ಗೌರಿ ಹಂತಕರ ಬಂಧನಕ್ಕೆ ಆಗ್ರಹ

Team Udayavani, Sep 9, 2017, 12:26 PM IST

ಕುಂದಗೋಳ: ಪತ್ರಕರ್ತೆ ಗೌರಿ ಲಂಕೇಶ ಹತ್ಯೆಕೋರರನ್ನು ಕೂಡಲೇ ಬಂಧಿಸಿ ಶಿಕ್ಷಿಸಬೇಕೆಂದು ಆಗ್ರಹಿಸಿ ತಾಲೂಕು ಕಲಾವಿದರ ಸಂಘ, ಕಸಾಪ ಮತ್ತು ಶಸಾಪ ಪ್ರಗತಿಪರ ಹೋರಾಟಗಾರರು ತಹಶೀಲ್ದಾರ ಮೂಲಕ ರಾಜ್ಯಪಾಲರಿಗೆ ಶುಕ್ರವಾರ ಮನವಿ ಸಲ್ಲಿಸಿದರು. 

ಈ ವೇಳೆ ಕಸಾಪ ತಾಲೂಕು ಗೌರವಾಧ್ಯಕ್ಷ ಎ.ಬಿ. ಉಪ್ಪಿನ ಮತ್ತು ಕಲಾವಿದ ಎಸ್‌.ಎಸ್‌. ಹಿರೇಮಠ ಮಾತನಾಡಿ, ದೇಶದಲ್ಲಿ ಭ್ರಷ್ಟರನ್ನು ಬಯಲಿಗೆಳೆಯುವವರೆ ಪತ್ರಕರ್ತರು. ಅಲ್ಲದೇ ಸಮಾಜಮುಖೀ ಅನೇಕ ಚಿಂತನೆಗಳನ್ನು ಜನರಿಗೆ ತಲುಪಿಸುವ  ಹೊಣೆಗಾರಿಕೆ ಹೊತ್ತ ಇಂತಹ ಪತ್ರಕರ್ತರಿಗೆ ಬೆದರಿಕೆ, ಹತ್ಯೆ ನಡೆಯುತ್ತಿರುವುದು ಸಾಮಾನ್ಯವಾಗುತ್ತಿದೆ.

ರಾಜ್ಯ ಸರ್ಕಾರ ಪತ್ರಕರ್ತರಿಗೆ ಭದ್ರತೆ ನೀಡಬೇಕು ಎಂದು ಆಗ್ರಹಿಸಿದರು. ರುದ್ರಸ್ವಾಮಿ ನಾವಳ್ಳಿ ಮಾತನಾಡಿದರು. ವೀರೇಶ ಬಡಿಗೇರಿ, ಈಶ್ವರ ಅರಳಿ, ಬಿ.ಎಲ್‌. ಪಾಟೀಲ, ರವಿ ಶಿರಸಂಗಿ, ಎಂ.ಎಂ. ಘೋಡಕೆ, ರುದ್ರಸ್ವಾಮಿ ನಾವಳ್ಳಿ, ಎಂ.ಕೆ. ಹಿರೇಗೌಡ್ರ. ಎಸ್‌.ಎನ್‌. ಅರಳಿಕಟ್ಟಿ, ಚಂದ್ರಶೇಖರ ಪಾಟೀಲ, ಮಲ್ಲಪ್ಪ ಮುಳಗುಂದ ಇದ್ದರು. 

ಧಾರವಾಡ: ಗೌರಿ ಲಂಕೇಶ ಹಂತಕರನ್ನು ಆದಷ್ಟು ಬೇಗ ಬಂಧಿಸುವಂತೆ ಆಗ್ರಹಿಸಿ ಉತ್ತರ ಕರ್ನಾಟಕ ಛಲವಾದಿ ಮಹಾಸಭಾ ವತಿಯಿಂದ ಜಿಲ್ಲಾಧಿಕಾರಿ ಮೂಲಕ ಸಿಎಂಗೆ ಮನವಿ ಸಲ್ಲಿಸಲಾಯಿತು. ನಗರದ ಡಿಸಿ ಕಚೇರಿಗೆ ಶುಕ್ರವಾರ ಆಗಮಿಸಿದ ಮಹಾಸಭಾ ಕಾರ್ಯಕರ್ತರು, ಗೌರಿ ಲಂಕೇಶ ಅವರನ್ನು ಹತ್ಯೆಗೈಯ್ಯುವ ಮೂಲಕ ಪತ್ರಿಕಾ ಅಭಿವ್ಯಕ್ತಿ ಸ್ವಾತಂತ್ರದ ಕಗ್ಗೊಲೆ ಮಾಡಲಾಗುತ್ತಿದೆ.

ದುಷ್ಕರ್ಮಿಗಳು ರಾಜಾರೋಷವಾಗಿ ಪತ್ರಕರ್ತರನ್ನು, ಕ್ರಾಂತಿಕಾರಿ ಸಾಹಿತಿಗಳನ್ನು, ಪ್ರಗತಿಪರ ಚಿಂತಕರನ್ನು ಕೊಲ್ಲಲು ಮುಂದಾಗಿದ್ದಾರೆ. ಗೌರಿ ಲಂಕೇಶರ ಹತ್ಯೆ ಕೇವಲ ಹತ್ಯೆಯಲ್ಲ. ಇದು ಪ್ರಜಾಪ್ರಭುತ್ವದ ಕಗ್ಗೊಲೆ ಆಗಿದೆ ಎಂದು ದೂರಿದರು. ಇತ್ತೀಚೆಗೆ ರಾಜ್ಯದಲ್ಲಿ ಬುದ್ಧಿಜೀವಿಗಳ ಹತ್ಯೆ ನಡೆಯುತ್ತಿರುವುದು ನಾಗರಿಕ ಸಮಾಜ ತಲೆ ತಗ್ಗಿಸುವಂತೆ ಮಾಡಿದೆ.

ಹೀಗಾಗಿ ರಾಜ್ಯ ಸರ್ಕಾರ ಗೌರಿ ಲಂಕೇಶ ಹತ್ಯೆ ಪ್ರಕರಣವನ್ನು ಸಿಬಿಐ ತನಿಖೆಗೆ ಒಪ್ಪಿಸಬೇಕು. ಅಲ್ಲದೆ ಹಂತಕರನ್ನು ಕೂಡಲೇ ಬಂಧಿಸಿ ಸೂಕ್ತ ಕಾನೂನು ಕ್ರಮ ಜರುಗಿಸಬೇಕು ಎಂದು ಒತ್ತಾಯಿಸಿದರು. ಚಂದ್ರಪ್ಪ ಹಡಗಲಿ, ಶರಣಪ್ಪ ಹೊಸಮನಿ, ಸುರೇಶ ನವಲೂರ, ನಾಗನಗೌಡ ಪಾಟೀಲ, ಸಂತೋಷ ಹಾದಿಮನಿ, ನಿಂಗಪ್ಪ ದಿವಟಗಿ, ರಾಜಪ್ಪ ಕಾಳೆ, ರಾಜು ನರೇಗಲ್‌ ಇತರರಿದ್ದರು.