ಮೋದಿಗೆ ಮಾತನಾಡಲು ಏನೂ ಇಲ್ಲ; ಭಾಷಣ ಚುಟುಕಾಗ್ತಿದೆ: ರಾಹುಲ್‌

Team Udayavani, Aug 16, 2017, 5:46 PM IST

ಹೊಸದಿಲ್ಲಿ : ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಹೇಳಲು ಹೊಸ ವಿಷಯವೇನೂ ಇಲ್ಲದಿರುವುದರಿಂದ ಅವರು ಈ ಬಾರಿ ದಿಲ್ಲಿಯ ಕೆಂಪು ಕೋಟೆಯ ಮೇಲಿಂದ ಸ್ವಾತಂತ್ರ್ಯ ದಿನದಂದು ಮಾಡಿರುವ ಭಾಷಣವು ಅವರ ಈ ವರೆಗಿನ ಭಾಷಣದಲ್ಲೇ ಕಡಿಮೆ ಅವಧಿಯದ್ದಾಗಿದೆ ಎಂದು ಕಾಂಗ್ರೆಸ್‌ ಉಪಾಧ್ಯಕ್ಷ ರಾಹುಲ್‌ ಗಾಂಧಿ ಟೀಕಿಸಿದ್ದಾರೆ. 

ಕೆಂಪು ಕೋಟೆಯ ಮೇಲಿಂದ ಮೋದಿ ಮಾಡಿರುವ ಭಾಷಣಗಳಲ್ಲಿ ಈ ಬಾರಿಯ ಭಾಷಣ ಅತ್ಯಂತ ಕಿರಿದಾಗಿತ್ತು ಎಂಬುದನ್ನು ಕಾಂಗ್ರೆಸ್‌ ಅಧ್ಯಕ್ಷೆ ಸೋನಿಯಾ ಗಾಂಧಿ ನನಗೆ ತಿಳಿಸಿದರು ಎಂದು ರಾಹುಲ್‌ ಹೇಳಿದರು.

ಸ್ವಾತಂತ್ರ್ಯ ದಿನದಂದು ಮೋದಿ ಈ ಬಾರಿ ಕೆಂಪು ಕೋಟೆಯ ಮೇಲಿಂದ ಮಾಡಿದ ಭಾಷಣವು ಕೇವಲ 56 ನಿಮಿಷದ್ದಾಗಿತ್ತು. ಈ ವರೆಗೆ ಪ್ರಧಾನಿಯಾಗಿ ಅವರು ಇಲ್ಲಿಂದ ಮಾಡಿರುವ ನಾಲ್ಕು  ಭಾಷಣಗಳ ಪೈಕಿ ಈ ಬಾರಿಯದ್ದು ಕಿರು ಅವಧಿಯದ್ದಾಗಿತ್ತು. 

ಎನ್‌ಡಿಎ ಸರಕಾರದ ಆರೋಗ್ಯ ನೀತಿಗಳ ಫ‌ಲವಾಗಿ ಉತ್ತರ ಪ್ರದೇಶದ ಗೋರಖ್‌ಪುರದಲ್ಲಿ 90 ಶಿಶುಗಳು ಮೃತಪಟ್ಟದನ್ನು ಮೋದಿ ತನ್ನ ಭಾಷಣದಲ್ಲಿ ಜನರಿಗೆ ಹೇಳೇ ಇಲ್ಲ. ಕೆಲ ಸಮಯದ ಹಿಂದೆ ನಾನು ಗೋರಖ್‌ಪುರದಲ್ಲಿದ್ದೆ. ಆಗ ಅಲ್ಲಿನ ಆಸ್ಪತ್ರೆಗಳ ದುಃಸ್ಥಿತಿಯನ್ನು ಕಂಡು ಅದನ್ನು ಸುಧಾರಿಸುವಂತೆ ಮೋದಿ ಜೀ ಅವರನ್ನು ಕೇಳಿಕೊಂಡಿದ್ದೆ. ಆದರೆ ಅದಕ್ಕೆ ಅವರು ಸ್ಪಂದಿಸಲೇ ಇಲ್ಲ ಎಂದು ರಾಹುಲ್‌ ಕಿಡಿ ಕಾರಿದರು.