18 ತ.ನಾ.ಶಾಸಕರು ಅನರ್ಹ:ಸ್ಪೀಕರ್‌ ಕ್ರಮ, ದಿನಕರನ್‌ಗೆ ಹಿನ್ನಡೆ

Team Udayavani, Sep 18, 2017, 3:43 PM IST

ಚೆನ್ನೈ : ಉಚ್ಚಾಟಿತ ಎಐಎಡಿಎಂಕೆ ಉಪ ಪ್ರಧಾನ ಕಾರ್ಯದರ್ಶಿ ಟಿಟಿವಿ ದಿನಕರನ್‌ ಅವರಿಗೆ ಒದಗಿರುವ ಭಾರೀ ಹಿನ್ನಡೆ ಎಂದು ತಿಳಿಯಲಾಗಿರುವ ವಿದ್ಯಮಾನದಲ್ಲಿ, ತಮಿಳು ನಾಡು ಅಸೆಂಬ್ಲಿ ಸ್ಪೀಕರ್‌ ಪಿ ಧನಪಾಲ್‌ ಅವರು ಇಂದು ಸೋಮವಾರ ದಿನಕರನ್‌ಗೆ ನಿಷ್ಠರಿರುವ 18 ಶಾಸಕರನ್ನು ಅನರ್ಹಗೊಳಿಸಿದರು. 

ಈ ಬೆಳವಣಿಗೆಯನ್ನು ದೃಢಪಡಿಸಿರುವ ಎಎನ್‌ಐ ಸುದ್ದಿ ಸಂಸ್ಥೆ, ಅಸೆಂಬ್ಲಿ ಸ್ಪೀಕರ್‌ ಧನಪಾಲ್‌ ಅವರಿಂದ ಅನರ್ಹತೆಯ ಶಿಸ್ತು ಕ್ರಮಕ್ಕೆ ಗುರಿಯಾಗಿರುವ 18 ಶಾಸಕರ ಹೆಸರನ್ನು ಪ್ರಕಟಿಸಿದೆ. 

ಈ ಹೆಸರುಗಳಲ್ಲಿ ಮುಖ್ಯವಾಗಿ ಕಾಣಿಸಿರುವ ಹೆಸರುಗಳೆಂದರೆ ತಂಗ ತಮಿಳ್‌ಸೆಲ್ವನ್‌, ಸೆಂಥಿಲ್‌ ಬಾಲಾಜಿ, ಪಿ. ವೆಟ್ರಿವೇಲ್‌ ಮತ್ತು ಕೆ ಮರಿಯಪ್ಪನ್‌. 

ದಿನಕರನ್‌ ಅವರನ್ನು ಬೆಂಬಲಿಸುತ್ತಿದ್ದ ಈ 18 ಶಾಸಕರು ಇಂದಿನಿಂದ ಜಾರಿಗೆ ಬರುವಂತೆ ಅನರ್ಹರಾಗಿರುತ್ತಾರೆ. ಇದು 1986ರ ತಮಿಳು ನಾಡು ಅಸೆಂಬ್ಲಿ ಸದಸ್ಯರ ಪಕ್ಷಾಂತರ ಕಾನೂನು ಪ್ರಕಾರ ಕೈಗೊಳ್ಳಲಾದ ಶಿಸ್ತು ಕ್ರಮವಾಗಿದೆ. 

ದಿನಕರನ್‌ಗೆ ನಿಷ್ಠರಿರುವ ಈ 18 ಮಂದಿ ಶಾಸಕರು ತಮಿಳು ನಾಡು ಮುಖ್ಯಮಂತ್ರಿ ಇ ಕೆ ಪಳನಿಸ್ವಾಮಿ ಅವರ ಉಚ್ಚಾಟನೆಯನ್ನು ಆಗ್ರಹಿಸುತ್ತಲೇ ಬಂದಿದ್ದಾರೆ. 

ಸ್ಪೀಕರ್‌ ಅವರು ಈ ರೀತಿಯ ಅನರ್ಹತಾ ಶಿಸ್ತು ಕ್ರಮ ಕೈಗೊಳ್ಳಬಹುದೆಂಬ ಶಂಕೆಯಲ್ಲಿ ದಿನಕರನ್‌ ಈ ಮೊದಲೇ ಮದ್ರಾಸ್‌ ಹೈಕೋರ್ಟ್‌ ಮೆಟ್ಟಲೇರಿದ್ದರು.  ಸೆ.20ರ ತನಕ ವಿಶ್ವಾಸ ಮತ ನಡೆಯಕೂಡದೆಂದು ಮದ್ರಾಸ್‌ ಹೈಕೋರ್ಟ್‌ ಅಪ್ಪಣೆ ಕೊಡಿಸಿತ್ತು.