ರೋಜರ್‌-ಟೆಕು ಜೋಡಿಗೆ ಪುರುಷರ ಡಬಲ್ಸ್‌ ಪ್ರಶಸ್ತಿ

Team Udayavani, Sep 10, 2017, 6:35 AM IST

ನ್ಯೂಯಾರ್ಕ್‌: ಹಾಲೆಂಡಿನ ಜೀನ್‌ ಜೂಲಿಯನ್‌ ರೋಜರ್‌ ಮತ್ತು ರೊಮೇನಿಯಾದ ಹೊರಿಯ ಟೆಕು ಸೇರಿಕೊಂಡು ಯುಎಸ್‌ ಓಪನ್‌ ಪುರುಷರ ಡಬಲ್ಸ್‌ ಪ್ರಸಸ್ತಿಯನ್ನೆತ್ತಿದ್ದಾರೆ. ಇದು ಈ ಜೋಡಿಗೆ ಒಲಿದ ಮೊದಲ ಅಮೆರಿಕನ್‌ ಪ್ರಶಸ್ತಿ. 2015ರಲ್ಲಿ ಇವರು ವಿಂಬಲ್ಡನ್‌ ಡಬಲ್ಸ್‌ ಕಿರೀಟ ಏರಿಸಿಕೊಂಡಿದ್ದರು.

ಶುಕ್ರವಾರ ರಾತ್ರಿ ನಡೆದ ಫೈನಲ್‌ನಲ್ಲಿ 12ನೇ ಶ್ರೇಯಾಂಕದ ರೋಜರ್‌-ಟೆಕು ಸ್ಪೇನಿನ 11ನೇ ಶ್ರೇಯಾಂಕದ ಫೆಲಿಶಿಯಾನೊ ಲೋಪೆಜ್‌-ಮಾರ್ಕ್‌ ಲೋಪೆಜ್‌ ವಿರುದ್ಧ 6-4, 6-3 ಅಂತರದ ಜಯ ಸಾಧಿಸಿದರು. “ಓಪನ್‌ ಎರಾ’ದ ಬಳಿಕ (1968) ಹತ್ತರಾಚೆಯ ಶ್ರೇಯಾಂಕದ 2 ಜೋಡಿಗಳು ಗ್ರ್ಯಾನ್‌ಸ್ಲಾಮ್‌ ಫೈನಲ್‌ನಲ್ಲಿ ಕಾಣಿಸಿಕೊಂಡದ್ದು ಇದೇ ಮೊದಲು. ಸೆಮಿಫೈನಲ್‌ನಲ್ಲಿ ಮೊದಲ ಸೆಟ್‌ ಕಳೆದುಕೊಂಡೂ ವಿಶ್ವದ ಅಗ್ರ ಶ್ರೇಯಾಂಕದ ಹೆನ್ರಿ ಕಾಂಟಿನೆನ್‌-ಜಾನ್‌ ಪಿಯರ್ ಅವರನ್ನು ಮಣಿಸುವ ಮೂಲಕ ರೋಜರ್‌-ಟೆಕು ಫೈನಲ್‌ ಗೆಲುವಿನ ಮುನ್ಸೂಚನೆ ನೀಡಿದ್ದರು.

ಇನ್ನೊಂದೆಡೆ ಸ್ಪೇನಿನ ಜೋಡಿಯೊಂದು ಕಳೆದ 4 ವರ್ಷಗಳಲ್ಲಿ 3ನೇ ಸಲ ಯುಎಸ್‌ ಓಪನ್‌ ಫೈನಲ್‌ಗೆ ಲಗ್ಗೆ ಇರಿಸಿದರೂ ಪ್ರಶಸ್ತಿ ವಂಚಿತವಾಯಿತು. ಇಲ್ಲಿ ಕೊನೆಯ ಸಲ ಪುರುಷರ ಡಬಲ್ಸ್‌ ಗೆದ್ದ ಸ್ಪೇನಿಗರೆಂದರೆ ಸರ್ಗಿಯೊ ಕ್ಯಾಸಲ್‌-ಎಮಿಲಿಯೊ ಸ್ಯಾಂಸೆಜ್‌. ಇದು 1988ರಷ್ಟು ಹಿಂದಿನ ಸಾಧನೆಯಾಗಿದೆ.

ಸಾನಿಯಾ-ಪೆಂಗ್‌ ಪರಾಭವ
ನ್ಯೂಯಾರ್ಕ್‌: ಭಾರತದ ಸಾನಿಯಾ ಮಿರ್ಜಾ-ಚೀನದ ಶುಯಿ ಪೆಂಗ್‌ ಜೋಡಿಯ ಯುಎಸ್‌ ಓಪನ್‌ ವನಿತಾ ಡಬಲ್ಸ್‌ ಅಭಿಯಾನ ಸೆಮಿಫೈನಲಿಗೆ ಕೊನೆಗೊಂಡಿದೆ. 4ನೇ ಶ್ರೇಯಾಂಕದ ಇಂಡೋ-ಚೈನೀಸ್‌ ಜೋಡಿಯನ್ನು ದ್ವಿತೀಯ ಶ್ರೇಯಾಂಕದ ಮಾರ್ಟಿನಾ ಹಿಂಗಿಸ್‌ (ಸ್ವಿಜರ್‌ಲ್ಯಾಂಡ್‌)-ಯುಂಗ್‌ ಜಾನ್‌ ಚಾನ್‌ (ಚೈನೀಸ್‌ ತೈಪೆ) ಸೇರಿಕೊಂಡು 6-4, 6-4 ನೇರ ಸೆಟ್‌ಗಳಲ್ಲಿ ಮಣಿಸಿದರು.

ಇನ್ನೊಂದು ಸೆಮಿಫೈನಲ್‌ನಲ್ಲಿ ಜೆಕ್‌ ಗಣರಾಜ್ಯದ ಆಟಗಾರ್ತಿಯರೇ ಎದುರಾಗಿದ್ದರು. 7ನೇ ಶ್ರೇಯಾಂಕದ ಲೂಸಿ ರಡೆಕಾ-ಕ್ಯಾಥರಿನಾ ಸಿನಿಯಕೋವಾ 3ನೇ ಶ್ರೇಯಾಂಕದ ಲೂಸಿ ಸಫ‌ರೋವಾ-ಬಾಬೊìರಾ ಸ್ಟ್ರೈಕೋವಾ ವಿರುದ್ಧ 6-2, 7-5 ಅಂತರದ ಗೆಲುವು ಸಾಧಿಸಿದರು.

ಎರಡೂ ಸೆಟ್‌ಗಳಲ್ಲಿ ಸಾನಿಯಾ-ಪೆಂಗ್‌ ಜೋಡಿಯ ಆರಂಭ ಉತ್ತಮ ಮಟ್ಟದಲ್ಲೇ ಇತ್ತು. ಆದರೆ ನಿರ್ಣಾಯಕ ಹಂತದಲ್ಲಿ ಇವರಿಂದ ಒತ್ತಡವನ್ನು ನಿಭಾಯಿಸಲಾಗಲಿಲ್ಲ. 10 ಬ್ರೇಕ್‌ ಪಾಯಿಂಟ್‌ಗಳಲ್ಲಿ ಕೇವಲ ಎರಡನ್ನಷ್ಟೇ ಪರಿವರ್ತಿಸಲು ಸಾಧ್ಯವಾಯಿತು. ಇನ್ನೊಂದೆಡೆ ಹಿಂಗಿಸ್‌-ಚಾನ್‌ ಏಳರಲ್ಲಿ 4 ಬ್ರೇಕ್‌ ಪಾಯಿಂಟ್‌ಗಳ ಲಾಭವೆತ್ತಿದರು. ವಿನ್ನರ್ ಹೊಡೆತಗಳಲ್ಲೂ ಎದುರಾಳಿ ಜೋಡಿಯೇ ಮುಂದಿತ್ತು (44-22).

ದ್ವಿತೀಯ ಸೆಟ್‌ನಲ್ಲಿ ಸಾನಿಯಾ-ಪೆಂಗ್‌ 3-1ರ ಮುನ್ನಡೆ ಸಾಧಿಸಿದಾಗ ಸ್ಪರ್ಧೆ ಮುಂದಿನ ಸೆಟ್‌ಗೆ ವಿಸ್ತರಿಸಲ್ಪಡುತ್ತದೆಂದೇ ಭಾವಿಸಲಾಗಿತ್ತು. ಆದರೆ ಹಿಂಗಿಸ್‌ ದಿಟ್ಟ ಹೋರಾಟವೊಂದನ್ನು ತೋರ್ಪಡಿಸಿ ಹಿಡಿತ ಸಾಧಿಸುವಲ್ಲಿ ಯಶಸ್ವಿಯಾದರು.ಇದು ಈ ವರ್ಷ ಸಾನಿಯಾ ಮಿರ್ಜಾ ಅವರ ಅತ್ಯುತ್ತಮ ಗ್ರ್ಯಾನ್‌ಸ್ಲಾಮ್‌ ಪ್ರದರ್ಶನವಾಗಿದೆ. ಆಸ್ಟ್ರೇಲಿಯನ್‌ ಓಪನ್‌ ಮತ್ತು ವಿಂಬಲ್ಡನ್‌ನಲ್ಲಿ 3ನೇ ಸುತ್ತಿನಲ್ಲಿ ಸೋತಿದ್ದ ಸಾನಿಯಾ ಜೋಡಿ, ಫ್ರೆಂಚ್‌ ಓಪನ್‌ನಲ್ಲಿ ಮೊದಲ ಸುತ್ತಿನಲ್ಲೇ ಎಡವಿತ್ತು.