ನವೆಂಬರ್‌ನಿಂದ ಹೊಸ ಆ್ಯಪ್‌

Team Udayavani, Sep 7, 2017, 10:38 AM IST

ನಿರ್ಮಾಪಕರ ಅನುಕೂಲಕ್ಕೆ ಬುಕ್‌ಮೈಶೋ ಮಾದರಿಯಲ್ಲಿ ನಿರ್ಮಾಪಕರ ಸಂಘದಿಂದಲೇ ಹೊಸದೊಂದು ಆ್ಯಪ್‌ ಮಾಡುತ್ತಿರುವುದಾಗಿ ನಿರ್ಮಾಪಕರ ಸಂಘದ ಕಾರ್ಯದರ್ಶಿ ಸೂರಪ್ಪ ಬಾಬು ಹೇಳುತ್ತಾರೆ. “ಅಲ್ಲಿ ಒಂದು ಟಿಕೆಟ್‌ ಮೇಲೆ 30ರಿಂದ 40 ರೂಪಾಯಿ ಹೆಚ್ಚಿಗೆ ಪಡೆಯಲಾಗುತ್ತಿದೆ.

ಆ ದುಡ್ಡು ನಿರ್ಮಾಪಕರಿಗೂ ಬರುತ್ತಿಲ್ಲ.ಹಾಗಾಗಿ ಒಂದು ಆ್ಯಪ್‌ ಮಾಡಿ, ಅದರ ಮೂಲಕ ಟಿಕೆಟ್‌ ಮಾರುವ ಯೋಚನೆ ಇದೆ. ಇಲ್ಲಿ ಒಂದು ಟಿಕೆಟ್‌ಗೆ 15 ರೂಪಾಯಿ ಮಾತ್ರ ಜಾಸ್ತಿ ಪಡೆಯಲಾಗುತ್ತದೆ. ಐದು ರೂಪಾಯಿ ಚಿತ್ರಮಂದಿರಕ್ಕೆ, ಐದು ರೂಪಾಯಿ ನಿರ್ಮಾಪಕರಿಗೆ ಮತ್ತು ಐದು ರೂಪಾಯಿ ನಿರ್ಮಾಪಕರ ಸಂಘಕ್ಕೆ ಹಂಚಲಾಗುತ್ತದೆ.

ನಿರ್ಮಾಪಕರ ಸಂಘಕ್ಕೆ ಬರುವ ಹಣದಿಂದ, ಇದೆಲ್ಲಾ ನಿರ್ವಹಣೆ ಮಾಡುವುದರ ಜೊತೆಗೆ ಒಂದಿಷ್ಟು ಒಳ್ಳೆಯ ಕೆಲಸಗಳಿಗೆ ಬಳಸಲಾಗುತ್ತದೆ. ಈ ಆಪ್‌ ರೂಪುಗೊಳ್ಳುವುದಕ್ಕೆ ಇನ್ನೆರೆಡು ತಿಂಗಳು ಬೇಕು. ವೀರೇಶ್‌ ಚಿತ್ರಮಂದಿರದ ಕೆ.ವಿ. ಚಂದ್ರಶೇಖರ್‌ ಅವರ ಮಗ ಕುಶಾಲ್‌ ಅವರಿಗೆ ಈ ಜವಾಬ್ದಾರಿ ವಹಿಸಿದ್ದೇವೆ.

ಅವರು ಇನ್ನು ಕೆಲವೇ ದಿನಗಳಲ್ಲಿ ಒಂದು ವರದಿ ಕೊಡಲಿದ್ದಾರೆ. ಆ ನಂತರ ಕೆಲಸ ಶುರುವಾಗುತ್ತದೆ. ಈ ಆ್ಯಪ್‌ಗೆ ಯಾವ ಹೆಸರಿಡಬೇಕು ಎಂದು ಇನ್ನೂ ತೀರ್ಮಾನವಾಗಿಲ್ಲ. ಈ ಆ್ಯಪ್‌ ಬರೀ ಕನ್ನಡ ಚಿತ್ರಗಳಿಗೆ ಮಾತ್ರ ಸೀಮಿತ’ ಎನ್ನುತ್ತಾರೆ ಅವರು.