ಲೈಫ್ ಜೊತೆ ಒಂದು ಸೆಲ್ಫಿ ; ಸದ್ದಿಲ್ಲದೆ ಮುಗಿದ ಫೋಟೋಶೂಟ್‌ 

Team Udayavani, Aug 24, 2017, 12:48 PM IST

ದಿನಕರ್‌ ತೂಗುದೀಪ ಆರು ವರ್ಷದ ಬಳಿಕ ಮತ್ತೆ ಆ್ಯಕ್ಷನ್‌-ಕಟ್‌ ಹೇಳ್ಳೋಕೆ ಅಣಿಯಾಗಿರುವ ವಿಷಯ ಗೊತ್ತೇ ಇದೆ. “ಲೈಫ್ ಜೊತೆ ಒಂದು ಸೆಲ್ಫಿ’ ಹೆಸರಿನ ಈ ಚಿತ್ರದಲ್ಲಿ ಪ್ರೇಮ್‌, ಪ್ರಜ್ವಲ್‌ ಮತ್ತು ಹರಿಪ್ರಿಯಾ ನಟಿಸುತ್ತಿರುವುದು ಹಳೆಯ ವಿಷಯವೇ. ಹೊಸ ವಿಷಯವೇನೆಂದರೆ, ಚಿತ್ರದ ಮುಹೂರ್ತ ಆಗಸ್ಟ್‌ 31ಕ್ಕೆ ನಿಗದಿಯಾಗಿರುವುದು.

ಹೌದು, “ಲೈಫ್ ಜೊತೆ ಒಂದು ಸೆಲ್ಫಿ’ ಚಿತ್ರದ ಮುಹೂರ್ತ ಆಗಸ್ಟ್‌ 31ಕ್ಕೆ ಕಂಠೀರವ ಸ್ಟುಡಿಯೋದಲ್ಲಿ ನಡೆಯಲಿದೆ. ಈ ಸಮಾರಂಭಕ್ಕೆ ಚಿತ್ರರಂಗದ ಹಲವರು ಗಣ್ಯರು ಬಂದು ಹರಸಿ-ಹಾರೈಸಲಿದ್ದಾರೆ. ಈ ಮಧ್ಯೆ ಮಂಗಳವಾರ ಸಂಜೆ “ಲೈಫ್ ಜೊತೆ ಒಂದು ಸೆಲ್ಫಿ’ ಚಿತ್ರದ ಫೋಟೋಶೂಟ್‌ ಸದ್ದಿಲ್ಲದೆ ಆಗಿದೆ. ಈ ಫೋಟೋಶೂಟ್‌ ನಲ್ಲಿ ಪ್ರೇಮ್‌, ಹರಿಪ್ರಿಯಾ ಮತ್ತು ಪ್ರಜ್ವಲ್‌
ಭಾಗವಹಿಸಿದ್ದು, ಹಲವು ಭಂಗಿಗಳಲ್ಲಿ ಫೋಟೋಗಳನ್ನು ತೆಗೆಯಲಾಗಿದೆ.

ಲೈಫ್ ಜೊತೆ ಒಂದು ಸೆಲ್ಫಿ’ ಚಿತ್ರಕ್ಕೆ ದಿನಕರ್‌ ಪತ್ನಿ ಮಾನಸ ದಿನಕರ್‌ ಕಥೆ ಬರೆದಿದ್ದಾರೆ. ಆ ಕಥೆಗೆ ಚಿತ್ರಕಥೆ ಬರೆದು ನಿರ್ದೇಶನ ಮಾಡುತ್ತಿದ್ದಾರೆ ದಿನಕರ್‌. ಇನ್ನು, ಈ ಚಿತ್ರಕ್ಕೆ ಚಿಂತನ್‌ ಹಾಗೂ ರಘುಶಾಸ್ತ್ರಿ ಸಂಭಾಷಣೆ ಬರೆಯುತ್ತಿದ್ದಾರೆ. ಚಿತ್ರಕ್ಕೆ ಹರಿಕೃಷ್ಣ ಸಂಗೀತ ನೀಡುತ್ತಿದ್ದು, ಐದು ಹಾಡುಗಳಿವೆ. ನಾಗೇಂದ್ರಪ್ರಸಾದ್‌ ಗೀತೆಗಳನ್ನು ರಚಿಸಲಿದ್ದಾರೆ. ಕೆ.ಎಂ.ಪ್ರಕಾಶ್‌ ಚಿತ್ರಕ್ಕೆ ಸಂಕಲನ ಮಾಡಿದರೆ, ಈಶ್ವರಿ ಕುಮಾರ್‌ ಅವರ ಕಲಾನಿರ್ದೇಶನವಿದೆ. 

ಚಿತ್ರಕ್ಕೆ ಒಟ್ಟು 50 ದಿನಗಳ ಕಾಲ ಚಿತ್ರೀಕರಣ ನಡೆಯಲಿದ್ದು, ಆ ಪೈಕಿ 30 ದಿನಗಳ ಕಾಲ ಗೋವಾ ಹಾಗೂ 20 ದಿನ
ಬ್ಯಾಂಕಾಕ್‌ನಲ್ಲಿ ಚಿತ್ರೀಕರಣ ನಡೆಯಲಿದೆ. ಚಿತ್ರವನ್ನು ಸಮೃದ್ಧಿ ಮಂಜುನಾಥ್‌ ಅವರು ನಿರ್ಮಿಸುತ್ತಿದ್ದಾರೆ.