ಕಬಡ್ಡಿ ಆಟಕ್ಕಿಂತ ವೀಕ್ಷಕ ವಿವರಣೆ ಅನುಭವ ವಿಭಿನ್ನ

Team Udayavani, Sep 2, 2017, 3:55 AM IST

ದೇಶಿ ಕ್ರೀಡೆಯಾಗಿರುವ ಪ್ರೊ ಕಬಡ್ಡಿ ಈಗ ಕ್ರಿಕೆಟ್‌ನಷ್ಟೇ ಜನಪ್ರಿಯತೆ ಪಡೆಯುತ್ತಿದೆ. ಕಬಡ್ಡಿ ಅಂಕಣದಲ್ಲಿ ಮಿಂಚುತ್ತಿರುವ ಪ್ರತಿಭೆಗಳು ಈಗ ಅಭಿಮಾನಿಗಳ ಸ್ಟಾರ್‌ಗಳಾಗುತ್ತಿದ್ದಾರೆ. ಅದೇ ರೀತಿ ಕರಾವಳಿಯ ಹೆಮ್ಮೆಯ ಕಬಡ್ಡಿ ಪಟು ಮಮತಾ ಪೂಜಾರಿ ಕನ್ನಡದಲ್ಲಿ ವೀಕ್ಷಣೆ ವಿವರಣೆ ಮೂಲಕ ಮನೆಮಾತಾಗಿದ್ದಾರೆ. ಕನ್ನಡದ ಖಾಸಗಿ ಚಾನೆಲ್‌ವೊಂದರಲ್ಲಿ ಕಬಡ್ಡಿ ಪಂದ್ಯಾವಳಿ ನೇರ ಪ್ರಸಾರವಾಗುತ್ತಿದೆ. ಕನ್ನಡದ ಅವತರಣಿಕೆಯಲ್ಲಿ ಮಮತಾ ಪೂಜಾರಿ ಅವರು ಚಂದ್ರಮೌಳಿ ಕಣವಿ, ಸುಮೇಶ್‌ ಹಾಗೂ ಚಂದ್ರಶೇಖರ್‌ ತಂಡದೊಂದಿಗೆ ವೀಕ್ಷಕ ವಿವರಣೆ ನೀಡುತ್ತಿದ್ದಾರೆ. ಕಬಡ್ಡಿ ಆಟದ ಮೂಲಕ ಖ್ಯಾತಿಗಳಿಸಿರುವ ಮಮತಾ ಅವರು ಈಗ ಸ್ಪಷ್ಟವಾದ ಕನ್ನಡ ವೀಕ್ಷಕ ವಿವರಣೆಗೂ ಸೈ ಎನಿಸಿದ್ದಾರೆ. ಕಬಡ್ಡಿ ಕುರಿತ ಟಿವಿ ಶೋಗಳಲ್ಲಿ ಪಾಲ್ಗೊಂಡ ಅನುಭವವಿದ್ದರೂ, ಕನ್ನಡದಲ್ಲಿ ಇದೇ ಮೊದಲ ಬಾರಿಗೆ ವೀಕ್ಷಕ ವಿವರಣೆ ಮಾಡುತ್ತಿದ್ದಾರೆ. ಈ ಬಗ್ಗೆ ಅವರೊಂದಿಗೆ “ಉದಯವಾಣಿ’ ನಡೆಸಿದ ವಿಶೇಷ ಸಂದರ್ಶನ ಇಲ್ಲಿದೆ.

ಆಟಗಾರ್ತಿಯಾಗಿರುವ ನಿಮಗೆ ವೀಕ್ಷಕ ವಿವರಣೆ ಅನುಭವ ಹೇಗಿದೆ?
ಕಳೆದ ವರ್ಷ ಆಟಗಾರ್ತಿಯಾಗಿ ಪ್ರೊ ಕಬಡ್ಡಿಯಲ್ಲಿ ಪಾಲ್ಗೊಂಡ ನನಗೆ ಈ ಬಾರಿ ವೀಕ್ಷಕ ವಿವರಣೆಗಾರ್ತಿಯಾಗಿ ಭಾಗವಹಿಸುವ ಅವಕಾಶ ಸಿಕ್ಕಿದೆ. ಆಟಕ್ಕಿಂತ ವೀಕ್ಷಕ ವಿವರಣೆ ವಿಭಿನ್ನ ಅನುಭವ ನೀಡಿದೆ. ಅದರಲ್ಲೂ ಕನ್ನಡದಲ್ಲಿ ವೀಕ್ಷಕ ವಿವರಣೆ ನೀಡುತ್ತಿರುವುದು ಖುಷಿ ಕೊಡುತ್ತಿದೆ.

ಮಹಿಳಾ ಪ್ರೊ ಕಬಡ್ಡಿಗೆ ಈ ಬಾರಿ ಅವಕಾಶ ನೀಡದ ಕುರಿತು?
ಖಂಡಿತವಾಗಲೂ ಪ್ರೊ ಕಬಡ್ಡಿಯಲ್ಲಿ ಆಟವಾಡುವುದನ್ನು ಮಿಸ್‌ ಮಾಡಿಕೊಳ್ಳುತ್ತಿದ್ದೇನೆ. ನನ್ನಂತೆ ಅನೇಕರು ಇದೇ ಭಾವನೆಯನ್ನು ವ್ಯಕ್ತಪಡಿಸಿದ್ದಾರೆ. ಮುಂದಿನ ಬಾರಿ ನಡೆಸುವ ಯೋಜನೆಯಿದೆ. ಆ ಕ್ಷಣ ಮತ್ತೆ ಬರಲಿದೆ ಎನ್ನುವ ನಂಬಿಕೆಯಿದೆ.

ಪುರುಷರ ಪಂದ್ಯಗಳನ್ನು ಕಡಿತಗೊಳಿಸಿ ಮಹಿಳೆಯರನ್ನು ಆಡಿಸಬಹುದಿತ್ತಲ್ಲ?
ಪುರುಷರಲ್ಲಿಯೂ ತುಂಬಾ ಮಂದಿ ಕಬಡ್ಡಿ ಆಟಗಾರರು ಬರುತ್ತಿದ್ದು, ಅದಕ್ಕಾಗಿ ಹೆಚ್ಚಿನ ತಂಡಗಳನ್ನು ಮಾಡಿದ್ದಾರೆ. ಹಾಗೆಯೇ ಸುದೀರ್ಘ‌ ಅವಧಿಯ ಟೂರ್ನಿಯನ್ನು ಆಯೋಜಿಸಲಾಗಿದೆ. ಆದರೆ ಮಹಿಳಾ ಕಬಡ್ಡಿಗೋಸ್ಕರ ಪುರುಷರಿಗೆ ಅನ್ಯಾಯ ಮಾಡುವುದು ಬೇಡ. ಪ್ರೊ ಕಬಡ್ಡಿಯಿಂದಾಗಿ ಈ ಕ್ರೀಡೆಗೆ ಬರುತ್ತಿರುವವರ ಸಂಖ್ಯೆಯೂ ಹೆಚ್ಚಾಗುತ್ತಿದೆ. ಅನೇಕ ಯುವಕರ ಬದುಕು ಉತ್ತಮ ಹಂತಕ್ಕೆ ತಲುಪಿದೆ. ಕುಟುಂಬಕ್ಕೂ ನೆರವಾಗುತ್ತಿದ್ದಾರೆ. ಆ ಬಗ್ಗೆ ಹೆಮ್ಮೆಯಿದೆ.

ಒಲಿಂಪಿಕ್ಸ್‌ನಲ್ಲಿ ಕಬಡ್ಡಿ ಸೇರಿಸುವ ಕುರಿತು ನಿಮ್ಮ ಅಭಿಪ್ರಾಯ ವೇನು?
ದೇಶಿ ಕ್ರೀಡೆಯಾಗಿರುವ ಕಬಡ್ಡಿಯನ್ನು 2020ರ ಒಲಿಂಪಿಕ್ಸ್‌ನಲ್ಲಾದರೂ ಸೇರಿಸುವ ಆಶಾಭಾವನೆಯಿತ್ತು. ಕಬಡ್ಡಿ ಅಸೋಸಿಯೇಶನ್‌ ಹಲವು ವರ್ಷಗಳಿಂದ ಒಲಿಂಪಿಕ್ಸ್‌ನಲ್ಲಿ ಸೇರಿಸಬಹುದೆಂಬ ನಂಬಿಕೆ  ಇದೆ. ಆದರಿದು ಸಾಧ್ಯವಾಗುತ್ತಿಲ್ಲ. ನಮಗಲ್ಲದಿದ್ದರೂ, ಮುಂದಿನ ವರ್ಷಗಳಲ್ಲಿ ನಾವು ಕಲಿಸಿದ ಕ್ರೀಡಾಳುಗಳಿಗಾದರೂ ಆಡುವ ಭಾಗ್ಯ ಸಿಗಲಿ.

ಪ್ರೊ ಕಬಡ್ಡಿಯಲ್ಲಿ ನಿಮ್ಮ ನೆಚ್ಚಿನ ತಂಡ ಯಾವುದು?
ನಮ್ಮ ರಾಜ್ಯದ ತಂಡವಾಗಿರುವ ಬೆಂಗಳೂರು ಬುಲ್ಸ್‌ ನಿಸ್ಸಂದೇಹವಾಗಿ ನನ್ನ ನೆಚ್ಚಿನ ತಂಡ. ಬೆಂಗಳೂರು ಬುಲ್ಸ್‌ ತಂಡವೇ ಗೆಲ್ಲಲಿ ಎಂದು ಹಾರೈಸುತ್ತೇನೆ. ಆದರೆ ಉತ್ತಮ ಆರಂಭ ಪಡೆದಿದ್ದ ಬೆಂಗಳೂರು ಈಗ ಸೋಲುತ್ತಿರುವುದು 
ಬೇಸರ ತರಿಸಿದೆ. ಮುಂದಿನ ದಿನಗಳಲ್ಲಿ ಗೆಲ್ಲುವ ಸಾಧ್ಯತೆಯಿದೆ. ಹೆಚ್ಚಿನ ಎಲ್ಲ ತಂಡ ಗಳಲ್ಲಿ ಕರ್ನಾಟಕದವರೇ ಪ್ರಮುಖವಾಗಿ ಲೀಡ್‌ ಮಾಡುತ್ತಿದ್ದಾರೆ. ಗುಜರಾತ್‌ ತಂಡದಲ್ಲಿ ಸುಕೇಶ್‌ ಹೆಗ್ಡೆ, ಯುಪಿ ಯೋಧಾದಲ್ಲಿ ರಿಶಾಂಕ್‌ ದೇವಾಡಿಗ, ಯು ಮುಂಬಾದಲ್ಲಿ ಶಬ್ಬೀರ್‌ ಬಾಪು ಮಿಂಚುತ್ತಿರುವುದು ಖುಷಿ ಕೊಟ್ಟಿದೆ.

ನಿಮ್ಮ ಪ್ರಕಾರ ಈ ಬಾರಿ ಚಾಂಪಿಯನ್‌ ಆಗುವ ತಂಡ ಯಾವುದು?
ಸುದೀರ್ಘ‌ ಪಂದ್ಯಾವಳಿಯಲ್ಲಿ ಈಗಲೇ ನಿರ್ದಿಷ್ಟವಾಗಿ ಚಾಂಪಿಯನ್‌ ತಂಡವನ್ನು ನಿರ್ಧರಿಸುವುದು ಸವಾಲಿನ ಸಂಗತಿ. ಆದರೂ ಬೆಸ್ಟ್‌ 4 ತಂಡಗಳೆಂದರೆ- ಸುಕೇಶ್‌ ಹೆಗ್ಡೆ ನಾಯಕತ್ವದ ಗುಜರಾತ್‌ ಸೂಪರ್‌ ಜೈಂಟ್ಸ್‌, ರಾಜ್ಯದವರೇ ಕೋಚ್‌ ಆಗಿರುವ ಬಿ.ಸಿ. ರಮೇಶ್‌ ಅವರ ಪುಣೇರಿ ಪಲ್ಟಾನ್ಸ್‌, ಪಟ್ನಾ ಪೈರೇಟ್ಸ್‌ ಹಾಗೂ ಬೆಂಗಳೂರು ಬುಲ್ಸ್‌ ತಂಡಗಳಾಗಿವೆ.

ವೀಕ್ಷಕ ವಿವರಣೆ ಬಗ್ಗೆ ಕುಟುಂಬ ಹಾಗೂ ಊರವರ ಪ್ರತಿಕ್ರಿಯೆ ಹೇಗಿದೆ?
ಕಬಡ್ಡಿ ಟೂರ್ನಿಯಿಂದಾಗಿ ಊರಿಗೆ ಹೋಗದೆ ತುಂಬಾ ದಿನಗಳಾಗಿವೆ. ಆದರೆ ಪ್ರತಿದಿನ ಪಂದ್ಯಕ್ಕೂ ಮುನ್ನ ನಡೆಯುವ ಪ್ರಿ-ಶೋದಲ್ಲಿ ಮನೆಯವರು ನೋಡಲು ಕಾಯುತ್ತಿರುತ್ತಾರೆ. ಕನ್ನಡ ವೀಕ್ಷಕ ವಿವರಣೆ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸುತ್ತಾರೆ.

 ವೀಕ್ಷಕ ವಿವರಣೆಗೆ ನಿಮ್ಮನ್ನು ಆಯ್ಕೆ ಮಾಡಿದ ಬಗ್ಗೆ?
ಕಳೆದ ಬಾರಿಯೂ ವೀಕ್ಷಕ ವಿವರಣೆಗೆ ಕರೆದಿದ್ದರೂ ಆಟವಿದ್ದುದರಿಂದ ಹೋಗಿರಲಿಲ್ಲ. ಈ ಬಾರಿ ವೀಕ್ಷಕ ವಿವರಣೆ ಮೂಲಕ ಪ್ರೊ ಕಬಡ್ಡಿ ಭಾಗವಾಗಿರುವುದು ಖುಷಿ ಕೊಡುತ್ತಿದೆ. ಕನ್ನಡದಲ್ಲಿ ವೀಕ್ಷಕ ವಿವರಣೆ ಕೊಡುತ್ತಿರುವ ಏಕೈಕ ಮಹಿಳೆಯಾಗಿದ್ದು, ಆ ಬಗ್ಗೆ ಹೆಮ್ಮೆಯಿದೆ. ಮೊದಲ 10 ದಿನ ತರಬೇತಿ ನೀಡಲಾಗುತ್ತಿತ್ತು. ವಾಯ್ಸ ಮಾಡ್ಯುಲೇಶನ್‌ ಕುರಿತು ತಿಳಿದುಕೊಳ್ಳಲು ನೆರವಾಯಿತು. ಕ್ರಿಕೆಟ್‌ ಸಹಿತ ಎಲ್ಲ ರೀತಿಯ ವೀಕ್ಷಕ ವಿವರಣೆ ಅನುಭವ ಇರುವ ಚಂದ್ರಮೌಳಿ ಕಣವಿ ಅವರೊಂದಿಗೆ ವೀಕ್ಷಕ ವಿವರಣೆಗೆ ಅವಕಾಶ ಸಿಕ್ಕಿದೆ.

 ಪ್ರಶಾಂತ್‌ ಪಾದೆ