‘ಇಬ್ಭಾಗ ಪ್ರಕ್ರಿಯೆಯಿಂದ ಭಾರತದ ಘನತೆಗೆ ಧಕ್ಕೆ’

Team Udayavani, Sep 22, 2017, 12:10 PM IST

ನ್ಯೂಯಾರ್ಕ್‌: “ದೇಶವನ್ನು ಒಡೆದು ಆಳುವ ಪ್ರಕ್ರಿಯೆ ನಡೆದಿದ್ದು, ಶಾಂತಿ, ಸಾಮರಸ್ಯದಿಂದ ಕೂಡಿರುವ ಭಾರತಕ್ಕೆ ಜಾಗತಿಕ ಮಟ್ಟದಲ್ಲಿ ಧಕ್ಕೆಯಾಗುತ್ತಿದೆ” ಎಂದು ಕಾಂಗ್ರೆಸ್‌ ಉಪಾಧ್ಯಕ್ಷ ರಾಹುಲ್‌ ಗಾಂಧಿ ಪರೋಕ್ಷವಾಗಿ ಕೋಮುವಾದಿ ಶಕ್ತಿಗಳು ಹಾಗೂ ಪ್ರಧಾನಿ ಮೋದಿ ವಿರುದ್ಧ ಹರಿಹಾಯ್ದಿದ್ದಾರೆ. ರಾಹುಲ್‌, ಗುರುವಾರ ಇಲ್ಲಿನ ಐಕಾನಿಕ್‌ ಸ್ಕ್ವೇರ್‌ನಲ್ಲಿ ನಡೆದ ಸಂವಾದ ಕಾರ್ಯಕ್ರಮ ದಲ್ಲಿ ಅನಿವಾಸಿ ಭಾರತೀಯ ವಿದ್ಯಾರ್ಥಿಗಳು, ರಾಜಕಾರಣಿಗಳು ಹಾಗೂ ಶಿಕ್ಷಣತಜ್ಞರನ್ನು ಉದ್ದೇಶಿಸಿ ‘ಭವಿಷ್ಯ ಭಾರತ’ದ ಬಗ್ಗೆ ಮಾತನಾಡಿದರು. 

“ಸಾಮರಸ್ಯ ಹಾಗೂ ಶಾಂತಿ ಪಾಲನೆಯಿಂದಲೇ ಭಾರತ ವಿಶ್ವಮಟ್ಟದಲ್ಲಿ ಗುರುತಿಸಿಕೊಳ್ಳಲು ಸಾಧ್ಯವಾಗಿದ್ದು. ಇದನ್ನು ಕಾಪಾಡಿಕೊಂಡು ಹೋಗುವುದು ಸವಾಲು ಕೂಡ. ಆದರೆ ಬಲವಂತವಾಗಿ ದೇಶವನ್ನು ಒಡೆಯುವ ಕ್ರಿಯೆ ಕೆಲವು ಪಡೆಗಳಿಂದ ನಡೆದಿದೆ. ಇದು ಅಪಾಯಕಾರಿ ಬೆಳವಣಿಗೆ” ಎಂದು ಎಚ್ಚರಿಸಿದ್ದಾರೆ.

ಕಂಪ್ಯೂಟರ್‌ ಪರಿಚಯಿಸಿದ್ದ ಕಥೆ: 80ರ ದಶಕದಲ್ಲಿ ತಂದೆ ರಾಜೀವ್‌ ಗಾಂಧಿ ಅವರು ಪ್ರಧಾನಿ ಕಚೇರಿಯಲ್ಲಿ ಕಂಪ್ಯೂಟರ್‌ ಪರಿಚಯಿಸಿದ್ದನ್ನು ರಾಹುಲ್‌ ನೆನಪಿಸಿಕೊಂಡರು. ಟೈಪ್‌ರೈಟರ್‌ಗಳನ್ನು ತೆಗೆದು ಕಂಪ್ಯೂಟರ್‌ ಅಳವಡಿಕೆಗೆ ಅಧಿಕಾರಿಗಳು ಒಪ್ಪಲೇ ಇಲ್ಲ. ಹೀಗಾಗಿ 1 ತಿಂಗಳು ಕಂಪ್ಯೂಟರ್‌ ಅಳವಡಿಸಿ ನೋಡೋಣ. ಬೇಡ ಎನಿಸಿದಲ್ಲಿ ತೆಗೆಸಿ ಬಿಡೋಣ ಎಂದಿದ್ದರು. ತಿಂಗಳ ಕೊನೆಯಲ್ಲಿ ಎಲ್ಲಾ ಟೈಪ್‌ರೈಟರ್‌ಗಳನ್ನೂ ಹಿಂದಕ್ಕೆ ಪಡೆಯಲಾಯಿತು ಎಂದು ಘಟನೆಯನ್ನು ಮೆಲುಕು ಹಾಕಿದರು.