ಮೋದಿ ಸಂಪುಟ: ಎಐಎಡಿಎಂಕೆ, ಜೆಡಿಯು ಸೇರ್ಪಡೆ ಸಂದೇಹ

Team Udayavani, Sep 2, 2017, 4:16 PM IST

ಹೊಸದಿಲ್ಲಿ : ಎಲ್ಲರೂ ಕಾತರದಿಂದ ಎದುರು ನೋಡುತ್ತಿರುವ ಪ್ರಧಾನಿ ನರೇಂದ್ರ ಮೋದಿ ಸಂಪುಟ ಪುನಾರಚನೆಗೆ ಇನ್ನು  ಒಂದು ದಿನ ಮಾತ್ರವೇ ಬಾಕಿ ಇರುವಂತೆಯೇ ಜೆಡಿಯು ವಕ್ತಾರ ಕೆ ಸಿ ತ್ಯಾಗಿ ಅವರು, “ಸಂಪುಟದಲ್ಲಿ ನಾವು ಭಾಗಿಯಾಗುವ ಬಗ್ಗೆ ನಮಗಿನ್ನೂ ಮಾಹಿತಿ ಸಿಗಬೇಕಷ್ಟೇ’ ಎಂದು ಹೇಳಿದ್ದಾರೆ. 

“ನಮ್ಮ ಸಂಸದರು ದಿಲ್ಲಿಯಲ್ಲಿದ್ದಾರೆ; ಸಂಪುಟದಲ್ಲಿ ಭಾಗಿಯಾಗುವುದಕ್ಕೆ ನಮ್ಮ ಪಕ್ಷದ ಅಭ್ಯಂತರವೇನೂ ಇಲ್ಲ. ಸಂಪುಟ ಪುನಾರಚನೆ ನಾಳೆಯೇ ನಡೆಯಲಿದೆಯಾದರೂ ನಮಗಿನ್ನೂ ಯಾವುದೇ ಮಾಹಿತಿ ಬಂದಿಲ್ಲ’ ಎಂದು ತ್ಯಾಗಿ ಮಾಧ್ಯಮದೊಂದಿಗೆ ಮಾತನಾಡುತ್ತಾ ಹೇಳಿದರು.

ಜೆಡಿಯು ನಾಯಕರಾದ ಆರ್‌ ಸಿ ಪಿ ಸಿಂಗ್‌ ಮತ್ತು ರಾಮನಾಥ್‌ ಠಾಕೂರ್‌ ಅವರು ಕೇಂದ್ರ ಸಚಿವ ಸಂಪುಟವನ್ನು ಸೇರುವ ಸಾಧ್ಯತೆ ಇದೆ ಎಂದು ಇವತ್ತು ಬೆಳಗ್ಗೆ  ಹೇಳಲಾಗಿತ್ತು. 

ಇದೇ ವೇಳೆ ಎಐಎಡಿಎಂಕೆ ಕೂಡ ಕೇಂದ್ರ ಸಂಪುಟವನ್ನು ಸೇರುವ ಸಾಧ್ಯತೆ ಕಡಿಮೆ ಇದೆ. ಕಾರಣ ಆ ಪಕ್ಷದೊಳಗಿನ ಭಿನ್ನಮತ. ಟಿಟಿವಿ ದಿನಕರನ್‌ ಬಂಡಾಯದಿಂದಾಗಿ ಪಕ್ಷದಲ್ಲೀಗ ಗೊಂದಲ ಮಡುಗಟ್ಟಿರುವುದೇ ಇದಕ್ಕೆ ಕಾರಣವಾಗಿದೆ.