“ರಾಜರಥ’ವನ್ನೇರಿದ ಶ್ರುತಿ ಹರಿಹರನ್‌

Team Udayavani, Aug 23, 2017, 11:46 AM IST

ಇತ್ತೀಚೆಗಷ್ಟೇ ತಮಿಳಿನ ಜನಪ್ರಿಯ ನಟ ಆರ್ಯ, ಸ್ಯಾಂಡಲ್‌ವುಡ್‌ ಅಂಗಳಕ್ಕೆ ಕಾಲಿಟ್ಟಿರುವುದು ಮತ್ತು “ರಂಗಿತರಂಗ’ ಖ್ಯಾತಿಯ ಭಂಡಾರಿ ಸಹೋದರರ ಹೊಸ ಚಿತ್ರವಾದ “ರಾಜರಥ’ದಲ್ಲಿ ನಟಿಸಿರುವ ವಿಷಯ ಓದಿರಬಹುದು. ಈಗ ಚಿತ್ರತಂಡಕ್ಕೆ ಶ್ರುತಿ ಹರಿಹರನ್‌ ಅವರ ಸೇರ್ಪಡೆಯಾಗಿದೆ.

ಹೌದು, “ರಾಜರಥ’ ಚಿತ್ರಕ್ಕೆ ಇದೀಗ ಶ್ರುತಿ ಹರಿಹರನ್‌ ಅವರ ಸೇರ್ಪಡೆಯಾಗಿದ್ದು, ಶ್ರುತಿ ಚಿತ್ರೀಕರಣದಲ್ಲಿ ಭಾಗವಹಿಸಿದ್ದಾರೆ. ಈ ಚಿತ್ರದಲ್ಲಿ ಅವರ ಪಾತ್ರ ಏನು ಎಂಬ ವಿಷಯವನ್ನು ಅವರು ಬಿಟ್ಟುಕೊಟ್ಟಿಲ್ಲ. ಆರ್ಯ ಅವರ ಜೋಡಿಯಾಗಿ ಅವರು ನಟಿಸುತ್ತಾರಾ ಅಥವಾ ಅವರ ಬೇರೆ ಯಾವುದಾದರೂ ಪಾತ್ರದಲ್ಲಿ ಅವರು ನಟಿಸುತ್ತಿದ್ದಾರಾ ಎಂಬ ಕುತೂಹಲ ಈಗ ಎಲ್ಲರಲ್ಲೂ ಇದ್ದೇ ಇದೆ.

“ರಾಜರಥ’ ಚಿತ್ರದಲ್ಲಿ ನಿರೂಪ್‌ ಭಂಡಾರಿ, ಅವಂತಿಕಾ ಶೆಟ್ಟಿ, ರವಿಶಂಕರ್‌ ಮುಂತಾದವರು ನಟಿಸುತ್ತಿದ್ದು, ಚಿತ್ರಕ್ಕೆ ಅನೂಪ್‌ ಭಂಡಾರಿ ಕಥೆ-ಚಿತ್ರಕಥೆ ಬರೆದು ನಿರ್ದೇಶಿಸುವುದರ ಜೊತೆಗೆ ಸಂಗೀತವನ್ನೂ ಸಂಯೋಜಿಸಿದ್ದರು. ಚಿತ್ರವನ್ನು ಅಜಯ್‌ ರೆಡ್ಡಿ, ಅಂಜು ವಲ್ಲಭ್‌, ವಿಷ್ಣು ಡಾಕಪ್ಪಗರಿ, ಸತೀಶ್‌ ಶಾಸ್ತ್ರಿ ಮುಂತಾದವರು ನಿರ್ಮಿಸುತ್ತಿದ್ದಾರೆ. ಅಂದಹಾಗೆ, ಈ ಚಿತ್ರವು ಕನ್ನಡ ಮತ್ತು ತೆಲುಗಿನಲ್ಲಿ ಏಕಕಾಲಕ್ಕೆ ನಿರ್ಮಾಣವಾಗುತ್ತಿದೆ.