ಜಾಹೀರಾತು ತೆರಿಗೆ ಪಾವತಿಸಲು ಸರ್ಕಾರಕ್ಕೆ ಪಾಲಿಕೆ ನೋಟಿಸ್‌

Team Udayavani, Sep 15, 2017, 11:48 AM IST

ಬೆಂಗಳೂರು: ಬಿಬಿಎಂಪಿ ವ್ಯಾಪ್ತಿಯ 385 ಬಸ್‌ ಶೆಲ್ಟರ್‌ಗಳಲ್ಲಿ ಅಳವಡಿಸಿರುವ ಸರ್ಕಾರದ ಸಾಧನೆಗಳ ಜಾಹೀರಾತು ಫ‌ಲಕಗಳಿಗೆ ತೆರಿಗೆ, ನೆಲಬಾಡಿಗೆ ಸೇರಿ ಒಟ್ಟು 12.98 ಕೋಟಿ ರೂ.ಗಳನ್ನು ಪಾವತಿಸುವಂತೆ ಸರ್ಕಾರಕ್ಕೆ ಪಾಲಿಕೆಯ ಅಧಿಕಾರಿಗಳು ಡಿಮ್ಯಾಂಡ್‌ ನೋಟಿಸ್‌ ಜಾರಿಗೊಳಿಸಿದ್ದಾರೆ. 

ಪಾಲಿಕೆಯ ವ್ಯಾಪ್ತಿಯಲ್ಲಿ ಒಟ್ಟು 489 ಬಸ್‌ ಶೆಲ್ಟರ್‌ಗಳಿದ್ದು, ಆ ಪೈಕಿ 385 ಬಸ್‌ ಶೆಲ್ಟರ್‌ಗಳಲ್ಲಿ ಸರ್ಕಾರದ ಸಾಧನೆಗಳನ್ನು ತಿಳಿಸುವ ಜಾಹೀರಾತು ಪ್ರದರ್ಶಿಸಲು ಪಾಲಿಕೆಯ ಸಾರ್ವಜನಿಕ ಸಂಪರ್ಕ ಅಧಿಕಾರಿಯಿಂದ ಅನುಮತಿ ಪಡೆಯಲಾಗಿದೆ. ಆದರೆ, ಅದಕ್ಕೆ ಸಂಬಂಧಿಸಿದಂತೆ ಸರ್ಕಾರ ಯಾವುದೇ ತೆರಿಗೆ ಪಾವತಿಸಿಲ್ಲ.

ಆ ಹಿನ್ನೆಲೆಯಲ್ಲಿ ಜುಲೈ 5ರಂದು ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆ ನಿರ್ದೇಶಕರಿಗೆ ಬಿಬಿಎಂಪಿ ಅಧಿಕಾರಿಗಳು ತೆರಿಗೆ ಪಾವತಿಸುವಂತೆ ಡಿಮ್ಯಾಂಡ್‌ ನೋಟಿಸ್‌ ಕಳುಹಿಸಿದ್ದಾರೆ. ಡಿಮ್ಯಾಂಡ್‌ ನೋಟಿಸ್‌ ಜಾರಿಗೊಳಿಸಿ ಎರಡು ತಿಂಗಳು ಕಳೆದರೂ ವಾತಾ ಇಲಾಖೆ ತೆರಿಗೆ ಪಾವತಿಸದ ಹಿನ್ನೆಲೆಯಲ್ಲಿ ಪಾಲಿಕೆಯ ಅಧಿಕಾರಿಗಳು ಎರಡನೇ ಬಾರಿ ಡಿಮ್ಯಾಂಡ್‌ ನೋಟಿಸ್‌ ಕಳುಹಿಸಿದ್ದಾರೆ. 

ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರ ಭಾವಚಿತ್ರಗಳನ್ನು ಬಳಿಸಿ, ಸರ್ಕಾರದ ಸಾಧನೆಗಳನ್ನು ಬಿಂಬಿಸುವ ಜಾಹೀರಾತುಗಳನ್ನು ನಗರದ ಬಸ್‌ ಶೆಲ್ಟರ್‌ಗಳಲ್ಲಿ ಪ್ರದರ್ಶಿಸಲಾಗುತ್ತಿದೆ. ಇದಕ್ಕೆ ಪ್ರತಿಯಾಗಿ ಸರ್ಕಾರ ಪಾಲಿಕೆಗೆ ಶೀಘ್ರವೇ ತೆರಿಗೆ ಪಾವತಿಸದಿದ್ದರೆ ಮುಖ್ಯಮಂತ್ರಿಗಳ ವಿರುದ್ಧ ದೂರು ದಾಖಲಿಸಲಾಗುವುದು ಎಂದು ಬಿಜೆಪಿ ನಗರದ ವಕ್ತಾರ ಎನ್‌.ಆರ್‌.ರಮೇಶ್‌ ತಿಳಿಸಿದ್ದಾರೆ. 

ಯಾವೆಲ್ಲ ಶುಲ್ಕ ಪಾವತಿಸಬೇಕು ಸರ್ಕಾರ 
-ಜಾಹೀರಾತು ತೆರಿಗೆ: 3.32 ಕೋಟಿ ರೂ.
-ಆರೋಗ್ಯ ಕರ: 58.64 ಲಕ್ಷ
-ನೆಲ ಬಾಡಿಗೆ: 7.96 ಕೋಟಿ ರೂ
-ನೆಲಬಾಡಿಗೆ ಮೇಲೆ ಸೇವಾ ತೆರಿಗೆ: 1.10 ಕೋಟಿ ರೂ.
-ಒಟ್ಟು: 12.98 ಕೋಟಿ ರೂ.