ಇದೀಗ ಸೆಕ್ಸಿಯಸ್ಟ್‌ ಲೆಕ್ಚರರ್‌ ಕ್ಲಾಸ್‌!

Team Udayavani, Aug 29, 2017, 6:15 AM IST

ಇದು ನಾನು ಐಐಟಿಯಲ್ಲಿ ಓದುತ್ತಿದ್ದಾಗ ನಡೆದ ಘಟನೆ. ಅದು ಬೆಳಗ್ಗಿನ ಮೆಕಾನಿಕ್ಸ್‌ ಕ್ಲಾಸ್‌. ಸಾಧಾರಣವಾಗಿ ಮೆಕಾನಿಕ್ಸ್‌ ಪಾಠವನ್ನು ಯಾರೂ ಕೇಳಿಸಿಕೊಳ್ಳುತ್ತಿರಲಿಲ್ಲ. ಅರ್ಧದಷ್ಟು ವಿದ್ಯಾರ್ಥಿಗಳು ನಿದ್ದೆಗೆ ಜಾರಿದರೆ, ಉಳಿದವರು ಪಕ್ಕದವರೊಡನೆ ಹರಟುತ್ತಿದ್ದರು. ನೋಟ್ಸ್‌, ಪಾಯಿಂಟ್ಸ್‌ಗಳನ್ನು ಬರೆದುಕೊಳ್ಳುವಂಥ ವಿದ್ಯಾರ್ಥಿಗಳಾರೂ ನಮ್ಮಲ್ಲಿ ಇರಲಿಲ್ಲ. ಆದರೆ, ಅವತ್ತೂಂದು ದಿನ ಹಾಗಾಗಲಿಲ್ಲ.

ಅವತ್ತು ಮೆಕಾನಿಕ್‌ ಲೆಕ್ಚರರ್‌ ತರಗತಿಗೆ ಬಂದರು. ಎಲ್ಲರಿಗೂ ಸ್ಟಡಿ ಮೆಟೀರಿಯಲ್‌ಗ‌ಳನ್ನು ಕೊಟ್ಟು, “ಇವತ್ತು ನಾನು ಮಾಡಬೇಕಾಗಿದ್ದ ವಿಷಯವೆಲ್ಲ ಈ ಮೆಟೀರಿಯಲ್‌ನಲ್ಲಿದೆ. ನೀವೇ ಓದಿಕೊಳ್ಳಿ. ವಿಷಯ ಏನೆಂದರೆ, ನಾನು ಡಿಪಾರ್ಟ್‌ಮೆಂಟ್‌ನ ಸೆಕ್ಸಿಯಸ್ಟ್‌ ಪ್ರೊಫೆಸರ್‌ ಅಂತ ಆಯ್ಕೆಯಾಗಿದ್ದೇನೆ. ಹಾಗಾಗಿ ನಾನಿವತ್ತು ಬರೀ ಸೆಕ್ಸ್‌ ಬಗ್ಗೆ ಮಾತಾಡ್ತೀನಿ. ಯಾರಿಗಾದ್ರೂ ಮುಜುಗರ ಆಗೋದಾದ್ರೆ ಪ್ಲೀಸ್‌ ಈಗಲೇ ಹೊರಗೆ ಹೋಗಿ’ ಅಂದರು.

ಇನ್ನೇನು ನಿದ್ದೆಗೆ ಜಾರಲಿದ್ದ ನಮಗೆಲ್ಲ ತಕ್ಷಣ ಎಚ್ಚರವಾಯ್ತು. ಇದೇನು ಲೆಕ್ಚರರ್‌ ಹೀಗೆ ಹೇಳ್ತಿದ್ದಾರೆ ಅಂತ ಆಶ್ಚರ್ಯ, ಏನೇನೆಲ್ಲಾ ಹೇಳ್ತಾರೋ ಅನ್ನುವ ಕುತೂಹಲ, ಇವತ್ತಂತೂ ಅವರ ಪಾಠ ಕೇಳಲೇಬೇಕೆಂಬ ಆಸೆ! ನನ್ನ ಹಾಗೂ ಗೆಳೆಯರ ಕಥೆ ಹೀಗಾದರೆ ಕ್ಲಾಸ್‌ನಲ್ಲಿದ್ದ ಮೂರೇ ಮೂರು ಹುಡುಗಿಯರು “ಇಶ್ಶೀ…’ ಎಂಬ ಮುಖಭಾವದೊಂದಿಗೆ ಗಡಿಬಿಡಿಯಿಂದ ಎದ್ದು ಹೋದರು. ಹುಡುಗರೆಲ್ಲ “ಸೆಕ್ಸಿಯೆಸ್ಟ್‌ ಪ್ರೊಫೆಸರ್‌’ ಏನು ಹೇಳುತ್ತಾರೆಂದು ಕಾದು ಕುಳಿತೆವು.

ಮೊದಲು ಲೆಕ್ಚರರ್‌ ರೋಮಿಯೊ- ಜೂಲಿಯೆಟ್‌ ಲವ್‌ ಸ್ಟೋರಿ ಹೇಳಿದರು. ಅವರಿಬ್ಬರ ನಡುವೆ ಹುಟ್ಟಿದ ಆಕರ್ಷಣೆಯನ್ನು ಮ್ಯಾಥಮೆಟಿಕಲ್‌ ಮಾಡೆಲ್‌ ಮೂಲಕ ವಿವರಿಸಿದರು. ಸೆಕ್ಸ್‌ ಬಗ್ಗೆ ಕೇಳುವ ಆಸೆಯಿಂದ ಕಿವಿಯರಳಿಸಿ ಕುಳಿತಿದ್ದ ನಮಗೆಲ್ಲ ಬರುಬರುತ್ತಾ ಲೆಕ್ಚರರ್‌ ಬರೀ ಗಣಿತದ ಬಗ್ಗೆಯೇ ಹೇಳತೊಡಗಿದ್ದನ್ನು ಕೇಳಿ ಬೋರ್‌ ಆಗತೊಡಗಿತು. ಕೊನೆಗೂ ಸೆಕ್ಸಿಯೆಸ್ಟ್‌ ಪ್ರೊಫೆಸರ್‌ ಹೇಳುವುದು ಬರೀ ಮ್ಯಾಥ್ಸ್ ಬಗ್ಗೆ ಮಾತ್ರ ಅಂತ ಗೊತ್ತಾದಾಗ, ಕ್ಲಾಸ್‌ ಮುಗಿದಿತ್ತು!

(ಮುಂಬೈ ಐಐಟಿ ವಿದ್ಯಾರ್ಥಿ ಹೇಳಿದ್ದು)