ಡಿಂಪಲ್ಲಾಗೊಂದ್‌ ಸ್ಟೋರಿ!

Team Udayavani, Sep 11, 2017, 6:27 PM IST

ನಟಿಯರು ಖುಷಿಪಡೋಕೆ ಸಾಕಷ್ಟು ಕಾರಣಗಳಿರುತ್ತವೆ. ತಮ್ಮ ಹೆಸರಲ್ಲೇ ಸಿನಿಮಾ ಟೈಟಲ್‌ ಇದ್ದರೆ, ಇಡೀ ಸಿನಿಮಾದ ಕಥೆ ತಮ್ಮ ಸುತ್ತವೇ ಸಾಗಿದರೆ ಅಥವಾ ಚಿತ್ರದಲ್ಲಿ ಡ್ಯಾನ್ಸ್‌ಗೆ ಹೆಚ್ಚಿನ ಅವಕಾಶ ಸಿಕ್ಕರೆ … ಹೀಗೆ ನಾನಾ ಕಾರಣಗಳಿಗಾಗಿ ನಟಿಮಣಿಯರು ಆಗಾಗ ಖುಷಿಯಾಗುತ್ತಿರುತ್ತಾರೆ. ಈಗ ರಚಿತಾ ರಾಮ್‌ ಕೂಡಾ ಖುಷಿಯಾಗಿದ್ದಾರೆ. ಅದಕ್ಕೆ ಕಾರಣ ಡಿಂಪಲ್‌.

ರಚಿತಾ ರಾಮ್‌ ಅವರನ್ನು ಅವರ ಡಿಂಪಲ್‌ ಕ್ವೀನ್‌ ಎಂದು ಕರೆಯೋದು ಗೊತ್ತೇ ಇದೆ. ಅದರಲ್ಲೇನು ವಿಶೇಷ ಎಂದು ನೀವು ಕೇಳಬಹುದು. ವಿಶೇಷ ಇರೋದೇ ಅಲ್ಲಿ. ರಚಿತಾ ನಾಯಕಿಯಾಗಿ ನಟಿಸಿರುವ “ಭರ್ಜರಿ’ ಚಿತ್ರದ ಕಥೆಯಲ್ಲಿ ಅವರ ಡಿಂಪಲ್‌ ಪ್ರಮುಖ ಪಾತ್ರ ವಹಿಸಿದೆ. ಹೌದು, ನಾಯಕಿಯ ಫೋರ್ಶನ್‌ ವಿಷಯದಲ್ಲಿ ಡಿಂಪಲ್‌ ಪ್ರಮುಖವಾಗಿದೆಯಂತೆ.

ನಿರ್ದೇಶಕ ಚೇತನ್‌ ಕುಮಾರ್‌ ಡಿಂಪಲ್‌ಇಟ್ಟುಕೊಂಡೇ ಕಥೆಯ ಟ್ರ್ಯಾಕ್‌ ಸಿದ್ಧಪಡಿಸಿದ್ದು, ತನ್ನ ಡಿಂಪಲ್‌ಗೆ ಇಷ್ಟೊಂದು ಪ್ರಾಮುಖ್ಯತೆ ಸಿಕ್ಕಿತ್ತಲ್ಲ ಎಂದು ರಚಿತಾ ಖುಷಿಯಾಗಿರೋದಂತೂ ಸುಳ್ಳಲ್ಲ. “ಭರ್ಜರಿ ಚಿತ್ರದ ಕಥೆ ತುಂಬಾ ಚೆನ್ನಾಗಿದೆ. ಮುಖ್ಯವಾಗಿ ಈ ಸಿನಿಮಾ ನನಗೆ ತುಂಬಾ ಇಷ್ಟವಾಗಲು ಕಾರಣ ನನ್ನ ಡಿಂಪಲ್‌.

ನನ್ನ ಡಿಂಪಲ್‌ ಸುತ್ತವೇ ಕಥೆಯ ಒಂದು ಟ್ರ್ಯಾಕ್‌ ಸಾಗುತ್ತದೆ. ಹಾಗಾಗಿ, ಈ ಚಿತ್ರದಲ್ಲಿ ಡಿಂಪಲ್‌ ಕೂಡಾ ಪ್ರಮುಖ ಪಾತ್ರ ವಹಿಸುತ್ತದೆ’ ಎಂದು ಖುಷಿಯಿಂದ ಹೇಳುತ್ತಾರೆ ರಚಿತಾ ರಾಮ್‌. ಈ ಹಿಂದೆ ರಚಿತಾ ಡಿಂಪಲ್‌ ಕುರಿತು “ಬುಲ್‌ಬುಲ್‌’ ಚಿತ್ರದಲ್ಲಿ ಒಂದು ಹಾಡಿನ ಲೈನ್‌ ಅಷ್ಟೇ ಬಂದಿತ್ತಂತೆ.

ಆದರೆ, ಈಗ ಕಥೆಯ ಟ್ರ್ಯಾಕ್‌ನಲ್ಲೇ ಡಿಂಪಲ್‌ ಸೇರಿಕೊಂಡಿದೆ. ಮುಂದೊಂದು ದಿನ ಡಿಂಪಲ್‌ ಸುತ್ತವೇ ಇಡೀ ಸಿನಿಮಾ ಬಂದು ಅದರಲ್ಲಿ ರಚಿತಾ ನಾಯಕಿಯಾದರೂ ಅಚ್ಚರಿಯಿಲ್ಲ. ಹಾಗಾದರೆ ಇಡೀ ಸಿನಿಮಾ ರಚಿತಾ ರಾಮ್‌ ಸುತ್ತವೇ ಸಾಗುತ್ತಾ ಎಂದು ನೀವು ಕೇಳಬಹುದು. ಖಂಡಿತಾ ಇಲ್ಲ, ಚಿತ್ರದಲ್ಲಿ ಹರಿಪ್ರಿಯಾ ಕೂಡಾ ನಟಿಸಿದ್ದಾರೆ. ಸಿನಿಮಾದಲ್ಲಿ ಅವರಿಗೂ ಒಂದು ಪ್ರಮುಖ ಪಾತ್ರವಿದೆ. 

ಊರ್ವಶಿ, ರೆಕ್ಸ್‌ನಲ್ಲಿ ಭರ್ಜರಿ ಚಿತ್ರ: ಧ್ರುವ ಸರ್ಜಾ ನಾಯಕರಾಗಿರುವ “ಭರ್ಜರಿ’ ಚಿತ್ರ ಇದೇ 15 ರಂದು ಬಿಡುಗಡೆಯಾಗುತ್ತಿರೋದು ನಿಮಗೆ ಗೊತ್ತೇ ಇದೆ. ವಿಶೇಷವೆಂದರೆ ಈ ಚಿತ್ರ ಊರ್ವಶಿ ಹಾಗೂ ರೆಕ್ಸ್‌ ಚಿತ್ರಮಂದಿರದಲ್ಲೂ ತೆರೆಕಾಣುತ್ತಿದೆ. ಲಾಲ್‌ಬಾಗ್‌ ರಸ್ತೆಯಲ್ಲಿರುವ ಊರ್ವಶಿ ಚಿತ್ರಮಂದಿರ ಹಿಂದಿ ಸೆಂಟರ್‌ ಎಂದು ಬಿಂಬಿತವಾಗಿದೆ. ಅದಕ್ಕೆ ಸರಿಯಾಗಿ ಅಲ್ಲಿ ಹಿಂದಿ ಚಿತ್ರಗಳೇ ಪ್ರದರ್ಶನ ಕಾಣುತ್ತವೆ.

ಇತ್ತೀಚೆಗೆ “ಜೂಮ್‌’ ಬಿಟ್ಟರೆ ಅಲ್ಲಿ ಬೇರೆ ಯಾವ ಕನ್ನಡ ಸಿನಿಮಾವೂ ಪ್ರದರ್ಶನ ಕಂಡಿಲ್ಲ. ಈಗ “ಭರ್ಜರಿ’ ಊರ್ವಶಿಯಲ್ಲಿ ತೆರೆಕಾಣುತ್ತಿದೆ. ಇನ್ನು, ಬ್ರಿಗೇಡ್‌ ರೋಡ್‌ನ‌ಲ್ಲಿರುವ ರೆಕ್ಸ್‌ ಚಿತ್ರಮಂದಿರದಲ್ಲೂ ಕನ್ನಡ ಸಿನಿಮಾ ಪ್ರದರ್ಶನವಾಗಿಲ್ಲ. ಈಗ “ಭರ್ಜರಿ’ ರೆಕ್ಸ್‌ ಚಿತ್ರಮಂದಿರದಲ್ಲೂ ಪ್ರದರ್ಶನ ಕಾಣುತ್ತಿದೆ.