ಅತ್ಯಾಚಾರ ಅಪರಾಧಿಗೆ 20 ವರ್ಷ ಜೈಲುಶಿಕ್ಷೆ

Team Udayavani, Sep 1, 2017, 11:51 AM IST

ಬೆಂಗಳೂರು: ಕಳೆದ ಮೂರು ವರ್ಷಗಳ ಹಿಂದೆ  ನಂದಿನಿ ಲೇಔಟ್‌ನ ರಾಜೀವ್‌ ಗಾಂಧಿ ಪಾರ್ಕ್‌ನಲ್ಲಿ ಬಾಲಕಿ ಮೇಲೆ ಅತ್ಯಾಚಾರ ಎಸಗಿದ್ದ ಅಪರಾಧಿ ಮನೋಜ್‌ (22) ಎಂಬಾತನಿಗೆ 20 ವರ್ಷಗಳ ಕಠಿಣ ಜೈಲು ಶಿಕ್ಷೆ ವಿಧಿಸಿ ನಗರದ ಮಕ್ಕಳ ಸ್ನೇಹಿ ಪೋಕೊÕà ವಿಶೇಷ ನ್ಯಾಯಾಲಯ ಆದೇಶಿಸಿದೆ.

ಬಾಲಕಿ ಮೇಲೆ ಮನೋಜ್‌ ಅತ್ಯಾಚಾರ ಎಸಗಿರುವುದು ಸಾಬೀತುಪಡಿಸಲು ಪ್ರಾಸಿಕ್ಯೂಶನ್‌ ಸಫ‌ಲವಾಗಿದ್ದರಿಂದ ಗುರುವಾರ ವಿಶೇಷ ನ್ಯಾಯಾಲಯದ ನ್ಯಾಯಾಧೀಶರಾದ ವನಮಾಲಾ ಯಾದವ್‌, ಅಪರಾಧಿ ಮನೋಜ್‌ಗೆ 20 ವರ್ಷಗಳ ಕಠಿಣ ಕಾರಾಗೃಹ ಶಿಕ್ಷೆ, ಎರಡೂವರೆ ಸಾವಿರ ರೂ. ದಂಡ ವಿಧಿಸಿ ತೀರ್ಪು ನೀಡಿದರು. ಅಲ್ಲದೆ ಸಂತ್ರಸ್ಥ ಬಾಲಕಿಯ  ಸದ್ಯದ  ಸ್ಥಿತಿಗತಿಯ ಬಗ್ಗೆ ವರದಿ ನೀಡುವಂತೆ ಸರ್ಕಾರದ ಪರ ವಕೀಲರಿಗೆ ಸೂಚನೆ ನೀಡಿದೆ.

ಈ ಪ್ರಕರಣದ ಮತ್ತೋರ್ವ ಆರೋಪಿ ಲೋಕೇಶ್‌, ನ್ಯಾಯಾಲಯದ ವಿಚಾರಣಾ ಹಂತದಲ್ಲಿ ಜಾಮೀನು ಪಡೆದು ಜೈಲಿನಿಂದ ಬಿಡುಗಡೆಗೊಂಡಿದ್ದ. ಆದರೆ, ಅಪಘಾತದಲ್ಲಿ ಮೃತಪಟ್ಟಿದ್ದ. ಸರಕಾರಿ ಅಭಿಯೋಜಕರಾಗಿ ಎಸ್‌.ಎನ್‌ ಹಿರೇಮನಿ ವಾದ ಮಂಡಿಸಿದ್ದು, ಸಂತ್ರಸ್ಥ ಬಾಲಕಿಗೆ  ಹೆಚ್ಚಿನ ಪರಿಹಾರಕ್ಕೆ ಆದೇಶಿಸುವಂತೆ ಕೋರಿ ಪ್ರತ್ಯೇಕ ಅರ್ಜಿ ಸಲ್ಲಿಸಲಾಗುವುದು ಎಂದು ತಿಳಿಸಿದ್ದಾರೆ.

ಬಾಲಕಿ ಕೈಕಾಲು ಕಟ್ಟಿ ಅತ್ಯಾಚಾರ ಮಾಡಿದ್ದ ದುಷ್ಕರ್ಮಿಗಳು 
14 ವರ್ಷದ ಬಾಲಕಿ 2014ರ ಡಿಸೆಂಬರ್‌ 9ರಂದು ಸಂಜೆ 7 -30ರ ಸುಮಾರಿಗೆ ತಾನು ಕೆಲಸ ಮಾಡುತ್ತಿದ್ದ ಜೀರಿಗೆ ಪ್ಯಾಂಕಿಂಗ್‌ ಘಟಕದಲ್ಲಿ ಕೆಲಸ ಮುಗಿಸಿಕೊಂಡು ಮನೆಗೆ ನಡೆದುಕೊಂಡು ಹೋಗುತ್ತಿದ್ದಳು . ಈ ವೇಳೆ ಬೈಕ್‌ನಲ್ಲಿ ಬಂದು ಅಡ್ಡಗಟ್ಟಿದ್ದ ಆರೋಪಿಗಳಾದ ಮನೋಜ್‌ ಹಾಗೂ ಲೋಕೇಶ್‌, ಬಾಲಕಿಯ ವ್ಯಾನಿಟಿ ಬ್ಯಾಗ್‌ ಕಿತ್ತುಕೊಂಡು ವಾಪಾಸ್‌ ಕೊಡದೇ ಸತಾಯಿಸಿದ್ದರು. ಬಳಿಕ ಚಾಕು ತೋರಿಸಿದ ಆರೋಪಿಗಳು, ಬಾಲಕಿಯನ್ನು ರಾಜೀವ್‌ಗಾಂಧಿ ಪಾರ್ಕ್‌ಗೆ ಎಳೆದೊಯ್ದು ಕೈ ಕಾಲು ಕಟ್ಟಿ ಬಾಯಿಗೆ ಬಟ್ಟೆ ತುರುಕಿ ಅತ್ಯಾಚಾರ ಎಸಗಿದ್ದರು.

ಇತ್ತ ಮಗಳು ಮನೆಗೆ ಬಾರದಿದ್ದರಿಂದ ಕಂಗಲಾಗಿದ್ದ ಆಕೆಯ ತಂದೆ, ಪಾರ್ಕ್‌ ರಸ್ತೆಯಲ್ಲಿ ಮಗಳನ್ನು ಹುಡುಕಿಕೊಂಡು ಹೋಗಿ ಮಗಳ ಹೆಸರನ್ನು ಕೂಗುತ್ತಿದ್ದರು. ಇದನ್ನು ಅರಿತ ಆರೋಪಿಗಳು ಭಯದಿಂದ ಬಾಲಕಿಯನ್ನು ಅಲ್ಲೇ ಬಿಟ್ಟು ಪಾರ್ಕ್‌ನಿಂದ ಹೊರಗಡೆ ಓಡಿ ಬಂದಿದ್ದರು.  ಇದನ್ನು  ನೋಡಿದ ಬಾಲಕಿಯ ತಂದೆ ಅನುಮಾನದ ಮೇರೆಗೆ ಪಾರ್ಕ್‌ನೊಳಗೆ ಹೋಗಿ ನಡೆದಾಗ ಮಗಳು  ಕೈಕಾಲು ಕಟ್ಟಿದ್ದ ಸ್ಥಿತಿಯಲ್ಲಿ ಬಿದ್ದಿರುವುದು ಕಂಡು ಬಂದಿತ್ತು.

ಈ ಸಂಬಂಧ ಬಾಲಕಿಯ ಪೋಷಕರು ನೀಡಿದ್ದ ದೂರು ಆಧರಿಸಿ ತನಿಖೆ ನಡೆಸಿದ್ದ ನಂದಿನಿಲೇಔಟ್‌ ಠಾಣೆ ಪೊಲೀಸರು, ಬಾಲಕಿ ನೀಡಿದ ಮಾಹಿತಿ ಹಾಗೂ ಗುರುತಿನ ಆಧಾರದ ಮೇಲೆ  ಆರ್‌ಎಂಸಿ ಯಾರ್ಡ್‌ನಲ್ಲಿ ತರಕಾರಿ ವ್ಯಾಪಾರ ಮಾಡುತ್ತಿದ್ದ ಲೋಕೇಶ್‌ ಹಾಗೂ ಮನೋಜ್‌ನನ್ನು ಬಂಧಿಸಿ, ಇಬ್ಬರ ವಿರುದ್ಧವೂ ನ್ಯಾಯಾಲಯಕ್ಕೆ ದೋಷಾರೋಪ ಪಟ್ಟಿ ಸಲ್ಲಿಸಿದ್ದರು.