀವನ ಸುಧಾರಣೆಯ ಉಪದೇಶಗಳಾಗಿದ್ದು, ಸಾರ್ವತ್ರಿಕ ಸತ್ಯವಾದ ಗೀತೋಪದೇಶಗಳು ವಿಶ್ವದಲ್ಲಿಯೇ ತತ್ವಜ್ಞಾನ ಭರಿತವಾಗಿವೆ ಎಂದು ಅಪರ ಜಿಲ್ಲಾ ಧಿಕಾರಿ ಇಬ್ರಾಹಿಂ ಮೈಗೂರ ಹೇಳಿದರು. ಜಿಲ್ಲಾಡಳಿತ, ಜಿಪಂ ಹಾಗೂ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಹಯೋಗದಲ್ಲಿ ಆಲೂರ ವೆಂಕಟರಾವ್‌ ಸಭಾಭವನದಲ್ಲಿ ಹಮ್ಮಿಕೊಂಡಿದ್ದ ಕೃಷ್ಣ ಜಯಂತಿ ಕಾರ್ಯಕ್ರಮ ಉದ್ಘಾಟಿಸಿ ಅವರು ಮಾತನಾಡಿದರು.

ಸಮಾಜದಲ್ಲಿ ಇರುವ ಸಮಸ್ಯೆಗಳನ್ನು ನಿವಾರಿಸಲು ಇದರಲ್ಲಿ ಮಾರ್ಗದರ್ಶನಗಳಿವೆ. ಅಂತಹ ಭಗವದ್ಗೀತೆ ಗ್ರಂಥ ಸಾರವನ್ನು ನಮ್ಮ ಜೀವನದಲ್ಲಿ ಅಳವಡಿಸಿಕೊಳ್ಳಬೇಕು ಎಂದರು. ಡಾ| ಭೀಮಸೇನಾವಾಚಾರ್ಯ ಮಳಗಿ ಉಪನ್ಯಾಸ ನೀಡಿ, ಕೃಷ್ಣ ಪರಮಾತ್ಮನಾಗಿದ್ದಾನೆ. ಶ್ರೀಕೃಷ್ಣ ಸಾûಾತ್‌ ಭಗವಂತ.

ಅವನು ಎಷ್ಟೇ ದೊಡ್ಡವನಾಗಿದ್ದರೂ ಎಲ್ಲರನ್ನೂ ಸಮಾನವಾಗಿ ಕಂಡನು. ಸಮಾಜದಲ್ಲಿನ ತಳ ವರ್ಗದವರೊಂದಿಗೆ ಒಡನಾಟ ಹೊಂದಿದ್ದ ಶ್ರೀಕೃಷ್ಣನು ಗೋಪಾಲ, ಗೋಪಿಕೆಯರನ್ನು ಬಿಟ್ಟು ಇರುತ್ತಿರಲಿಲ್ಲ. ಮಾನವೀಯ ಮೌಲ್ಯಗಳನ್ನು ಒಳಗೊಂಡ ಶ್ರೀಕೃಷ್ಣ, ದ್ವಾಪರಯುಗದಲ್ಲಿಯೂ ಮಹಿಳೆಯರಿಗೆ ಗೌರಯುತ ಸ್ಥಾನ ಮಾನ ಕಲ್ಪಿಸಿದ್ದನು.

ಅಂತಹ ಶ್ರೇಷ್ಠ ಸಂಸ್ಕೃತಿ ನಮ್ಮ ದೇಶದ್ದಾಗಿದೆ. ಮಾನವೀಯ ಮೌಲ್ಯಗಳನ್ನೊಳಗೊಂಡ ಶ್ರೀಭಗವದ್ಗೀತೆ ಗ್ರಂಥದ ತತ್ವಗಳನ್ನು ನಾವು ಜೀವನದಲ್ಲಿ ಅಳವಡಿಸಿಕೊಳ್ಳಬೇಕು ಎಂದರು. ಧಾರವಾಡ ಇಸ್ಕಾನ್‌ ಸಂಸ್ಥೆ ಉಪಾಧ್ಯಕ್ಷ ರಘು ಸ್ವಾಮಿ ಪ್ರಭು ಮಾತನಾಡಿ, ಕಲಿಯುಗದಲ್ಲಿ ಕಲಿಯುವುದು ಬಹಳ ಇದೆ.

ಕಲಿಯುವುದು ಕಷ್ಟದ ಕೆಲಸವಾಗಿದ್ದು, ಭಗವದ್ಗೀತೆ ತತ್ವಗಳನ್ನು ಜೀವನದಲ್ಲಿ ಅಳವಡಿಸಿಕೊಳ್ಳುವ ಅಗತ್ಯವಿದೆ ಎಂದು ಹೇಳಿದರು. ಪಂ| ಸೋಮಶೇಖರ ಮರಡಿಮಠ ಹಾಗೂ ಭಾರ್ಗವಿ ವೆಂಕಟೇಶ ಕುಲಕರ್ಣಿ ಅವರಿಂದ ಗಾಯನ ಜರುಗಿತು. ಕೋಟೂರ ಕ್ಷೇತ್ರ ತಾಪಂ ಸದಸ್ಯ ಮಹದೇವ ಪಂಡಿತ ಅಧ್ಯಕ್ಷತೆ ವಹಿಸಿದ್ದರು.

ಉಪವಿಭಾಗಾ ಧಿಕಾರಿ ಮಹೇಶ ಕರ್ಜಗಿ ಸ್ವಾಗತಿಸಿದರು. ಸಮಾಜದ ಮುಖಂಡ ರಂಗಸ್ವಾಮಿ ಪ್ರಭು, ಎಪಿಎಂಸಿ ಸದಸ್ಯರಾದ ಪಾರ್ವತಿ ಪಂಡಿತ ಇದ್ದರು. ತಹಶೀಲ್ದಾರ ಪ್ರಕಾಶ ಕುದರಿ ವಂದಿಸಿದರು. ಇದಕ್ಕೂ  ಮುನ್ನ ನಗರದ ಪ್ರಮುಖ ಬೀದಿಗಳಲ್ಲಿ ವಿವಿಧ ಜನಪದ ಕಲಾತಂಡಗಳೊಂದಿಗೆ ಶ್ರೀಕೃಷ್ಣ ಭಾವಚಿತ್ರದ ಮೆರವಣಿಗೆ ನಡೆಯಿತು.