ಶೆಲ್ಬಿ-ಗವ್ರಿಲೋವಾ ಮ್ಯಾರಥಾನ್‌ ಮ್ಯಾಚ್‌

Team Udayavani, Sep 2, 2017, 11:33 AM IST

ನ್ಯೂಯಾರ್ಕ್‌: ಗುರುವಾರ ರಾತ್ರಿಯ ಯುಎಸ್‌ ಓಪನ್‌ ವನಿತಾ ಸಿಂಗಲ್ಸ್‌ ಪಂದ್ಯವೊಂದು ಮ್ಯಾರಥಾನ್‌ ಆಟಕ್ಕೆ ಸಾಕ್ಷಿಯಾಯಿತು. ಆತಿಥೇಯ ಅಮೆರಿಕದ ಶೆಲ್ಬಿ ರೋಜರ್ ಹಾಗೂ ರಶ್ಯನ್‌ ಮೂಲದ ಆಸ್ಟ್ರೇಲಿಯದ ಆಟಗಾರ್ತಿ ಡರಿಯಾ ಗವ್ರಿಲೋವಾ ನಡುವಿನ 2ನೇ ಸುತ್ತಿನ ಪಂದ್ಯ ಒಟ್ಟು 3 ಗಂಟೆ, 33 ನಿಮಿಷಗಳ ಕಾಲ ಸಾಗಿ ನೂತನ ನ್ಯೂಯಾರ್ಕ್‌ ದಾಖಲೆ ನಿರ್ಮಿಸಿತು. ಇದನ್ನು ಶೆಲ್ಬಿ  7-6 (8-6), 4-6, 7-6 (7-5) ಅಂತರದಿಂದ ಗೆದ್ದರು. ಹಿಂದಿನ ಯುಎಸ್‌ ಓಪನ್‌ ದಾಖಲೆ 3 ಗಂಟೆ, 23 ನಿಮಿಷದ್ದಾಗಿತ್ತು. ಈ ಪಂದ್ಯ 2015ರಲ್ಲಿ ಬ್ರಿಟನ್ನಿನ ಜೊಹಾನ್ನಾ ಕೊಂಟಾ ಹಾಗೂ ಸ್ಪೇನಿನ ಗಾರ್ಬಿನ್‌ ಮುಗುರುಜಾ ನಡುವೆ ನಡೆದಿತ್ತು. ಅದು ಕೂಡ ದ್ವಿತೀಯ ಸುತ್ತಿನ ಪಂದ್ಯವಾಗಿತ್ತೆಂಬುದು ವಿಶೇಷ.

ಶೆಲ್ಬಿ ವಿರುದ್ಧ ಗೆಲುವು ಸಾಧಿಸುವ ಅವಕಾಶ ಗವ್ರಿಲೋವಾ ಮುಂದಿತ್ತು. ನಿರ್ಣಾಯಕ ಸೆಟ್‌ನಲ್ಲಿ ಅವರು 4-2ರ ಮುನ್ನಡೆಯಲ್ಲಿದ್ದರು. ಆದರೆ ಇದು ಟೈ-ಬ್ರೇಕರ್‌ಗೆ ವಿಸ್ತರಿಸಲ್ಪಡುವುದ ರೊಂದಿಗೆ ಶೆಲ್ಬಿ ಅದೃಷ್ಟ ಖುಲಾಯಿಸಿತು.

ನಂ.1 ಪ್ಲಿಸ್ಕೋವಾ ಮುನ್ನಡೆ 
ವಿಶ್ವದ ನಂ.1 ಆಟಗಾರ್ತಿ ಕ್ಯಾರೋಲಿನಾ ಪ್ಲಿಸ್ಕೋವಾ ದೊಡ್ಡ ಗಂಡಾಂತರವೊಂದರಿಂದ ಪಾರಾಗಿ 3ನೇ ಸುತ್ತು ತಲುಪಿದ್ದಾರೆ. ಅಮೆರಿಕದ ನಿಕೋಲ್‌ ಗಿಬ್ಸ್ ವಿರುದ್ಧದ ಮುಖಾಮುಖೀಯನ್ನು ಅವರು 2-6, 6-3, 6-4 ಅಂತರದಿಂದ ಗೆಲ್ಲುವಲ್ಲಿ ಯಶಸ್ವಿಯಾದರು. 2015ರಲ್ಲಿ ಇವರಿಬ್ಬರು ಸಿಡ್ನಿಯಲ್ಲಿ ಮುಖಾಮುಖೀಯಾದಾಗ ಗಿಬ್ಸ್ ಅಂದೂ ಅಂಕ ಗಳಿಸದೆ ಶರಣಾಗಿದ್ದರು. ಈ ಬಾರಿ ಪಂದ್ಯವನ್ನು 3 ಸೆಟ್‌ಗಳಿಗೆ ವಿಸ್ತರಿಸಿದ್ದು ಗಿಬ್ಸ್ ಅವರ ಮಹತ್ಸಾಧನೆ ಎನಿಸಿತು. ಕಳೆದ ವರ್ಷದ ರನ್ನರ್‌ ಅಪ್‌ ಆಗಿರುವ ಜೆಕ್‌ ಆಟಗಾರ್ತಿ ಪ್ಲಿಸ್ಕೋವಾ ಇನ್ನು ಚೀನದ ಶುಯಿ ಜಾಂಗ್‌ ವಿರುದ್ಧ ಸೆಣಸಲಿದ್ದಾರೆ. 

ಒಸ್ಟಾಪೆಂಕೊ ಮೂರರ ಓಟ
ಫ್ರೆಂಚ್‌ ಓಪನ್‌ ಚಾಂಪಿಯನ್‌, ಲಾತ್ವಿಯಾದ ಜೆಲೆನಾ ಒಸ್ಟಾಪೆಂಕೊ ಕೂಡ 3ನೇ ಸುತ್ತು ತಲುಪಿ ದ್ದಾರೆ. ಅವರು ರೊಮೇನಿಯಾದ ಸೊರಾನಾ ಕಿಸ್ಟಿì ವಿರುದ್ಧ 6-4, 6-4ರಿಂದ ಗೆದ್ದು ಬಂದರು. 

ಅಮೆರಿಕದ ಕೊಕೊ ವಾಂಡೇವೇಗ್‌, ಮ್ಯಾಡಿ ಸನ್‌ ಕೇಯ್ಸ, ಜೆನ್ನಿಫ‌ರ್‌ ಬ್ರಾಡಿ ಕೂಡ ದ್ವಿತೀಯ ಸುತ್ತು ದಾಟುವಲ್ಲಿ ಯಶಸ್ವಿಯಾಗಿದ್ದಾರೆ. ಇವರಲ್ಲಿ ಬ್ರಾಡಿ ಅವರದು ದೊಡ್ಡ ಮಟ್ಟದ ಸಾಧನೆ. ಅವರು 23ನೇ ಶ್ರೇಯಾಂಕದ ಜೆಕ್‌ ಆಟಗಾರ್ತಿ ಬಾಬೊìರಾ ಸ್ಟ್ರೈಕೋವಾಗೆ 6-1, 6-1ರಿಂದ ಆಘಾತವಿಕ್ಕಿದರು.  ಉಕ್ರೇನಿನ ಭರವಸೆಯ ಆಟಗಾರ್ತಿ ಎಲಿನಾ ಸ್ವಿಟೋಲಿನಾ ರಶ್ಯದ ಎವೆYನಿಯಾ ರೊಡಿನಾ ಅವರನ್ನು 6-4, 6-4ರಿಂದ ಮಣಿಸಿದರು. 

ಕುಜ್ನೆತ್ಸೋವಾ ಪರಾಭವ
ರಶ್ಯದ 8ನೇ ಶ್ರೇಯಾಂಕಿತೆ ಸ್ವೆತ್ಲಾನಾ ಕುಜ್ನೆತ್ಸೋವಾ ದ್ವಿತೀಯ ಸುತ್ತಿನಲ್ಲಿ ಸೋಲುಂಡು ನಿರ್ಗಮಿಸಿದ್ದಾರೆ. ಅವರನ್ನು ಜಪಾನಿನ ಕುರುಮಿ ನಾರಾ 6-3, 3-6, 6-3ರಿಂದ ಮಣಿಸಿದರು. ಪೋಲೆಂಡಿನ ಅಗ್ನಿಸ್ಕಾ ರಾದ್ವಂಸ್ಕಾ, ಜೆಕ್‌ ಗಣರಾಜ್ಯದ ಲೂಸಿ ಸಫ‌ರೋವಾ, ರಶ್ಯದ ಎಲೆನಾ ವೆಸ್ನಿನಾ, ಡರಿಯಾ ಕಸತ್ಕಿನಾ, ಜಪಾನಿನ ನವೋಮಿ ಒಸಾಕಾ ಮೊದಲಾದವರೆಲ್ಲ 3ನೇ ಸುತ್ತಿಗೆ ಮುನ್ನಡೆದಿದ್ದಾರೆ.