ಹೊಸ ಚರ್ಚೆ: “ಋತು ವಿರಾಮ’

Team Udayavani, Aug 16, 2017, 12:35 PM IST

ಕಡೇಪಕ್ಷ, ಫ‌ಸ್ಟ್‌ ಡೇ ರಜೆ ಕೊಡಿ…
ಸುಜಲಾ ಘೋರ್ಪಡೆ 
ಹೆಂಗಸರಿಗೆ ಋತುಸ್ರಾವದ ಆ ದಿನಗಳಲ್ಲಿ ವಿಶ್ರಾಂತಿ ಅಗತ್ಯ ಬಹಳ ಇರುತ್ತದೆ. ಇದರಿಂದ ಆಕೆಯ ಮುಟ್ಟಿನ ದಿನ ಜಗಜ್ಜಾಹೀರಾಗುವುದು ದಿಟವೇ ಆದರೂ, ಅದರ ಬಗ್ಗೆ ಜಾಸ್ತಿ ತಲೆಕೆಡಿಸಿಕೊಳ್ಳುವ ಅಗತ್ಯವಿಲ್ಲ. ಋತುಚಕ್ರದ ವೇಳೆಗೆ ರಜೆ ಇಲ್ಲದೆಯೂ, ಹೆಣ್ಣು ತನಗೆ ವಹಿಸಿದ ಕೆಲಸವನ್ನು ಸಮರ್ಥವಾಗಿ ನಿಭಾಯಿಸಬಲ್ಲಳು. 

ಋತುಚಕ್ರದ ವೇಳೆ ಎಲ್ಲ ಸ್ತ್ರೀಯರಿಗೂ ಒಂದೇ ರೀತಿಯ ಸಮಸ್ಯೆ ಇರುವುದಿಲ್ಲ. ಕೆಲವರಿಗೆ ವಿಪರೀತ ಸ್ರಾವವಾಗಿ ಕಷ್ಟವಾದರೆ, ಮತ್ತೆ ಕೆಲವರು ಆ ದಿನಗಳನ್ನೂ ಆರಾಮದಿಂದಲೇ ಕಳೆಯುತ್ತಾರೆ. ಇನ್ನೂ ಕೆಲವರಿಗೆ ಈ ಮೊದಲನೇ ದಿನವೆಂಬುದು ಯಮಯಾತನೆಯ ಪರಿಸ್ಥಿತಿ. ಯಾರಲ್ಲೂ ಹೇಳಿಕೊಳ್ಳಲಾಗದಂಥದ್ದು. ನಮ್ಮ ಕಾಲದಲ್ಲಿ ಹೆಣ್ಮಕ್ಕಳು ಬಲಿಷ್ಠರಾಗಿದ್ದರಿಂದ, ಆ ನೋವನ್ನೆಲ್ಲ ತಡೆದುಕೊಳ್ಳುವ ಶಕ್ತಿ ಇರುತ್ತಿತ್ತು. ಎಲ್ಲರ ಮುಂದೆ ಚಾಪೆ- ಚೊಂಬಿನ ಜೊತೆ ಮೂಲೆಯಲ್ಲಿ ಕುಳಿತರೂ, ಏನೂ ಅನ್ನಿಸುತ್ತಿರಲಿಲ್ಲ. ನಂತರದ ದಿನಗಳಲ್ಲಿ ಅದು ಗುಟ್ಟಿನ ವಿಚಾರವೇ ಆಗಿಹೋಯಿತು. ಹೊರಗೆ ಕೂರದೇ, ಒಳಗಡೆ ಇದ್ದು, ಹಿರಿಯರ ದೃಷ್ಟಿಯಲ್ಲಿ ಅಪರಾಧಿಯಾದರೂ ನಾಚಿಕೆಯಿಂದ ಸುಮ್ಮನೆ ಇರಬೇಕಾಯಿತು.

ಆದರೆ, ಈಗ ಔದ್ಯೋಗಿಕ ಮಹಿಳೆಗೆ ಮಾನಸಿಕ ಒತ್ತಡ ಹೆಚ್ಚು. ಈ ಮಾನಸಿಕ ಒತ್ತಡದ ಜತೆಗೆ ಕೆಲಸದ ಒತ್ತಡವೂ ಸೇರಿ ಆಕೆ ಕಳೆಗುಂದಿದಂತೆ ಅನ್ನಿಸುತ್ತಾಳೆ. ಇದರೊಂದಿಗೆ ನೋವು ಕೂಡ ಜತೆಯಾದರೆ, ಕಚೇರಿ ಕೆಲಸದ ಹೆಣ್ಣು ಸಿಡಿಮಿಡಿಗೊಳ್ಳುವುದು ಸಹಜ. ಹಿಂದಿನ ಕಾಲದವರು ಮಾಡಿದ ಎಲ್ಲ ನಿರ್ಧಾರಗಳೂ ವೈಜ್ಞಾನಿಕ ದೃಷ್ಟಿಯಿಂದ ಸರಿಯಾಗಿಯೇ ಇತ್ತು. ಆ ದಿನಗಳಲ್ಲಿ ಸ್ತ್ರೀಯರು ಸುಮ್ಮನೆ ಕುಳಿತೋ ಅಥವಾ ಮಲಗಿಯೋ ಆ ಮೂರು ದಿನಗಳನ್ನು ಕಳೆಯಬಹುದಿತ್ತು. ಆದರೆ, ಈಗ ಹಾಗಾಗುವುದಿಲ್ಲ. ಮೊದಲಿನಂತೆ ಈಗ ಅವಿಭಕ್ತ ಕುಟುಂಬಗಳೂ ಇಲ್ಲ. ಇಲ್ಲಿ ಎಲ್ಲವನ್ನೂ ಆ ಮನೆಯೊಡತಿಯೇ ನಿಭಾಯಿಸಬೇಕಾಗುತ್ತದೆ. ಬೇರೆ ದೇಶಗಳಲ್ಲಿ ಇರುವಂತೆ, ನಮ್ಮ ಭಾರತದಲ್ಲೂ “ಋತುವಿರಾಮ’ವನ್ನು ಜಾರಿಗೆ ತಂದರೆ, ಅದು ಖುಷಿಯ ಸಂಗತಿ. ಕಡೆಯ ಪಕ್ಷ ಋತುಚಕ್ರದ ಮೊದಲನೇ ದಿನಕ್ಕಾದರೂ ರಜೆ ನೀಡಬೇಕು ಎನ್ನುವುದು ನನ್ನ ಅಭಿಪ್ರಾಯ.