ಎಚ್ಚೆತ್ತುಕೊಳ್ಳದಿದ್ದರೆ ಬದುಕು ಕಷ್ಟಕರ: ಅನಂತಕುಮಾರ

Team Udayavani, Sep 17, 2017, 11:58 AM IST

ಹುಬ್ಬಳ್ಳಿ: ಜಾಗತಿಕ ತಾಪಮಾನ ಹೆಚ್ಚುತ್ತಿದ್ದು, ಎಚ್ಚೆತ್ತುಕೊಳ್ಳದಿದ್ದರೆ ಬದುಕು ಕಷ್ಟಕರವಾಗಲಿದೆ ಎಂದು ಕೇಂದ್ರ ರಾಸಾಯನಿಕ, ರಸಗೊಬ್ಬರ ಹಾಗೂ ಸಂಸದೀಯ ವ್ಯವಹಾರಗಳ ಖಾತೆ ಸಚಿವ ಅನಂತಕುಮಾರ ಹೇಳಿದರು. 

ಉಣಕಲ್ಲನ ಓಂ ನಗರದಲ್ಲಿ ಆರ್‌.ಕೆ. ಕೊಕಾಟೆ ಪ್ರೌಢಶಾಲೆ ಸಹಯೋಗದಲ್ಲಿ ಅದಮ್ಯ ಚೇತನ ಸೇವಾ ಸಂಸ್ಥೆಯಿಂದ ಶನಿವಾರ ಹಮ್ಮಿಕೊಂಡಿದ್ದ ಸಸ್ಯಾಗ್ರಹ ಸಸಿ ನೆಡುವ ಕಾರ್ಯಕ್ರಮಕ್ಕೆ ಚಾಲನೆ ನೀಡಿ ಅವರು ಮಾತನಾಡಿದರು. ಮಲೆನಾಡಿನ ಸೆರಗು ಈ ಭಾಗದಲ್ಲಿ  ಮರಗಳ ಕೊರತೆಯಾಗದ ರೀತಿಯಲ್ಲಿ ಈಗಿನಿಂದಲೇ ಕನಿಷ್ಠ ಒಬ್ಬ ವ್ಯಕ್ತಿ ಒಂದು ಸಸಿ ನೆಟ್ಟು ಅದನ್ನು ಪಾಲಿಸುವ ಕಾರ್ಯಕ್ಕೆ ಮುಂದಾಗಬೇಕು ಎಂದರು. 

ಅದಮ್ಯ ಚೇತನ ಸಂಸ್ಥೆ ಅಧ್ಯಕ್ಷೆ ತೇಜಸ್ವಿನಿ ಅನಂತಕುಮಾರ, ಸಂಸದ ಪ್ರಹ್ಲಾದ ಜೋಶಿ,ವಿಪ ಸದಸ್ಯ ಪ್ರದೀಪ ಶೆಟ್ಟರ್‌ ಮಾತನಾಡಿದರು. ಇದಕ್ಕೂ ಮೊದಲು ಜಾಥಾ ನಡೆಯಿತು. ಮಹಾಪೌರ ಡಿ.ಕೆ. ಚವ್ಹಾಣ, ಅಶ್ವಿ‌ನಿ ಮಜ್ಜಗಿ, ಉಮೇಶ ಕೌಜಗೇರಿ, ಲಿಂಗರಾಜ ಪಾಟೀಲ, ರಾಘವೇಂದ್ರ ರಾಮದುರ್ಗ, ತಿಪ್ಪಣ್ಣ ಮಜ್ಜಗಿ ಇತರರಿದ್ದರು. 

ಆರ್‌.ಕೆ.ಕೊಕಾಟೆ ಶಾಲೆ ಆವರಣದಲ್ಲಿ ವೇದಿಕೆ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿತ್ತು. ಬಿಸಿಲಿನ ತಾಪ  ಹೆಚ್ಚಾಗುತ್ತಿದ್ದಂತೆ ವೇದಿಕೆ ಮುಂಭಾಗದಲ್ಲಿ ಕುಳಿತಿದ್ದ ವಿದ್ಯಾರ್ಥಿಗಳನ್ನು ನೆರಳಿಗೆ ಹೋಗುವಂತೆ ಸಚಿವ ಅನಂತಕುಮಾರ ಸೂಚಿಸಿದರು. ಆದರೆ, ಮಕ್ಕಳು ಬಿಸಿಲಲ್ಲೇ ಕುಳಿತು ಗಣ್ಯರ ಮಾತು ಆಲಿಸಿದರು. ಕೊನೆಗೆ ಸಚಿವರೇ ಅಂಗಳಕ್ಕಿಳಿದು ಬಿಸಿಲಲ್ಲಿ ನಿಂತು 20 ನಿಮಿಷ ಕಾಲ ಮಕ್ಕಳಿಗೆ ಪರಿಸರ ಪಾಠ ಮಾಡಿದರು!